ಉಡುಪಿಯಲ್ಲಿ ತಪ್ತಮುದ್ರಾ ಧಾರಣೆಗೆ ಭಕ್ತರ ಸರತಿ ಸಾಲು

ಉಡುಪಿ: ಉಡುಪಿ ಆಸುಪಾಸಿನಲ್ಲಿ ಶುಕ್ರವಾರ ಪ್ರಥಮನ ಏಕಾದಶಿಯಂಗವಾಗಿ ಮಠಾಧೀಶರು ತಪ್ತಮುದ್ರಾಧಾರಣೆ ನಡೆಸಿದರು.

ಉಡುಪಿ ಶ್ರೀಕೃಷ್ಣಮಠದಲ್ಲಿ ಬೆಳಗ್ಗಿನ ಮಹಾ ಪೂಜೆಯನ್ನು ಬೇಗ ಮುಗಿಸಿ ಪರ್ಯಾಯ ಶ್ರೀ ಪಲಿಮಾರು ಮಠದ ಶ್ರೀವಿದ್ಯಾಧೀಶತೀರ್ಥ ಶ್ರೀಪಾದರು, ಶ್ರೀ ಅದಮಾರು ಮತ್ತು ಶ್ರೀ ಪಲಿಮಾರು ಕಿರಿಯ ಶ್ರೀಪಾದರು ಮುದ್ರಾ ಧಾರಣೆ ನಡೆಸಿದರು. ಶ್ರೀಕೃಷ್ಣಮಠದಲ್ಲಿ ದೊಡ್ಡ ಸರತಿ ಸಾಲು ಕಂಡುಬಂತು.

ಶ್ರೀಅದಮಾರು ಮಠಾಧೀಶರು ಪೆರ್ಡೂರು ದೇವಸ್ಥಾನದಲ್ಲಿ ತಪ್ತಮುದ್ರಾಧಾರಣೆ ನಡೆಸಿದ ಬಳಿಕ ಅದಮಾರು ಮಠದಲ್ಲಿ ನೂರಾರು ಜನರಿಗೆ ತಪ್ತಮುದ್ರಾಧಾರಣೆ ನಡೆಸಿ ಬಳ್ಳಾರಿಯಲ್ಲಿ ಮುದ್ರಾಧಾರಣೆ ನಡೆಸಲು ನಿರ್ಗಮಿಸಿದರು. ಶ್ರೀಬಾಳೆಗಾರು ಶ್ರೀಪಾದರು ಕೊಡವೂರು ಸಮೀಪದ ಕಂಗೂರು ಮಠದಲ್ಲಿ ಬೆಳಗ್ಗೆ 5 ಗಂಟೆಗೆ ಮುದ್ರಾಧಾರಣೆ ನಡೆಸಿದರು. ಬಳಿಕ ಪಡುಬಿದ್ರಿ, ಅಜೆಕಾರು, ಮೂಲ ಪಲಿಮಾರು ಮಠದಲ್ಲಿ ಮುದ್ರಾಧಾರಣೆ ನಡೆಸಿದರು. ಮುದ್ರಾಧಾರಣೆಗೆ ಮುನ್ನ ವೈದಿಕರು ಸುದರ್ಶನ ಹೋಮವನ್ನು ನಡೆಸಿದರು.