ಮಂಗಳೂರು: ಬಂದರು ಮಿಷನ್‌ ಸ್ಟ್ರೀಟ್‌ರಸ್ತೆಯ ಅಪಾರ್ಟ್‌ ಮೆಂಟ್‌ ಒಂದರಲ್ಲಿ ಕೂಲಿ ಕೆಲಸ ಮಾಡಿಕೊಂಡು ಅದೇ ಕಟ್ಟಡದಲ್ಲಿ ವಾಸವಾಗಿದ್ದ ತಂಗಪ್ಪನ್‌ (61) ಅವರ ಮೇಲೆ ಮೊಹಮ್ಮದ್‌ ಮುಸ್ತಫಾ ಅಬೂಬಕ್ಕರ್‌ ಯಾನೆ ಮುಸ್ತಫ ಯಾನೇ ಪಾಪು ಎಂಬಾತ ಜ. 23ರಂದು ಮರದ ರೀಪು ಮತ್ತು ಕಾಲಿನಿಂದ ಹಲ್ಲೆ ನಡೆಸಿದ್ದ. ಪರಿಣಾಮ ತೀವ್ರ ಅಸ್ವಸ್ಥರಾಗಿದ್ದ ಅವರನ್ನು ವೆನ್ಲಾಕ್‌ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಜ. 29ರಂದು ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ. ಈ ಬಗ್ಗೆ ಪಾಂಡೇಶ್ವರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ವಾರಸುದಾರರ ಪತ್ತೆಯಾಗಿಲ್ಲ
ಮೂಲತಃ ಕೇರಳದ ಕೊಟ್ಟಾಯಂ ಜಿಲ್ಲೆ ಅಡುಪೋಕರ ನಿವಾಸಿಯಾಗಿದ್ದು, ವಾರಸುದಾರರ ಪತ್ತೆಯಾಗಿಲ್ಲ. ಗೋಧಿ ಮೈಬಣ್ಣ, ಸಾಧಾರಣ ಮೈಕಟ್ಟು, ದುಂಡು ಮುಖ, ಗಲ್ಲದ ಎಡಭಾಗ ಮತ್ತು ಹೊಟ್ಟೆಯಲ್ಲಿ ಕಪ್ಪು ಬಣ್ಣದ ಮಚ್ಚೆ ಇದೆ. ಈ ವ್ಯಕ್ತಿಯ ಕುರಿತಂತೆ ಮಾಹಿತಿ ಇದ್ದವರು ಪಾಂಡೇಶ್ವರ ಪೊಲೀಸ್‌ ಠಾಣೆಯನ್ನು ಸಂಪರ್ಕಿಸಬಹುದು ಎಂದು ಪೊಲೀಸರು ತಿಳಿಸಿದ್ದಾರೆ.
