ಪಿಜ್ಜಾ ಬೇಕೆಂದು ತುರ್ತು ಕರೆ ಮಾಡಿದ ಬಾಲಕ: ಮತ್ತೇನಾಯ್ತು ಗೊತ್ತಾ..?

ಫ್ಲೋರಿಡಾ: ಅರ್ಜೆಂಟಾಗಿ ನಂಗೆ ಒಂದು ಪಿಜ್ಜಾ ಬೇಕು.. ಬೇಗ.. ಹೀಗೊಂದು ಕರೆ ಪೊಲೀಸರಿಗೆ ಬಂದರೆ? ಅಚ್ಚರಿಗೊಳಗಾಗುವ ಸರದಿ ಪೊಲೀಸರದ್ದು. ತುರ್ತು ಕರೆಗಳೇ ಬರುವ ಫೋನ್‌ಗೆ ಪಿಜ್ಜಾ ಕೇಳಿ ಬಂದಿದ್ದು ಅಮೆರಿಕದ ಫ್ಲೋರಿಡಾದಲ್ಲಿ.

911 ನಂಬರ್‌ಗೆ 5 ವರ್ಷದ ಬಾಲಕ ಕರೆ ಮಾಡಿದ್ದು.. ಪೊಲೀಸರಿಗೂ ಅಚ್ಚರಿಯಾಗಿತ್ತು. ಆದರೆ ಇದು ಸುಮ್ಮನೆ ತಮಾಷೆಗೆ ಎಂದು ಕೂತಿರಲಿಲ್ಲ. ಆ ಹುಡುಗ ಕೇವಲ ಪಿಜ್ಜಾಕ್ಕಾಗಿ ಕರೆ ಮಾಡಿದನೋ..? ಬೇರೇನಾದರೂ ಸಮಸ್ಯೆ ಆಗಿದೆಯೇ? ಅಥವಾ ಮನೆಯಲ್ಲೇನಾದರೂ ಆಗಿದೆಯೇ ಎಂಬುದನ್ನು ತಿಳಿಯಲು ಕೂಡಲೇ ಪೊಲೀಸರು ಆ ನಂಬರ್‌ನ ಮನೆಗೆ ತೆರಳಿದರು.

ಇದೇ ವೇಳೆ ಪೊಲೀಸ್‌ ಅಧಿಕಾರಿಯೊಬ್ಬರು ಬಾಲಕನ ಕೋರಿಕೆ ಮನ್ನಿಸಿ ಪಿಜ್ಜಾವನ್ನೂ ತೆಗೆದುಕೊಂಡು ಹೋಗಿದ್ದರು. ಪೊಲೀಸರು ಬಂದಿದ್ದು ನೋಡಿ, ಮನೆಯವರಿಗೆ, ಬಾಲಕನಿಗೆ ಭಯ, ಅಚ್ಚರಿಯೂ ಆಗಿತ್ತಂತೆ.

ಬಾಲಕನ ಕಿತಾಪತಿ ಮನೆಯವರಿಗೆ ತಿಳಿಯದೇ ಆಗಿದ್ದು, ತುರ್ತು ಕರೆಗೆ ಕರೆ ಮಾಡಿದ್ದರಿಂದ ಹೀಗಾಗಿದೆ ಎಂದು ಪೊಲೀಸರು ಮನೆಯವರಿಗೆ ಹೇಳಿದ್ದಾರೆ. ಬಳಿಕ ಪೊಲೀಸರು ಆತನಿಗೆ ಪಿಜ್ಜಾ ನೀಡಿ ಫೋಟೋ ಕೂಡ ತೆಗೆಸಿಕೊಂಡಿದ್ದಾರೆ.