ಮದುವೆ ವಿವಾದ: ಸಂಬಂಧಿಕರಿಂದಲೇ ಮಲಗಿದ್ದವರ ಮೇಲೆ ಗುಂಡಿನ ದಾಳಿ… 9 ಮಂದಿ ಹತ್ಯೆ

ಇಸ್ಲಾಮಾಬಾದ್‌: ವಾಯುವ್ಯ ಪಾಕಿಸ್ತಾನದ ಖೈಬರ್ ಪಖ್ತುಂಖ್ವಾದಲ್ಲಿ ಮದುವೆ ವಿವಾದದ ಕಾರಣಕ್ಕೆ ಒಂದೇ ಕುಟುಂಬದ 9 ಸದಸ್ಯರನ್ನು ಅವರ ಸಂಬಂಧಿಕರೇ ಗುಂಡಿಟ್ಟು ಹತ್ಯೆಗೈದಿರುವ ಘಟನೆ ವರದಿಯಾಗಿದೆ. ಮಲಕಂದ್‌ ಜಿಲ್ಲೆಯ ಬತ್ವೇಲ್ ತೆಹಸಿಲ್‌ನಲ್ಲಿ ಘಟನೆ ನಡೆದಿದ್ದು, ಮೃತರ ಪೈಕಿ ಮೂವರು ಮಹಿಳೆಯರು ಹಾಗೂ 6 ಮಂದಿ ಪುರುಷರು ಸೇರಿದ್ದಾರೆ.

ಸಂಬಂಧಿಕರ ನಡುವೆ ಮದುವೆ ವಿಚಾರವಾಗಿ ಮನಸ್ತಾಪವಾಗಿತ್ತು. ಈ ಹಿನ್ನೆಲೆಯಲ್ಲಿ ರಾತ್ರಿ ವೇಳೆ ಏಕಾಏಕಿ ಮನೆಗೆ ನುಗ್ಗಿದ ಸಂಬಂಧಿಕರು ನಿದ್ರೆಯಲ್ಲಿದ್ದವರ ಮೇಲೆ ಮನಬಂದಂತೆ ಗುಂಡುಹಾರಿಸಿ, ಹತ್ಯೆಗೈದಿದ್ದಾರೆ. ಪ್ರಕರಣ ಸಂಬಂಧಿಸಿದಂತೆ ದೂರು ದಾಖಲಿಸಿ, ತನಿಖೆ ನಡೆಸಲಾಗುತ್ತಿದೆ.