ಅಂಬಾಲಾ : ನಾರಾಯಣಗಢಕ್ಕೆ ಸಮೀಪದ ನಾರಾಯಣಗಢ-ಸಧೌರಾ ರಸ್ತೆಯಲ್ಲಿ ಇಂದು ಬೆಳಗ್ಗೆ ಎಸ್‌ಯವಿ ವಾಹನವೊಂದು ಎದುರುಗಡೆಯಿಂದ ಬರುತ್ತಿದ್ದ ಟ್ರಕ್ಕಿಗೆ ಮುಖಾಮುಖೀ ಢಿಕ್ಕಿಯಾದ ಭೀಕರ ಅವಘಡದಲ್ಲಿ ಎಂಟು ಮಂದಿ ಮೃತಪಟ್ಟು ಇತರ ನಾಲ್ಕು ಮಂದಿ ಗಂಭೀರವಾಗಿ ಗಾಯಗೊಂಡ ಘಟನೆ ನಡೆದಿದೆ.
ಎಸ್‌ಯುವಿ ವಾಹನದಲ್ಲಿದ್ದವರು ಉತ್ತರ ಪ್ರದೇಶದಲ್ಲಿನ ಮಿರ್ಜಾಪುರ ಮಹಾಲಾದಲ್ಲಿ ಮದುವೆ ಸಮಾರಂಭಕ್ಕೆಂದು ನಾರಾಯಣಗಢಕ್ಕೆ ಸಮೀಪದ ಮೋಲಿ ಎಂಬ ಗ್ರಾಮದಿಂದ ಹೋಗುತ್ತಿದ್ದರು. ದಹಾರ್‌ ಅಂಬ್ಲಿ ಗ್ರಾಮದ ಸಮೀಪ ಇವರ ವಾಹನವು ಎದುರುಗಡೆಯಿಂದ ಧಾವಿಸಿ ಬರುತ್ತಿದ್ದ ಟ್ರಕ್ಕಿಗೆ ಮುಖಾಮುಖೀ ಢಿಕ್ಕಿಯಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.
ಮೃತರನ್ನು ಮನು 50, ಲೀಲಾ 40, ಹುಕಂ 35, ಕಮಾ 37, ಆಂಗ್ರೆಜ್‌ 40, ಸೋನು 25, ಧೂಮ್‌ ಸಿಂಗ್‌ 62 ಮತ್ತು ಟಿಂಕು 45 ಎಂದು ಗುರುತಿಸಲಾಗಿದೆ.
ಗಂಭೀರವಾಗಿ ಗಾಯಗೊಂಡ ನಾಲ್ವರನ್ನು ಚಂಡೀಗಢದಲ್ಲಿನ ಪಿಜಿಐಎಂಇಆರ್‌ ಆಸ್ಪತ್ರೆಗೆ ಒಯ್ಯಲಾಗಿದೆ.
ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
