ಟ್ರಕ್ಕುಗಳ ಮುಖಾಮುಖೀ ಢಿಕ್ಕಿ: 6 ಸಾವು; ಆರು ಮಂದಿ ಗಂಭೀರ

ಸುರಿ, ಪಶ್ಚಿಮ ಬಂಗಾಲ : ಪಶ್ಚಿಮ ಬಂಗಾಲದ ಬೀರ್‌ ಭೂಮ್‌ನಲ್ಲಿ ಇಂದು ಶುಕ್ರವಾರ ಎರಡು ಟ್ರಕ್ಕುಗಳು ಮುಖಾಮುಖೀ ಢಿಕ್ಕಿಯಾದ ಭೀಕರ ಅವಘಡದಲ್ಲಿ ಆರು ಮಂದಿ ಮೃತಪಟ್ಟು  ಇತರ ಆರು ಮಂದಿ ಗಂಭೀರ ಗಾಯಗೊಂಡರೆಂದು ಪೊಲೀಸರು ತಿಳಿಸಿದ್ದಾರೆ.

ಸುರಿ – ದುರ್ಗಾಪುರ ರಸ್ತೆಯಲ್ಲಿ ದುಬ್ರಜಪುರ ಪೊಲೀಸ್‌ ಠಾಣೆ ವ್ಯಾಪಕ್ತಿಯ ಗೋಪಾಲಪುರ ಗ್ರಾಮದಲ್ಲಿ ಈ ಅವಘಡ ನಡೆಯಿತು.

ಖಾಲಿ ಟ್ರಕ್ಕಿನಲ್ಲಿ 12 ಮಂದಿ ಪ್ರಯಾಣಿಸುತ್ತಿದ್ದರು. ಎದುರುಗಡೆಯಿಂದ ಧಾವಿಸಿ ಬರುತ್ತಿದ್ದ ಸರಕು ತುಂಬಿದ ಟ್ರಕ್‌, ಈ ಟ್ರಕ್ಕಿಗೆ ನೇರವಾಗಿ ಢಿಕ್ಕಿ ಹೊಡೆಯಿತು. 

ನಾಲ್ವರು ಸ್ಥಳದಲ್ಲೇ ಮೃತಪಟ್ಟರೆ ಉಳಿದ ಇಬ್ಬರು ಸುರಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು. ಗಂಭೀರ ಸ್ಥಿತಿಯಲ್ಲಿರುವ ಆರು ಮಂದಿ ಗಾಯಾಳುಗಳನ್ನು ಸುರಿ ಆಸ್ಪತ್ರೆಗೆ ಸೇರಿಸಲಾಗಿದೆ. ಹೆಚ್ಚಿನ ಸಂತ್ರಸ್ತರು ಔಷ್‌ಗ್ರಾಮಕ್ಕೆ ಸೇರಿದವರಾಗಿದ್ದಾರೆ.