ಸೌಮ್ಯಾ ಹತ್ಯೆ ಪ್ರಕರಣ: ಕೇರಳ ಅರ್ಜಿ ವಜಾ

ಹೊಸದಿಲ್ಲಿ: ಸೌಮ್ಯಾ ಕೊಲೆ ಪ್ರಕರಣ ಸಂಬಂಧ ಕೇರಳ ಸರಕಾರ ಸಲ್ಲಿಸಿದ್ದ ಕ್ಯುರೇಟಿವ್‌ ಅರ್ಜಿಯನ್ನು ಸುಪ್ರೀಂ ಕೋರ್ಟ್‌ ಶುಕ್ರವಾರ ವಜಾ ಮಾಡಿದೆ. ಅಪರಾಧಿ ಗೋವಿಂದಚಾಮಿ ವಿರುದ್ಧದ ಕೊಲೆ ಆರೋಪ ಕೈಬಿಟ್ಟು, ಆತನಿಗೆ ಕೇರಳದ ಸ್ಥಳೀಯ ನ್ಯಾಯಾಲಯ ನೀಡಿದ್ದ ಜೀವಾವಧಿ ಶಿಕ್ಷೆಯನ್ನು 7 ವರ್ಷ ಜೈಲುಶಿಕ್ಷೆಗೆ ಇಳಿಸಿದ್ದ ಸುಪ್ರೀಂ ತೀರ್ಪು ಪ್ರಶ್ನಿಸಿ ಕೇರಳ ಸರಕಾರ ಮೇಲ್ಮನವಿ ಸಲ್ಲಿಸಿತ್ತು. 2011ರ ಫೆ.1ರಂದು 23 ವರ್ಷದ ಸೌಮ್ಯಾಳನ್ನು ಚಲಿಸುತ್ತಿರುವ ರೈಲಿನಿಂದ ನೂಕಿದ್ದ ಆರೋಪಿ ಗೋವಿಂದಚಾಮಿ, ಅನಂತರ ಕೆಳಕ್ಕೆ ಬಿದ್ದಿದ್ದ ಆಕೆಯ ಮೇಲೆ ಅತ್ಯಾಚಾರವೆಸಗಿದ್ದ. ಗಂಭೀರ ಗಾಯಗೊಂಡಿದ್ದ ಆಕೆ ಆಸ್ಪತ್ರೆಯಲ್ಲಿ ಅಸುನೀಗಿದ್ದಳು. ಶಿಕ್ಷೆ ಕಡಿತಗೊಳಿಸಿದ ಸುಪ್ರೀಂ ಆದೇಶದ ವಿರುದ್ಧ ಕಿಡಿಕಾರಿ ನಿವೃತ್ತ ನ್ಯಾ| ಮಾರ್ಕಂಡೇಯ ಕಾಟ್ಜು ಅವರು ನ್ಯಾಯಾಂಗ ನಿಂದನೆ ಆರೋಪಕ್ಕೂ ಗುರಿಯಾಗಿದ್ದರು.