ದಿಲ್ಲಿ : ನಾಲ್ವರು ಚೀನೀಯರ ಬಂಧನ; 10 ಕಿಲೋ ಚಿನ್ನ ವಶ

ಹೊಸದಿಲ್ಲಿ : ಹತ್ತು ಕಿಲೋ ಚಿನ್ನವನ್ನು ದೇಶದೊಳಗೆ ಕಳ್ಳಸಾಗಣೆ ಮಾಡಲು ಉದ್ದೇಶಿಸಿದ್ದ ನಾಲ್ವರು ಚೀನೀ ಪುರುಷರನ್ನು ಕಸ್ಟಮ್ಸ್‌ ಅಧಿಕಾರಿಗಳು ದಿಲ್ಲಿ ವಿಮಾನ ನಿಲ್ದಾಣದಲ್ಲಿ ಬಂಧಿಸಿದ್ದಾರೆ.

ಆರೋಪಿ ಚೀನೀ ಪುರುಷರು ತೈವಾನ್‌ನಿಂದ ಹಾಂಕಾಂಗ್‌ ಮಾರ್ಗವಾಗಿ ಇಲ್ಲಿನ ವಿಮಾನ ನಿಲ್ದಾಣದಲ್ಲಿ ಬಂದಿಳಿದಾಗ ಕಸ್ಟಮ್ಸ್‌ ಅಧಿಕಾರಿಗಳು ಅವರನ್ನು ಕೂಲಂಕಷವಾಗಿ ಪರೀಕ್ಷಿಸಿ ಅವರ ಚೀಲದಲ್ಲಿದ್ದ  ತಲಾ 1 ಕಿಲೋ ತೂಕದ 10 ಗೋಲ್ಡ್‌ ಬಾರ್‌ಗಳನ್ನು ವಶಕ್ಕೆ ತೆಗೆದುಕೊಂಡು ಅವರನ್ನು ಬಂಧಿಸಿದರು ಎಂದು ಪೊಲೀಸರು ತಿಳಿಸಿದ್ದಾರೆ. 

ಚಿನ್ನ ಬಾರುಗಳ ಬೆಲೆ 3 ಕೋಟಿ ರೂ.ಗಳಿಗೂ ಹೆಚ್ಚು ಎಂದು ಕಸ್ಟಮ್ಸ್‌ ಅಧಿಕಾರಿಗಳು ಹೇಳಿದ್ದಾರೆ. 

ಪ್ರತ್ಯೇಕ ಪ್ರಕರಣದಲ್ಲಿ ಕಸ್ಟಮ್ಸ್‌ ಅಧಿಕಾರಿಗಳು ಅದೇ ದಿನ ಮೂವರು ಭಾರತೀಯರನ್ನು ಬಂಧಿಸಿ ಅವರಲ್ಲಿದ್ದ ಒಟ್ಟು 1.05 ಕೇಜಿ ಚಿನ್ನವನ್ನು ವಶಪಡಿಸಿಕೊಂಡು ಅವರನ್ನು ಬಂಧಿಸಿದರು.