3rd Test: ಶ್ರೀಲಂಕಾಕ್ಕೆ 8 ವಿಕೆಟ್‌ ಜಯ: ಇಂಗ್ಲೆಂಡಿಗೆ 2-1 ಟೆಸ್ಟ್‌  ಸರಣಿ

ಲಂಡನ್‌: ಆರಂಭಿಕ ಆಟಗಾರ ಪಥುಮ್‌ ನಿಸ್ಸಾಂಕ ಅವರ ಅಜೇಯ ಶತಕದ ನೆರವಿನಿಂದ ಶ್ರೀಲಂಕಾ ತಂಡವು ಇಂಗ್ಲೆಂಡ್‌ ವಿರುದ್ಧದ ಮೂರನೇ ತಥಾ ಅಂತಿಮ ಟೆಸ್ಟ್‌ ಪಂದ್ಯದಲ್ಲಿ ಎಂಟು ವಿಕೆಟ್‌ಗಳ ಜಯ ಸಾಧಿಸಿದೆ. ಈ ಗೆಲುವಿನಿಂದ ಶ್ರೀಲಂಕಾ ತಂಡವು ವೈಟ್‌ವಾಶ್‌ ಸೋಲಿನಿಂದ ಪಾರಾಗಿದೆ. ಇದು ಇಂಗ್ಲೆಂಡ್‌ ನೆಲದಲ್ಲಿ ಶ್ರೀಲಂಕಾ ದಾಖಲಿಸಿದ ನಾಲ್ಕನೇ ಜಯ ಆಗಿದೆ.

ಮೂರನೇ ಪಂದ್ಯದಲ್ಲಿ ಸೋತರೂ ಇಂಗ್ಲೆಂಡ್‌ ತಂಡವು 2-1 ಅಂತರದಿಂದ ಟೆಸ್ಟ್‌ ಸರಣಿಯನ್ನು ತನ್ನದಾಗಿಸಿಕೊಂಡಿದೆ. ಆದರೆ ಎರಡನೇ ಕ್ಲೀನ್‌ಸ್ವೀಪ್‌ ಸಾಧನೆ ದಾಖಲಿಸಿಕೊಳ್ಳಲು ಇಂಗ್ಲೆಂಡ್‌ ತಂಡದಿಂದ ಸಾಧ್ಯವಾಗಲಿಲ್ಲ. ಇಂಗ್ಲೆಂಡ್‌ ಈ ಮೊದಲು ಜುಲೈಯಲ್ಲಿ ವೆಸ್ಟ್‌ಇಂಡೀಸ್‌ ತಂಡವನ್ನು 3-0 ಅಂತರದಿಂದ ಕ್ಲೀನ್‌ಸ್ವೀಪ್‌ ಮೂಲಕ ಸೋಲಿಸಿತ್ತು.

ಗೆಲ್ಲಲು 219 ರನ್‌ ಗಳಿಸುವ ಗುರಿ ಪಡೆದ ಶ್ರೀಲಂಕಾ ತಂಡಕ್ಕೆ ನಿಸ್ಸಾಂಕ ಆಸರೆಯಾದರು. ಅವರ ಆಕರ್ಷಕ ಶತಕದಿಂದಾಗಿ ತಂಡ ಎರಡು ವಿಕೆಟ್‌ ನಷ್ಟದಲ್ಲಿ 219 ರನ್‌ ಗಳಿಸಿ ಜಯಭೇರಿ ಬಾರಿಸಿತು. ಬಿರುಸಿನ ಆಟವಾಡಿದ ನಿಸ್ಸಾಂಕ 107 ಎಸೆತ ಎದುರಿಸಿ 13 ಬೌಂಡರಿ ಮತ್ತು 2 ಸಿಕ್ಸರ್‌ ನೆರವಿನಿಂದ 127 ರನ್‌ ಗಳಿಸಿ ಅಜೇಯರಾಗಿ ಉಳಿದರು. ಇದು ನಿಸ್ಸಾಂಕ ಅವರ ಎರಡನೇ ಟೆಸ್ಟ್‌ ಶತಕವಾಗಿದೆ. ಅವರ ಮೊದಲ ಶತಕ ವೆಸ್ಟ್‌ಇಂಡೀಸ್‌ ವಿರುದ್ಧ 2021ರಲ್ಲಿ ಹೊಡೆದಿದ್ದರು.

ಸಂಕ್ಷಿಪ್ತ ಸ್ಕೋರು: ಇಂಗ್ಲೆಂಡ್‌ 325 ಮತ್ತು 156; ಶ್ರೀಲಂಕಾ 263 ಮತ್ತು ಎರಡು ವಿಕೆಟಿಗೆ 219 (ಪಥುಮ್‌ ನಿಸ್ಸಾಂಕ 127 ಔಟಾಗದೆ). ಪಂದ್ಯಶ್ರೇಷ್ಠ: ಪಥುಮ್‌ ನಿಸ್ಸಾಂಕ