ಶಶಾಂಕ್‌ ಸಿನಿಮಾಸ್‌ನಡಿ “ತಾಯಿಗೆ ತಕ್ಕ ಮಗ’ ಸಿನಿಮಾ ಆರಂಭವಾಗುತ್ತಿರುವ ಬಗ್ಗೆ ನಿಮಗೆ ಗೊತ್ತಿರಬಹುದು. ಅಜೇಯ್‌ ರಾವ್‌ ನಾಯಕರಾಗಿರುವ ಈ ಚಿತ್ರ ಸೋಮವಾರ ಸೆಟ್ಟೇರಿದೆ. ಈ ಚಿತ್ರದಲ್ಲಿ ಸುಮಲತಾ ಅಂಬರೀಶ್‌ ತಾಯಿ ಪಾತ್ರ ಮಾಡುತ್ತಿದ್ದಾರೆ. ಸುಮಲತಾ ಅಂಬರೀಶ್‌ ಈ ಸಿನಿಮಾ ಬಗ್ಗೆ ಖುಷಿಯಾಗಿದ್ದಾರೆ. ಅದಕ್ಕೆ ಮುಖ್ಯವಾಗಿ ಎರಡು ಕಾರಣ ಮೊದಲನೇಯದಾಗಿ ದೊಡ್ಡ ಗ್ಯಾಪ್‌ನ ನಂತರ ಸಿಕ್ಕ ಒಳ್ಳೆಯ ಪಾತ್ರ ಒಂದಾದರೆ ತಮ್ಮ 36 ವರ್ಷಗಳ ಕೆರಿಯರ್‌ನಲ್ಲಿ ಶೂಟಿಂಗ್‌ ಮುಂಚೆ ಕೈಗೆ ಬಂದ ಸ್ಕ್ರಿಪ್ಟ್.
ಹೌದು, ಸುಮಲತಾ ಅಂಬರೀಶ್‌ ಅವರು ಚಿತ್ರರಂಗಕ್ಕೆ ಬಂದು 36 ವರ್ಷಗಳಾಗಿವೆ. ಈ 36 ವರ್ಷಗಳಲ್ಲಿ ಅವರಿಗೆ ಯಾವ ನಿರ್ದೇಶಕರು ಕೂಡಾ ಚಿತ್ರೀಕರಣ ಆರಂಭವಾಗುವ ಮುನ್ನ ಸಂಪೂರ್ಣ ಸ್ಕ್ರಿಪ್ಟ್ ಅನ್ನು ಕೈಗಿಟ್ಟಿರಲಿಲ್ಲವಂತೆ. ಆದರೆ, “ತಾಯಿಗೆ ತಕ್ಕ ಮಗ’ ತಂಡ ಮಾತ್ರ ಮುಹೂರ್ತವಾಗುವ ಮುನ್ನವೇ ಬೌಂಡ್‌ ಸ್ಕ್ರಿಪ್ಟ್ ಅನ್ನು ಸುಮಲತಾ ಅವರಿಗೆ ಕೊಟ್ಟಿದೆ. ಇದರಿಂದ ಸಹಜವಾಗಿಯೇ ಸುಮಲತಾ ಅವರು ಖುಷಿಯಾಗಿದ್ದಾರೆ.
ಸೋಮವಾರ ನಡೆದ ಮುಹೂರ್ತದ ವೇಳೆ ತಮ್ಮ ಕೈಗೆ ಬಂದ ಮೊದಲ ಸ್ಕ್ರಿಪ್ಟ್ನ ಬಗ್ಗೆ ಮಾತನಾಡಿದರು. “ನಾನು ಚಿತ್ರರಂಗಕ್ಕೆ ಬಂದು 36 ವರ್ಷ ಕಳೆಯುತ್ತಾ ಬಂದಿದೆ. ಈ 36 ವರ್ಷಗಳಲ್ಲಿ ಸಾಕಷ್ಟು ಸಿನಿಮಾ ಮಾಡಿದ್ದೇನೆ. ಆದರೆ, ಇದೇ ಮೊದಲ ಬಾರಿಗೆ ಒಂದು ಸಿನಿಮಾದ ಬೌಂಡ್‌ ಸ್ಕ್ರಿಪ್ಟ್ ನನ್ನ ಕೈಗೆ ಬಂದಿದೆ. ಅದು “ತಾಯಿಗೆ ತಕ್ಕ ಮಗ’ ಸಿನಿಮಾದ್ದು. ತಂಡ ತುಂಬಾ ಶಿಸ್ತಿನಿಂದ ಕೂಡಿದೆ’ ಎಂದರು. ಇನ್ನು, ಈ ಚಿತ್ರದಲ್ಲಿ ಅವರು ತಾಯಿ ಪಾತ್ರ ಮಾಡುತ್ತಿದ್ದಾರೆ. ಹಾಗಂತ ಕಣ್ಣೀರು ಹಾಕುವ ತಾಯಿಯಲ್ಲ.
ಬದಲಾಗಿ ರೆಬೆಲ್‌ ಆಗುವಂತಹ ತಾಯಿ. “ತುಂಬಾ ಒಳ್ಳೆಯ ಪಾತ್ರ. ನಾನು ಈ ತರಹದ ಒಂದು ಪಾತ್ರ ಮಾಡದೇ ದೊಡ್ಡ ಗ್ಯಾಪ್‌ ಆಗಿತ್ತು. ಅನ್ಯಾಯ, ಅಸಮಾನತೆಯ ವಿರುದ್ಧ ಹೋರಾಡುವ, ಸಿಡಿದೇಳುವ ಪಾತ್ರ’ ಎನ್ನುತ್ತಾರೆ ಸುಮಲತಾ. ಈ ಚಿತ್ರದಲ್ಲಿ ಅವರು ಲಾಯರ್‌ ಆಗಿ ನಟಿಸುತ್ತಿದ್ದಾರೆ. “ಎಕ್ಸ್‌ಕ್ಯೂಸ್‌ ಮೀ’ ಚಿತ್ರದಲ್ಲಿ ಅಜೇಯ್‌ಗೆ ತಾಯಿಯಾಗಿ ನಟಿಸಿದ್ದರು. ಈಗ 14 ವರ್ಷಗಳ ನಂತರ ಮತ್ತೂಮ್ಮೆ ಅಜೇಯ್‌ ಹಾಗೂ ಸುಮಲತಾ ತಾಯಿ, ಮಗನಾಗಿ ನಟಿಸುತ್ತಿದ್ದಾರೆ.
