ಪಾಕ್‌ ಜೈಲಿನಲ್ಲಿ 308 ಭಾರತೀಯ ಕೈದಿಗಳು! ಭಾರತದ ಜೈಲಿನಲ್ಲಿ 417 ಪಾಕ್ ಕೈದಿಗಳು!

ನವದೆಹಲಿ: ಪಾಕಿಸ್ತಾನವು ತನ್ನ ಜೈಲುಗಳಲ್ಲಿರುವ 308 ಭಾರತೀಯ ಕೈದಿಗಳ ಪಟ್ಟಿಯನ್ನು ಶನಿವಾರ ಭಾರತೀಯ ಹೈ ಕಮಿಷನ್‌ಗೆ ನೀಡಿದೆ.

ಭಾರತ-ಪಾಕಿಸ್ತಾನದ ಒಪ್ಪಂದದ ಭಾಗವಾಗಿ ನೀಡಿರುವ ಈ ಪಟ್ಟಿಯಲ್ಲಿ 42 ನಾಗರಿಕರು ಹಾಗೂ 266 ಮಂದಿ ಮೀನುಗಾರರು ಇನ್ನೂ ಬಿಡುಗಡೆ ಹೊಂದದೇ ಇದ್ದಾರೆಂದು ಉಲ್ಲೇಖೀಸಲಾಗಿದೆ.

ಅದೇ ರೀತಿ ಭಾರತ ಕೂಡ ತನ್ನ ಜೈಲುಗಳಲ್ಲಿರುವ ಪಾಕಿಸ್ತಾನಿಗಳ ಪಟ್ಟಿ ಹಸ್ತಾಂತರಿಸಿದ್ದು, ಈ ಪೈಕಿ 343 ನಾಗರಿಕರು ಹಾಗೂ 74 ಮೀನುಗಾರರು ಸೇರಿದಂತೆ ಒಟ್ಟು 417 ಮಂದಿ ಇರುವುದಾಗಿ ತಿಳಿಸಿದೆ.

2008ರ ಉಭಯ ರಾಷ್ಟ್ರಗಳ ರಾಯಭಾರ ಒಪ್ಪಂದದ ಭಾಗವಾಗಿ ಪ್ರತಿವರ್ಷ ಜನವರಿ ಹಾಗೂ ಜುಲೈನಲ್ಲಿ ಈ ಪಟ್ಟಿಯನ್ನು ಹಂಚಿಕೊಳ್ಳಲಾಗುತ್ತಿದೆ. ಈ ವೇಳೆ ಭಾರತ ಪಾಕಿಸ್ತಾನದಲ್ಲಿ ಬಂಧಿತರಾಗಿರುವ ಕೈದಿಗಳ ಬಿಡುಗಡೆಗೆ ಆಗ್ರಹಿಸಿದ್ದು, ಅವರ ಸುರಕ್ಷತೆ ಖಾತರಿ ಪಡಿಸುವಂತೆಯೂ ಕೇಳಲಾಗಿದೆ.