ಸ್ಟಾರ್ಟ್‌ಅಪ್‌ ಕಂಪನಿಗಳ ಶೇ.25ರಷ್ಟು ಮಾಲೀಕರು ಭಾರತೀಯರು: ಸಚಿವೆ ನಿರ್ಮಲಾ ಸೀತಾರಾಮನ್

ನವದೆಹಲಿ: ಜಗತ್ತಿನ ಟಾಪ್‌ 58 ಕಂಪನಿಗಳ ಸಿಇಒಗಳು ಭಾರತೀಯ ಮೂಲದವರು. ಐಟಿ ಕ್ಷೇತ್ರದ ಸ್ಟಾರ್ಟ್‌ಅಪ್‌ ಕಂಪನಿಗಳ ಶೇ.25ರಷ್ಟು ಮಾಲೀಕರು ಭಾರತೀಯರು ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಹೇಳಿದರು.

ಕಾಂಚೀಪುರದ ಭಾರತೀಯ ಮಾಹಿತಿ ತಂತ್ರಜ್ಞಾನ, ವಿನ್ಯಾಸ ಮತ್ತು ಉತ್ಪಾದನೆ ಸಂಸ್ಥೆಯ ಘಟಿಕೋತ್ಸವದಲ್ಲಿ ಮಾತನಾಡಿದ ಅವರು, “ಜಗತ್ತಿನ ಟಾಪ್‌ 500 ಕಂಪನಿಗಳಲ್ಲಿ ಅಮೆರಿಕದ ನಂತರ ಅತಿ ಹೆಚ್ಚು ಸಿಇಒಗಳು ಭಾರತೀಯರಾಗಿದ್ದಾರೆ” ಎಂದರು.

ಗೂಗಲ್‌ ಸಿಇಒ ಸುಂದರ್‌ ಪಿಚೈ, ಟ್ವಿಟರ್‌ ಸಿಇಒ ಪರಾಗ್‌ ಅಗರ್‌ವಾಲ್‌ ಸೇರಿದಂತೆ ಬಹುರಾಷ್ಟ್ರೀಯ ಕಂಪನಿಗಳ ಅನೇಕ ಸಿಇಒಗಳು ಭಾರತೀಯರಾಗಿದ್ದಾರೆ. ವಿಶ್ವಸಂಸ್ಥೆಯ ಡೇಟಾ ಪ್ರಕಾರ, 2036ರಲ್ಲಿ ಭಾರತದ ಒಟ್ಟು ಜನಸಂಖ್ಯೆಯ ಶೇ.65ರಷ್ಟು ಮಂದಿ ದುಡಿಯುವ ವರ್ಗದವಾಗಿರುತ್ತಾರೆ. ಇದು 2047ರವರೆಗೂ ಮುಂದುವರಿಯಲಿದೆ. ಇದು ದೇಶದ ಜಿಡಿಪಿಗೆ ಕೊಡುಗೆ ನೀಡಲು ಸಹಕಾರಿ. ಸರಿಯಾದ ಕೌಶಲ, ತರಬೇತಿ ಮತ್ತು ಸಮಾನ ಅವಕಾಶಗಳಿಂದ ಮಾತ್ರ ಇದು ಸಾಧ್ಯವಾಗಲಿದೆ ಎಂದು ಹೇಳಿದರು.