ನವದೆಹಲಿ: ಅಸ್ಸಾಂನ ರಾಷ್ಟ್ರೀಯ ಪೌರತ್ವ ನೋಂದಣಿ (ಎನ್‌ಆರ್‌ಸಿ) ಮಾದರಿಯನ್ನೇ ದೇಶಾದ್ಯಂತ ಜಾರಿಗೊಳಿಸಲು ಸಿದ್ಧತೆ ಆರಂಭವಾಗಿದೆ. 2020ರ ಸೆಪ್ಟೆಂಬರ್‌ನ ವೇಳೆಗೆ ದೇಶದ ಎಲ್ಲಾ ನಾಗರಿಕರನ್ನು ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (ಎನ್‌ಪಿಆರ್‌) ವ್ಯಾಪ್ತಿಗೆ ತರಲಾಗುತ್ತದೆ ಎಂದು ನಾಗರಿಕರ ನೋಂದಣಿ ಹಾಗೂ ಜನಗಣತಿ ರಿಜಿಸ್ಟ್ರಾರ್‌ನ ಆಯುಕ್ತರಾದ ವಿವೇಕ್‌ ಜೋಷಿ ಹೇಳಿದ್ದಾರೆ.
2020ರ ಏ. 1ರಿಂದ ಎನ್‌ಪಿಆರ್‌ ನೋಂದಣಿ ಪ್ರಕ್ರಿಯೆಯು ಆರಂಭಗೊಳ್ಳಲಿದ್ದು, ಸೆ. 30ರಂದು ಮುಕ್ತಾಯಗೊಳ್ಳಲಿದೆ. ಭಾರತದ ಪ್ರತಿ ಮಹಾನಗರ, ನಗರ, ಪಟ್ಟಣ, ಹಳ್ಳಿ ಹಾಗೂ ಹೋಬಳಿಗಳ ಮಟ್ಟದಲ್ಲಿರುವ ಎಲ್ಲಾ ನಾಗರಿಕರ ಮಾಹಿತಿಗಳು ಒಂದೇ ನೋಂದಣಿಯಲ್ಲಿ ಇರಬೇಕೆಂಬ ಆಶಯದಿಂದ ಈ ದೇಶವ್ಯಾಪಿ ಎನ್‌ಪಿಆರ್‌ಗೆ ಚಾಲನೆ ನೀಡಲಾಗುತ್ತದೆ. ಎಲ್ಲಾ ನಾಗರಿಕರ ಮಾಹಿತಿಗಳು ಅವರ ಜನಸಂಖ್ಯಾ ಮಾಹಿತಿಯಷ್ಟೇ ಆಗಿರದೆ, ಅವರ ಬಯೋಮೆಟ್ರಿಕ್‌ ಮಾಹಿತಿಗಳನ್ನೂ ಒಳಗೊಂಡಿರುತ್ತದೆ.
ಮಾನದಂಡ: ನಿರ್ದಿಷ್ಟ ವ್ಯಕ್ತಿಯನ್ನು ಆತನಿರುವ ನಿರ್ದಿಷ್ಟ ಪ್ರಾಂತ್ಯದಲ್ಲಿ ಕಳೆದ ಆರು ತಿಂಗಳು ಅಥವಾ ಅದಕ್ಕಿಂತಲೂ ಹೆಚ್ಚು ಕಾಲದಿಂದ ವಾಸವಾಗಿದ್ದಾನೆ ಅಥವಾ ಆತ ಇರುವ ಪ್ರಾಂತ್ಯದಲ್ಲಿ ಮುಂದಿನ ಆರು ತಿಂಗಳು ಅಥವಾ ಅದಕ್ಕಿಂತ ಹೆಚ್ಚು ಕಾಲ ನೆಲೆಸುವಂಥವನು ಎಂಬ ಎರಡು ಅಂಶಗಳ ಆಧಾರದಲ್ಲಿ ಪ್ರತಿಯೊಬ್ಬ ನಾಗರಿಕನ ನೋಂದಣಿ ಮಾಡಲಾಗುತ್ತದೆ. ಈ ನೋಂದಣಿಯಲ್ಲಿ ತೊಡಗುವ ಸಿಬ್ಬಂದಿಯು ಮನೆಯಿಂದ ಮನೆಗೆ ತೆರಳಿ ಮಾಹಿತಿಗಳನ್ನು ಪಡೆಯುತ್ತಾರೆ.
ಎಲ್ಲರ ಮಾಹಿತಿ ಒಂದೆಡೆ
ಇನ್ನು, 2003ರ ಪೌರತ್ವ (ನಾಗರಿಕರ ನೋಂದಣಿ ಮತ್ತು ರಾಷ್ಟ್ರೀಯ ಗುರುತಿನ ಚೀಟಿ ವಿತರಣೆ) ನಿಯಮಗಳ ಅನುಸಾರವೇ ಎನ್‌ಪಿಆರ್‌ ಅನ್ನು ದೇಶವ್ಯಾಪಿ ವಿಸ್ತರಿಸಲಾಗುತ್ತದೆ. ನೋಂದಣಿಗೊಂಡ ಎಲ್ಲಾ ನಾಗರಿಕರ ಮಾಹಿತಿಗಳು, ಭಾರತೀಯ ನಾಗರಿಕರ ರಾಷ್ಟ್ರೀಯ ನೋಂದಣಿಯಲ್ಲಿ (ಎನ್‌ಆರ್‌ಐಸಿ) ಸಂಗ್ರಹಿಸಲಾಗುತ್ತದೆ ಎಂದು ಹೇಳಲಾಗಿದೆ.
