ಜಾಗತಿಕ ಪ್ರಶಸ್ತಿಗೆ ಸ್ಪರ್ಧೆ: ಭಾರತದ ಇಬ್ಬರು ಶಿಕ್ಷಕರು

ಲಂಡನ್‌: ಪ್ರಸಕ್ತ ಸಾಲಿನ ಜಾಗತಿಕ ಶಿಕ್ಷಕ ಪ್ರಶಸ್ತಿಯ ರೇಸ್‌ನಲ್ಲಿರುವ ಟಾಪ್‌ 50 ಶಿಕ್ಷಕರ ಪೈಕಿ ಭಾರತದ ಇಬ್ಬರು ಶಿಕ್ಷಕರು ಸ್ಥಾನ ಪಡೆದಿದ್ದಾರೆ.

ಬಿಹಾರದ ಭಾಗಲ್ಪುರದ ಗಣಿತ ಶಿಕ್ಷಕ ಸತ್ಯಮ್‌ ಮಿಶ್ರಾ ಮತ್ತು ಹೈದರಾಬಾದ್‌ನ ಇಂಗ್ಲಿಷ್‌, ಗಣಿತ, ಸಮಾಜ ಅಧ್ಯಯನ ಶಿಕ್ಷಕಿ ಮೇಘನಾ ಮಸುನೂರಿ ಅವರೇ ರೇಸ್‌ನಲ್ಲಿರುವ ಭಾರತೀಯ ಶಿಕ್ಷಕರು. ಯುನೆಸ್ಕೋ ಸಹಭಾಗಿತ್ವದಲ್ಲಿ ವರ್ಕೇ ಫೌಂಡೇಶನ್‌ ಪ್ರತೀ ವರ್ಷ ಈ ಪ್ರಶಸ್ತಿಯನ್ನು ನೀಡುತ್ತದೆ. ಪ್ರಶಸ್ತಿಯು 7.30 ಕೋಟಿ ರೂ.ಗಳ ನಗದು ಬಹುಮಾನವನ್ನು ಹೊಂದಿದೆ. ಈ ವರ್ಷ 121 ದೇಶಗಳ 8 ಸಾವಿರ ಶಿಕ್ಷಕರು ನಾಮನಿರ್ದೇಶನಗೊಂಡಿದ್ದರು. ನವೆಂಬರ್‌ನಲ್ಲಿ ವಿಜೇತರ ಹೆಸರು ಘೋಷಣೆಯಾಗಲಿದೆ. ಕಳೆದ ವರ್ಷದ ಜಾಗತಿಕ ಪ್ರಶಸ್ತಿಯು ಮಹಾರಾಷ್ಟ್ರದ ಶಿಕ್ಷಕ ರಂಜಿತ್‌ಸಿನ್ಹಾ ದಿಸಾಲೆ ಅವರಿಗೆ ಸಂದಿತ್ತು.

ಇದೇ ವೇಳೆ, ಪ್ರಸಕ್ತ ವರ್ಷದಿಂದ ಇದೇ ಸಂಸ್ಥೆಯು “ಜಾಗತಿಕ ವಿದ್ಯಾರ್ಥಿ ಪ್ರಶಸ್ತಿ’ಯನ್ನೂ ಆರಂಭಿಸಿದೆ. ಈ ಪ್ರಶಸ್ತಿಯ ಟಾಪ್‌ 50 ಪಟ್ಟಿಯಲ್ಲಿ ಭಾರತದ ನಾಲ್ವರು ವಿದ್ಯಾರ್ಥಿಗಳು ಸ್ಥಾನ ಪಡೆದಿರುವುದು ವಿಶೇಷ. ಅವರೆಂದರೆ, ದಿಲ್ಲಿಯ ಕೈಫ್ ಅಲಿ, ಅಹ್ಮದಾಬಾದ್‌ನ ಆಯುಷ್‌ ಗುಪ್ತಾ, ಜಾರ್ಖಂಡ್‌ನ‌ ಸೀಮಾ ಕುಮಾರಿ, ಹರಿಯಾಣದ ವಿಪಿನ್‌ ಕುಮಾರ್‌ ಶರ್ಮಾ.