ಕ್ರೆಡಿಟ್‌ಕಾರ್ಡ್‌ ಆ್ಯಕ್ಟಿವೇಷನ್‌ ನೆಪದಲ್ಲಿ 2.47 ಲ.ರೂ. ವಂಚನೆ

ಮಂಗಳೂರು: ಹೊಸ ಕ್ರೆಡಿಟ್‌ ಕಾರ್ಡ್‌ನ ಆ್ಯಕ್ಟಿವೇಷನ್‌ ಮಾಡುವುದಾಗಿ ಹೇಳಿ ವ್ಯಕ್ತಿರ್ಯೋವರಿಗೆ 2.47 ಲ.ರೂ. ವಂಚಿಸಿರುವ ಬಗ್ಗೆ ಮಂಗಳೂರು ಸೆನ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ದೂರುದಾರ ವ್ಯಕ್ತಿ ಬ್ಯಾಕ್‌ ಆಫ್ ಬರೋಡಾ ಕ್ರೆಡಿಟ್‌ ಕಾರ್ಡ್‌ ಹೊಂದಿದ್ದು ಅವರಿಗೆ ಮಾ.31ರಂದು ಮಧ್ಯಾಹ್ನ 8274849531 ಮೊಬೈಲ್‌ ಸಂಖ್ಯೆಯಿಂದ ಕರೆ ಬಂದಿತ್ತು. ಕರೆ ಮಾಡಿದ ವ್ಯಕ್ತಿ ತಾನು ಬ್ಯಾಂಕ್‌ ಆಫ್ ಬರೋಡಾ ದಿಂದ ಮಾತನಾಡುತ್ತಿರುವುದಾಗಿ ತಿಳಿಸಿ ಹೊಸ ಕ್ರೆಡಿಟ್‌ ಕಾರ್ಡ್‌ ಆ್ಯಕ್ಟಿವೇಷನ್‌ ಮಾಡಬೇಕಾಗಿದ್ದು ಅದರ ನಂಬರ್‌ ಹೇಳುವಂತೆ ತಿಳಿಸಿದ. ಅದನ್ನು ನಂಬಿದ ದೂರುದಾರ ವ್ಯಕ್ತಿ ಹೊಸ ಕಾರ್ಡ್‌ನ ನಂಬರ್‌ ಹಾಗೂ ಅವರ ಮೊಬೈಲ್‌ಗೆ ಬಂದಿರುವ ಒಟಿಪಿ ವಿವರ ತಿಳಿಸಿದ್ದಾರೆ. ಅನಂತರ ಅರ್ಧಗಂಟೆಯ ಬಳಿಕ ಅವರ ಕ್ರೆಡಿಟ್‌ ಕಾರ್ಡ್‌ ಸಂಖ್ಯೆಯಿಂದ 1,99,999 ಹಾಗೂ 48,000 ರೂ. ಕಡಿತ ಆಗಿರುವ ಸಂದೇಶ ಬಂದಿದೆ. ಈ ಬಗ್ಗೆ ಬ್ಯಾಂಕ್‌ಗೆ ಹೋಗಿ ವಿಚಾರಿಸಿದಾಗ ಯಾರೋ ಅಪರಿಚಿತರು ಕರೆ ಮಾಡಿ ಒಟ್ಟು 2,47,999 ರೂ. ವರ್ಗಾಯಿಸಿ ವಂಚಿಸಿರುವುದು ಗೊತ್ತಾಗಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.