ನಾಶಿಕ್‌: ಮಿನಿ ಟ್ರಕ್‌ ಮಗುಚಿ ಬಿದ್ದು 18 ಕಾರ್ಮಿಕರಿಗೆ ಗಾಯ; ಮೂವರು ಗಂಭೀರ

ನಾಶಿಕ್‌ : ಮುಂಬಯಿ – ಆಗ್ರಾ ಹೆದ್ದಾರಿಯಲ್ಲಿ ಇಂದು ಬುಧವಾರ ಬೆಳಗ್ಗೆ 10.30ರ ಸುಮಾರಿಗೆ ಮಿನಿ ಟ್ರಕ್‌ ಅಡಿ ಮೇಲಾಗಿ ಬಿದ್ದ ಪರಿಣಾಮವಾಗಿ ಅದರಲ್ಲಿದ್ದವರ ಪೈಕಿ 18 ಕಾರ್ಮಿಕರು ಗಾಯಗೊಂಡರು. ಇವರಲ್ಲಿ ಮೂರು ಕಾರ್ಮಿಕರ ಸ್ಥಿತಿ ಗಂಭೀರವಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮಹಾರಾಷ್ಟ್ರದ ನಾಶಿಕ್‌ ಜಿಲ್ಲೆಯ ಚಂದವಾಡ ತಾಲೂಕು ವ್ಯಾಪ್ತಿಯ ವಡಾಲಿ ಭೋಯಿ ಗ್ರಾಮದ ಹೆದ್ದಾರಿಯಲ್ಲಿ ಈ ಅವಘಡ ಸಂಭವಿಸಿತು. ಮಿನಿ ಟ್ರಕ್‌ ಚಾಲಕನಿಗೆ ವಾಹನದ ಮೇಲಿನ ನಿಯಂತ್ರಣ ತಪ್ಪಿದ್ದೇ ಅವಘಡಕ್ಕೆ ಕಾರಣವಾಯಿತು.

ನಾಶಿಕ್‌ ಜಿಲ್ಲೆಯ ಮಾಲೇಗಾಂವ್‌ ತಾಲೂಕಿನ ಕಾರ್ಮಿಕರು ಮಿನಿ ಟ್ರಕ್‌ ನಲ್ಲಿ ಹಿಂಗಾನವೇದ ಗ್ರಾಮದಲ್ಲಿ ಕಬ್ಬು ಕಟಾವಿಗಾಗಿ ಹೋಗುತ್ತಿದ್ದರು. ಗಾಯಾಳುಗಳಲ್ಲಿ 15 ಮಂದಿಯನ್ನು ಚಂದವಾಡ ಸರಕಾರಿ ಆಸ್ಪತ್ರೆಗೆ ಸೇರಿಸಲಾಗಿದೆ; ಗಂಭೀರವಾಗಿ ಗಾಯಗೊಂಡವರನ್ನು ನಾಶಿಕ್‌ ಸರಕಾರಿ ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವ ಪೊಲೀಸರು ತಿಳಿಸಿದ್ದಾರೆ.