ಸಾಲಮನ್ನಾ: 1.70 ಲಕ್ಷ ರೈತರ ದಾಖಲೆ ಹೊಂದಾಣಿಕೆಯಾಗುತ್ತಿಲ್ಲ

ಬೆಂಗಳೂರು: ರಾಷ್ಟ್ರೀಕೃತ ಬ್ಯಾಂಕುಗಳಲ್ಲಿ ಸಾಲ ಪಡೆದಿರುವ 1.70 ಲಕ್ಷ ರೈತರ ದಾಖಲೆಗಳು ಹೊಂದಾಣಿಕೆಯಾಗುತ್ತಿಲ್ಲ ಎಂದು ಸಾಲ ಮನ್ನಾ ಯೋಜನೆ ಸಂಯೋಜನಾಧಿಕಾರಿ ಮನೀಶ್‌ ಮೌದ್ಗಿಲ್‌ ತಿಳಿಸಿದ್ದಾರೆ.

 ಸುದ್ದಿಗಾರರ ಜತೆ ಮಾತನಾಡಿದ ಅವರು, ರಾಷ್ಟ್ರೀಕೃತ ಬ್ಯಾಂಕುಗಳಲ್ಲಿ ಒಟ್ಟು 17 ಲಕ್ಷ ರೈತರು ಸಾಲ ಪಡೆದಿದ್ದು ಆ ಕುರಿತು ದಾಖಲೆ ನೀಡುವಂತೆ ರೈತರಿಗೆ ಸೂಚಿಸಲಾಗಿತ್ತು. ರೈತರು ಸಲ್ಲಿಸಿರುವ ದಾಖಲೆ ಪರಿಶೀಲನೆ ವೇಳೆ ಶೇ.10ರಷ್ಟು ಅಂದರೆ 1.70 ಲಕ್ಷ ದಾಖಲೆ ಹೊಂದಾಣಿಕೆಯಾಗುತ್ತಿಲ್ಲ ಎಂದು ಹೇಳಿದರು.

ರೈತರು ಸಮರ್ಪಕ ದಾಖಲೆ ಕೊಟ್ಟಿಲ್ಲ. ಮತ್ತೂಮ್ಮೆ ದಾಖಲೆ ನೀಡುವಂತೆ ಸೂಚಿಸಲಾಗಿದೆ. ಸಹಕಾರ ಬ್ಯಾಂಕುಗಳಲ್ಲಿ 18.5 ಲಕ್ಷ ರೈತರು ಸಾಲ ಪಡೆದಿದ್ದು ಆ ಕುರಿತ ದಾಖಲೆಗಳು ಸಹ ಸಂಗ್ರಹಿಸಲಾಗುತ್ತಿದೆ ಎಂದು ತಿಳಿಸಿದರು. ಸಹಕಾರ ಹಾಗೂ ರಾಷ್ಟ್ರೀಕೃತ ಬ್ಯಾಂಕುಗಳಲ್ಲಿನ ಒಟ್ಟು 10.50 ಲಕ್ಷ ರೈತರ ಸಾಲ ಮನ್ನಾಗೆ 4163 ಕೋಟಿ ರೂ. ಬಿಡುಗಡೆ ಮಾಡಲಾಗಿದೆ. ಪ್ರತಿವಾರ ಸಾಲಮನ್ನಾ ಕುರಿತು ಮಾಹಿತಿ ವೆಬ್‌ಸೈಟ್‌ಗೆ ಅಪ್‌ಡೇಟ್‌ ಮಾಡಲಾಗುತ್ತಿದೆ ಎಂದರು.