17 ಸಾವಿರ ರೈತರಿಗೆ ಇನ್ನೂ ಸಿಕ್ಕಿಲ್ಲ ಮುಂಗಾರು ಬೆಳೆವಿಮೆ

ಕಲಬುರಗಿ: ಕಳೆದ 2015-16ನೇ ಸಾಲಿನ ಮುಂಗಾರು ಬೆಳೆಹಾನಿಗೆಂದು ಜಿಲ್ಲೆಯ 1.05 ಲಕ್ಷ ರೈತರಿಗೆ 2016ರ ಮೇ  ತಿಂಗಳಲ್ಲಿ ಮಂಜೂರಾಗಿರುವ 197 ಕೋ.ರೂ ಬೆಳೆವಿಮೆ ಪರಿಹಾರ ಇನ್ನೂ ಜಿಲ್ಲೆಯ 17 ಸಾವಿರ ರೈತರಿಗೆ ಪಾವತಿಯಾಗಿಲ್ಲ. ಹೀಗಾಗಿ 17 ಸಾವಿರ ರೈತರು ಬ್ಯಾಂಕ್‌ ಹಾಗೂ ಕೃಷಿ ಇಲಾಖೆ ಅಲೆದು-ಅಲೆದು ಸುಸ್ತಾಗಿದ್ದಾರೆ. ಮುಂಗಾರು ಹಂಗಾಮಿನ ತೊಗರಿ ಬೆಳೆ ಹಾನಿಗೆ ಕಳೆದ ಮೇ ಮಾಸಾಂತ್ಯದಲ್ಲಿಯೇ ಜಿಲ್ಲೆಗೆ 197 ಕೋಟಿ ರೂ. ಮಂಜೂರಾಗಿತ್ತು. 

ರೈತರು ಎರಡು ಕಡೆ ವಿಮೆ ಮಾಡಿಸಿದ್ದಾರೆಂದು ಇಲ್ಲದ ಆಕ್ಷೇಪ ಎತ್ತಿ ವಿನಾಕಾರಣ ತನಿಖೆಯನ್ನು ಐದು ತಿಂಗಳು ನಡೆಸಿ ಒಂದು, ಎರಡುಹಾಗೂ ಮೂರು ಪಟ್ಟಿ ಸಿದ್ಧಪಡಿಸಿ ಡಿಸೆಂಬರ್‌ ಮೊದಲ ವಾರದಲ್ಲಿ ಮೊದಲ ಪಟ್ಟಿ ರೈತರಿಗೆ ಮಾತ್ರ ರೈತರ ಖಾತೆಗಳಿಗೆ ಹಣ ಬಿಡುಗಡೆ ಮಾಡಲಾಗಿ, ತದನಂತರ ಎರಡನೇ ಎರಡನೇ ಪಟ್ಟಿ ರೈತರಿಗೆ ಜನವರಿಯಲ್ಲಿ ಬಿಡುಗಡೆ ಮಾಡಲಾಗಿತ್ತು.

ಮೂರನೇ ಪಟ್ಟಿಯ ರೈತರಿಗೆ ಅಂದರೆ ಇನ್ನೂ ಶೇ. 30ರಷ್ಟು ರೈತರಿಗೆ ಬೆಳೆವಿಮೆ ಹಣ ನೀಡದೇ ಸತಾಯಿಸಲಾಗುತ್ತಿದೆ. ಮೂರನೇ ಪಟ್ಟಿಯಲ್ಲಿ 17ರಿಂದ 18 ಸಾವಿರ ರೈತರಿದ್ದಾರೆ. ರಾಜ್ಯದ ಇತರ ಜಿಲ್ಲೆಗಳ ರೈತರಿಗೆ ಜೂನ್‌ನಲ್ಲಿಯೇಬೆಳೆವಿಮೆ ಪರಿಹಾರ ಪಾವತಿಯಾಗಿದ್ದರೆ ಕಲಬುರಗಿ ರೈತರಿಗೆ ಇಲ್ಲದ ಆಕ್ಷೇಪ ಮುಂದೆ ಮಾಡಿ ನಾಲ್ಕು ತಿಂಗಳುಗಟ್ಟಲೇ ತನಿಖೆ ನಡೆಸಿ ಡಿಸೆಂಬರ್‌ ತಿಂಗಳಲ್ಲಿ ಪರಿಹಾರವನ್ನು ರೈತರ ಖಾತೆಗೆ ಜಮೆ ಮಾಡಲಾಯಿತು.

ಆದರೆ ಎಲ್ಲ ರೈತರಿಗೆ ವಿತರಿಸದೇ ಮೂರು ಪಟ್ಟಿ ಮಾಡಿದರು. ಎರಡು ಪಟ್ಟಿಯಲ್ಲಿನ ರೈತರಿಗೆ ಪರಿಹಾರ ದೊರಕಿದೆ. ಮೂರನೇ ಪಟ್ಟಿ ರೈತರಿಗೆ ಇನ್ನೂ ಬೆಳೆವಿಮೆ ಪರಿಹಾರ ದೊರಕಿಲ್ಲ. ಕಳೆದ 2015-16ನೇ ಸಾಲಿನ ಹಿಂಗಾರು ಹಂಗಾಮಿನ ಬೆಳೆವಿಮೆ 2017ರ ಜನೇವರಿ ತಿಂಗಳಿನ ಮೊದಲ ವಾರದಲ್ಲಿ ಮಂಜೂರಾಗಿದ್ದು, ಕಲಬುರಗಿ ಜಿಲ್ಲೆಗೆ ಮಂಜೂರಾಗಿದ್ದ 34.6 ಕೋಟಿ ರೂ. ಈಗಾಗಲೇ ರೈತರ ಖಾತೆಗಳಿಗೆ ಸದ್ದಿಲ್ಲದೇ ಜಮಾ ಆಗಿದೆ. ಆದರೆ ಮುಂಗಾರು ಹಂಗಾಮಿನ ಇನ್ನೂ 17ರಿಂದ 18 ಸಾವಿರ ರೈತರಿಗೆ ಜಮಾ ಆಗುತ್ತಿಲ್ಲ. 

ಅತಿವೃಷ್ಟಿ ಹಾನಿ ಪರಿಹಾರ ಮರೀಚಿಕೆ: ಕಳೆದ ಸೆಪ್ಟೆಂಬರ್‌ ಮಾಸಾಂತ್ಯದಲ್ಲಿ ಕಲಬುರಗಿ ಹಾಗೂ ಬೀದರ್‌ ಜಿಲ್ಲೆಯಲ್ಲಿ ಅತಿವೃಷ್ಟಿಯಿಂದಾಗಿ ಹಾನಿಗೀಡಾಗಿರುವ ಬೆಳೆ ಹಾನಿಗೆ ಈಗ ಪರಿಹಾರ ದೊರೆಯವುದು ಮರೀಚಿಕೆ ಎಂಬುದು ಮೇಲ್ನೋಟಕ್ಕೆಕಂಡು ಬರುತ್ತಿದೆ. ಏಕೆಂದರೆ ರಾಜ್ಯದಲ್ಲಿನ ಪ್ರಸಕ್ತ ಸಾಲಿನ ಬರಗಾಲ ಹಾನಿಗೆಂದು ಕೇಂದ್ರ ಸರ್ಕಾರ ಇತ್ತೀಚೆಗೆ 1784 ಕೋಟಿ ರೂ. ರಾಜ್ಯಕ್ಕೆ ಮಂಜೂರು ಮಾಡಿ 450 ಕೋಟಿ ರೂ. ಬಿಡುಗಡೆ ಮಾಡಿದೆ.

ಈ ಹಣ 11 ಜಿಲ್ಲೆಗಳಲ್ಲಿನ ಬರಗಾಲ ಪೀಡಿತ ರೈತರಿಗೆ ವಿತರಿಸಲು   ರಾಜ್ಯ ಸರ್ಕಾರ ಮುಂದಾಗಿದೆ. ಆದರೆ ಇದರಲ್ಲಿ ಕಲಬುರಗಿ-ಬೀದರ್‌ ಜಿಲ್ಲೆಯಲ್ಲಿ ಅತಿವೃಷ್ಟಿ ಹಾನಿಯಾದ ಬೆಳೆಗೆ ಪರಿಹಾರ ನೀಡಲಿಕ್ಕೆ ಬಾರದು. ಅತಿವೃಷ್ಟಿ ಹಾನಿಗೆ ಪರಿಹಾರವನ್ನು ಕೇಂದ್ರದಿಂದ ಬಿಡುಗಡೆಯಾಗಿ ಬಂದ ನಂತರವಷ್ಟೇ ವಿತರಿಸುವುದಾಗಿ ರಾಜ್ಯ ಸರ್ಕಾರ ಹೇಳುತ್ತಿದೆ. ಕೇಂದ್ರದಿಂದ ಸದ್ಯಕ್ಕೆ ಕಲಬುರಗಿ-ಬೀದರ್‌ ರೈತರಿಗೆ ಬೆಳೆಹಾನಿಗೆ ಪರಿಹಾರ ಬಿಡುಗಡೆಯಾಗುವ ಯಾವುದೇ ಲಕ್ಷಣಗಳಿಲ್ಲ.

ಈ ಹಿನ್ನೆಲೆಯಲ್ಲಿಯೇ ಪರಿಹಾರ ದೊರೆಯುವುದು ಅನುಮಾನವೆಂದೇ ಹೇಳಲಾಗುತ್ತಿದೆ. ಕಳೆದ ಡಿಸೆಂಬರ್‌ 15ರಂದು ಕಲಬುರಗಿ-ಬೀದರ್‌ ಜಿಲ್ಲೆಯಲ್ಲಿನ ಅತಿವೃಷ್ಟಿ ಹಾನಿಗೆಂದು ಕೇಂದ್ರ ಗೃಹ ಖಾತೆಯಜಂಟಿ ಕಾರ್ಯದರ್ಶಿ ಬೀನಾ ಪ್ರಸಾದ್‌ ನೇತೃತ್ವದ ಹಾಗೂ ಕೃಷಿ ಇಲಾಖೆಯ ಎಸ್‌.ಎಂ. ಕೋಹಲಟ್ಕರ್‌, ಹಣಕಾಸು ಇಲಾಖೆಯ ಸಲಹೆಗಾರ ದೀನಾನಾಥ, ಕೇಂದ್ರ ಜಲ ಆಯೋಗದ ನಿರ್ದೇಶಕ (ಉಸ್ತುವಾರಿ) ಪಂಕಜ್‌ಕುಮಾರ ಶರ್ಮಾ, ಗ್ರಾಮೀಣಾಭಿವೃದ್ಧಿ ಇಲಾಖೆ ಅಧೀನ ಕಾರ್ಯದರ್ಶಿ ನೀತಾ ತಹಲಿಯಾನಿ ಹಾಗೂ ಗೃಹ ಇಲಾಖೆ ಉಪ ಕಾರ್ಯದರ್ಶಿ ರೀನಾ ಗುಹಾ ಸದಸ್ಯರನ್ನೊಳಗೊಂಡ ತಂಡ ಭೇಟಿ ನೀಡಿ ಪರಿಶೀಲಿಸಿದೆ. 

ಈ ತಂಡ ವರದಿ ನೀಡಿದೆಯಾದರೂ ರಾಜ್ಯ ಸರ್ಕಾರದಿಂದಯಾವುದೇ ಒತ್ತಾಯ ಹೋಗಿಲ್ಲ. ಪ್ರಸಕ್ತ ವರ್ಷ ರಾಜ್ಯದಾದ್ಯಂತ ಬರಗಾಲ ಬಿದ್ದಿದೆಯಾದರೂ ಕಳೆದ ಸೆಪ್ಟೆಂಬರ್‌ ಮಾಸಾಂತ್ಯದಲ್ಲಿ ಕಲಬುರಗಿ-ಬೀದರ್‌ ಜಿಲ್ಲೆಯಲ್ಲಿ ಮಾತ್ರ ಅತಿವೃಷ್ಟಿ ಉಂಟಾಗಿ ಕಲಬುರಗಿ ಜಿಲ್ಲೆಯಲ್ಲಿ ಕೇಂದ್ರ ಪ್ರಕೃತಿ ವಿಕೋಪ ನಿಧಿ ನಿಯಮಾವಳಿ ಪ್ರಕಾರವೇ 62 ಕೋಟಿ ರೂ ಬೆಳೆಹಾನಿಯಾಗಿದೆ. ಅದೇ ರೀತಿ ಬೀದರ್‌ ಜಿಲ್ಲೆಯಲ್ಲಿ 195 ಕೋಟಿ ರೂ. ಬೆಳೆ ಹಾನಿಯಾಗಿದೆ.

ಇದಕ್ಕೆ ಪರಿಹಾರ ಯಾವಾಗ? ಎಂಬುದೇ ಪ್ರಶ್ನೆಯಾಗಿದ್ದು, ಎಲ್ಲ ಪರಿಸ್ಥಿತಿಗಳನ್ನು ಅವಲೋಕಿಸಿದರೆ ಅತಿವೃಷ್ಟಿ ಹಾನಿಯಿಂದಾದ ಬೆಳೆಗೆ ಪರಿಹಾರ ದೊರಕುವುದು ಗಗನಕುಸುಮ ಎನ್ನುವಂತೆ ಕಾಣುತ್ತಿದೆ. 17ರಿಂದ 18 ಸಾವಿರ ರೈತರಿಗೆ ಇನ್ನೂ ಯಾವಾಗ ಬೆಳೆವಿಮೆಪಾವತಿಯಾಗುತ್ತದೆ ಎಂದು ಸಂಬಂಧಪಟ್ಟವರನ್ನು ಕೇಳಿದರೆ ಹಾರಿಕೆ ಉತ್ತರವೇ ಸಿಗುತ್ತಿದೆ. ಒಂದೇಡೆ ಬೆಳೆದ ಬೆಳೆಗಳಿಗೆ ಮಾರುಕಟ್ಟೆಯಲ್ಲಿ ಸೂಕ್ತ ಬೆಲೆ ಸಿಗುತ್ತಿಲ್ಲ. ಮತ್ತೂಂದೆಡೆ ಅತಿವೃಷ್ಟಿ ಹಾನಿಗೆ ಪರಿಹಾರ ದೊರಕುವ ಲಕ್ಷಣಗಳು ಕಂಡು ಬರುತ್ತಿಲ್ಲ. ಒಟ್ಟಾರೆ ಇದನ್ನೆಲ್ಲ ಅವಲೋಕಿಸಿದರೆ ರೈತರ ಗೋಳಿಗೆ ಪರಿಹಾರ ಹಾಗೂ ಕೊನೆ  ಇಲ್ಲವೇ? ಎನ್ನುವಂತಾಗಿದೆ.

* ಹಣಮಂತರಾವ ಭೈರಾಮಡಗಿ