ದಾವಣಗೆರೆಯಲ್ಲಿ ಮತ್ತೆ 14 ಸೋಂಕು ಪ್ರಕರಣಗಳು: ದಿನೇ ದಿನೇ ಏರುತ್ತಿದೆ ಸೋಂಕಿತರ ಸಂಖ್ಯೆ

ದಾವಣಗೆರೆ: ಜಿಲ್ಲೆಯಲ್ಲಿ ಮತ್ತೆ ಹದಿನಾಲ್ಕು ಮಂದಿಗೆ ಕೋವಿಡ್-19 ಸೋಂಕು ದೃಢಪಟ್ಟಿರುವ ಬಗ್ಗೆ ಶುಕ್ರವಾರ ರಾಜ್ಯ ಆರೋಗ್ಯ ಇಲಾಖೆ ಬಿಡುಗಡೆ ಮಾಡಿರುವ ಬುಲೆಟಿನ್ ತಿಳಿಸಿದೆ.

ಸೋಂಕಿತ (ರೋಗಿ ಸಂಖ್ಯೆ-533) ಸ್ಟಾಫ್ ನರ್ಸ್ ಸಂಪರ್ಕದ 10 ಮಂದಿ ಹಾಗೂ ಮೃತ (ರೋಗಿ ಸಂಖ್ಯೆ-556) ವಯೋವೃದ್ದನ ಸಂಪರ್ಕದ ನಾಲ್ವರಿಗೆ ಕೋವಿಡ್-19 ಸೋಂಕು ವ್ಯಾಪಿಸಿರುವುದು ಪತ್ತೆಯಾಗಿದೆ.

ಇಂದು ದೃಢಪಟ್ಟಿರುವ 14 ಪ್ರಕರಣಗಳಿಂದ ದಾವಣಗೆರೆಯಲ್ಲಿ ಕೋವಿಡ್-19 ಸೋಂಕಿತರ ಸಂಖ್ಯೆ 61ಕ್ಕೇರಿದಂತಾಗಿದೆ. ಎಲ್ಲಾ ಸೋಂಕಿತರೂ ಸಹ ದಾವಣಗೆರೆ ನಗರದವರೇ ಆಗಿದ್ದಾರೆ.

ರಾಜ್ಯದಲ್ಲಿ ಇಂದು ಒಟ್ಟು 45 ಕೋವಿಡ್-19 ಸೋಂಕು ಪ್ರಕರಣಗಳು ದೃಢವಾಗಿದೆ. ರಾಜ್ಯದಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 750 ತಲುಪಿದೆ. ಇವರಲ್ಲಿ 30 ಜನರು ಸಾವನ್ನಪ್ಪಿದ್ದಾರೆ. 371 ಜನರು ಗುಣಮುಖರಾಗಿ ಬಿಡುಗಡೆಯಾಗಿದ್ದಾರೆ.