ಫೈನಲ್‌ಗೆ ಪಾಸ್‌ ಆದ ಸ್ಟೆಫನೋಸ್‌ ಸಿಸಿಪಸ್‌

ಪ್ಯಾರಿಸ್‌ : ಗ್ರೀಸ್‌ನ ದೈತ್ಯ ಟೆನಿಸಿಗ ಸ್ಟೆಫನೋಸ್‌ ಸಿಸಿಪಸ್‌ ಮೊದಲ ಗ್ರ್ಯಾನ್ ಸ್ಲಾಮ್‌ ಫೈನಲ್‌ಗೆ ಪ್ರವೇಶ ಪಡೆದಿದ್ದಾರೆ. ಅವರು ಶುಕ್ರವಾರದ ಫ್ರೆಂಚ್‌ ಓಪನ್‌ ಸೆಮಿ ಫೈನಲ್‌ನಲ್ಲಿ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೇವ್‌ ವಿರುದ್ಧ 5 ಸೆಟ್‌ಗಳ ಕಾದಾಟದಲ್ಲಿ 6-3, 6-3, 4-6, 4-6, 6-3 ಅಂತರದ ಗೆಲುವು ಸಾಧಿಸಿ ಪ್ರಶಸ್ತಿ ಸುತ್ತಿಗೆ ಓಟ ಬೆಳೆಸಿದರು.

ರಫೆಲ್‌ ನಡಾಲ್‌-ನೊವಾಕ್‌ ಜೊಕೋವಿಕ್‌ ನಡುವಿನ ದ್ವಿತೀಯ ಸೆಮಿಫೈನಲ್‌ ವಿಜೇತರನ್ನು ರವಿವಾರದ ಫೈನಲ್‌ನಲ್ಲಿ ಸಿಸಿಪಸ್‌ ಎದುರಿಸಲಿದ್ದಾರೆ. ಕಳೆದ ಫ್ರೆಂಚ್‌ ಓಪನ್‌ನಲ್ಲಿ ಸೆಮಿ ತನಕ ಸಾಗಿದ್ದು ಸಿಸಿಪಸ್‌ ಅವರ ಅತ್ಯುತ್ತಮ ಸಾಧನೆಯಾಗಿತ್ತು. ಅಲ್ಲಿ 5 ಸೆಟ್‌ ಹೋರಾಟ ನಡೆಸಿ ಜೊಕೋಗೆ ಶರಣಾಗಿದ್ದರು. ಈ ಬಾರಿ ಇನ್ನೂ ಒಂದು ಮೆಟ್ಟಿಲು ಮೇಲೇರಿ ನಿಂತಿದ್ದಾರೆ.

ಗೆದ್ದರೆ ಜ್ವೆರೇವ್‌ ಪಾಲಿಗೆ ಇದು ದ್ವಿತೀಯ ಗ್ರ್ಯಾನ್ ಸ್ಲಾಮ್‌ ಫೈನಲ್‌ ಆಗುತ್ತಿತ್ತು. ಕಳೆದ ವರ್ಷ ಯುಎಸ್‌ ಓಪನ್‌ ಪ್ರಶಸ್ತಿ
ಸುತ್ತಿಗೆ ಲಗ್ಗೆ ಇರಿಸಿದ ಜ್ವೆರೇವ್‌ ಅಲ್ಲಿ ಥೀಮ್‌ ವಿರುದ್ಧ ಎಡವಿದ್ದರು.