ಆಸ್ಕರ್‌ಗೆ ಗಲ್ಲಿ ಬಾಯ್‌ ಅಧಿಕೃತ ಪ್ರವೇಶ

ನವದೆಹಲಿ: ಝೋಯಾ ಅಖ್ತರ್‌ ನಿರ್ದೇಶಿಸಿದ ಹಾಗೂ ರಣವೀರ್‌ ಸಿಂಗ್‌ ಮುಖ್ಯಭೂಮಿಕೆಯಲ್ಲಿ ನಟಿಸಿದ ಬಾಲಿವುಡ್‌ ಸಿನಿಮಾ ಗಲ್ಲಿ ಬಾಯ್‌ ಈ ಬಾರಿಯ ಆಸ್ಕರ್‌ ಪ್ರಶಸ್ತಿಗೆ ಅಧಿಕೃತ ಪ್ರವೇಶ ಪಡೆದಿದೆ. ಈ ಕುರಿತು ಫಿಲಂ ಫೆಡರೇಶನ್‌ ಆಫ್ ಇಂಡಿಯಾ ಘೋಷಣೆ ಮಾಡಿದ್ದು, ಒಟ್ಟು 52 ಸಿನಿಮಾಗಳು ಸ್ಪರ್ಧೆಯಲ್ಲಿದ್ದವು. ಗಲ್ಲಿ ಬಾಯ್‌ ಸಿನಿಮಾವನ್ನು ಅವಿರೋಧವಾಗಿ ಆಯ್ಕೆ ಮಾಡಲಾಗಿದೆ ಎಂದು ಎಫ್ಎಫ್ಐ ಕಾರ್ಯದರ್ಶಿ ಸುಪ್ರನ್‌ ಸೇನ್‌ ಹೇಳಿದ್ದಾರೆ.

ಈ ವರ್ಷದ ಆಸ್ಕರ್‌ ಪ್ರಶಸ್ತಿ ನಾಮನಿರ್ದೇಶನ ಸಮಿತಿಗೆ ನಟಿ ಹಾಗೂ ನಿರ್ಮಾಪಕಿ ಅಪರ್ಣಾ ಸೇನ್‌ ಮುಖ್ಯಸ್ಥೆಯಾಗಿದ್ದರು. ರಿತೇಶ್‌ ಸಿಧ್ವಾನಿ ಹಾಗೂ ಫ‌ರ್ಹಾನ್‌ ಅಖ್ತರ್‌ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದು, ರ್ಯಾಪರ್‌ ಆಗಿ ರಣವೀರ್‌ ಸಿಂಗ್‌ ನಟಿಸಿದ್ದಾರೆ. ಮುಂಬೈ ಸ್ಲಂನಲ್ಲಿ ಬೆಳೆದ ವ್ಯಕ್ತಿಯೊಬ್ಬ ಜನಪ್ರಿಯ ರ್ಯಾಪರ್‌ ಆಗುವ ಕಥೆಯನ್ನು ಈ ಸಿನಿಮಾ ಹೊಂದಿದೆ.

ಈಗಾಗಲೇ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ ಸಿನಿಮಾ ಆಸ್ಕರ್‌ ಪ್ರಶಸ್ತಿ ಬಾಚಿಕೊಳ್ಳುವ ನಿರೀಕ್ಷೆಯಲ್ಲಿದೆ.