ಕನ್ನಡ ಚಿತ್ರರಂಗದ ದೊಡ್ಮನೆಯ ಕುಡಿ, ರಾಘವೇಂದ್ರ ರಾಜಕುಮಾರ್‌ ಅವರ ಮಗ ಯುವ ರಾಜಕುಮಾರ್‌ ಅವರ ಎರಡನೇ ಸಿನಿಮಾ ಅನೌನ್ಸ್‌ ಆಗಿದೆ.
“ಯುವ’ ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಯುವ ರಾಜಕುಮಾರ್‌ ಹೆಜ್ಜೆ ಇಟ್ಟಿದ್ದರು. ಹೊಂಬಾಳೆ ನಿರ್ಮಾಣ ಹಾಗೂ ಸಂತೋಷ್‌ ಆನಂದರಾಮ್‌ ಅವರ ನಿರ್ದೇಶನದ ಈ ಚಿತ್ರ ಆರಂಭಿಕ ದಿನಗಳಲ್ಲಿ ಉತ್ತಮ ಪ್ರದರ್ಶನ ಕಂಡರೂ, ನಿರೀಕ್ಷಿತ ಪ್ರಮಾಣದಲ್ಲಿ ಯಶ ಕಾಣಲಿಲ್ಲ. ಈಗ ಎರಡನೇ ಸಿನಿಮಾ ಮೂಲಕ ಯುವ ತಮ್ಮ ಅದೃಷ್ಟ ಪರೀಕ್ಷೆಗೆ ಮುಂದಾಗಿದ್ದಾರೆ.
ರೋಹಿತ್‌ ಪದಕಿ ನಿರ್ದೇಶನದ ಈ ಚಿತ್ರಕ್ಕೆ ಮೂವರು ನಿರ್ಮಾಪಕರು ಹಣ ಹೂಡುತ್ತಿದ್ದಾರೆ. ಅಶ್ವಿ‌ನಿ ಪುನೀತ್‌ ರಾಜಕುಮಾರ್‌, ಜಯಣ್ಣ ಹಾಗೂ ಕೆಆರ್‌ಜಿ ಸಂಸ್ಥೆ ನಿರ್ಮಾಣದಲ್ಲಿ ಚಿತ್ರ ಮೂಡಿಬರುತ್ತಿದೆ. “ಪಾಪಗಳು ಎಂದಿಗೂ ಕೆಂಪಾಗಿರುವುದಿಲ್ಲ’ ಎಂಬ ಅಡಿಬರಹದ ಪೋಸ್ಟರ್‌ವೊಂದು ಇತ್ತೀಚೆಗೆ ಬಿಡುಗಡೆಯಾಗಿದೆ. ಚಿತ್ರದ ಶೀರ್ಷಿಕೆಯನ್ನು ನವೆಂಬರ್ 1ರಂದು ಬಿಡುಗಡೆಗೊಳಿಸುವುದಾಗಿ ಚಿತ್ರತಂಡ ಹೇಳಿಕೊಂಡಿದೆ. ಚಿತ್ರದ ನಾಯಕಿ ಹಾಗೂ ಉಳಿದ ಪಾತ್ರವರ್ಗ ಇನ್ನೂ ಅಂತಿಮವಾಗಬೇಕಿದೆ.
ತಮ್ಮ ಚೊಚ್ಚಲ ಸಿನಿಮಾದಲ್ಲಿ ಕಾಲೇಜು ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಯುವ, ಈ ಚಿತ್ರದಲ್ಲಿ ಲಾಂಗ್‌ ಹಿಡಿದಿದ್ದಾರೆ. ಮೇಲ್ನೋಟಕ್ಕೆ ಇದೊಂದು ರೌಡಿಸ್‌ಂ, ಮಾಸ್‌ ಸಿನಿಮಾ ಎಂದು ಅರಿವಾಗುತ್ತದೆ. ಈ ಮೂಲಕ ಯುವ ತಮ್ಮ ದೊಡ್ಡಪ್ಪ ಶಿವರಾಜ್‌ಕುಮಾರ್‌ ಅವರ ಹಾದಿ ಹಿಡಿದಿದ್ದಾರೆ. ಹೊಸ ಅವತಾರದಲ್ಲಿ ಯುವ ರಾಜಕುಮಾರ್‌ ಹೇಗೆ ಕಾಣಿಸಿಕೊಳ್ಳಲಿದ್ದಾರೆ ಎಂದು ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
ಅಶ್ವಿ‌ನಿ ಪುನೀತ್‌ ರಾಜಕುಮಾರ್‌ ಅವರು ತಮ್ಮ ಪಿಆರ್‌ಕೆ ಪ್ರೊಡಕ್ಷನ್ಸ್‌ ವತಿಯಿಂದ ಸ್ವತಂತ್ರ್ಯವಾಗಿ ನಿರ್ಮಿಸುತ್ತಿರುವ ಮೊದಲ ಸಿನಿಮಾವಿದು. ಈ ಮೊದಲು ಬಿಡುಗಡೆಗೊಂಡ ಎಲ್ಲ ಸಿನಿಮಾಗಳ ಕಥೆಯನ್ನು ನಟ ಪುನೀತ್‌ ಅವರು ಕೇಳಿ ಒಪ್ಪಿಗೆ ನೀಡಿದ್ದರು. ಈಗ ಅಶ್ವಿ‌ನಿ ಅವರೇ ಕಥೆ ಕೇಳಿ, ಒಪ್ಪಿ, ಹಣ ಹೂಡುತ್ತಿರುವ ಮೊದಲ ಸಿನಿಮಾ ಇದಾಗಲಿದೆ.
