ಚಿತ್ರರಂಗದಲ್ಲಿ ಯಾರೇ ಇರಲಿ, ಅವರಿಗೆ ಒಬ್ಬೊಬ್ಬರು ಸ್ಫೂರ್ತಿಯಾಗಿರುತ್ತಾರೆ. ಅವರ ಸ್ಫೂರ್ತಿಯಿಂದಲೇ ಇಂದು ನಾನು ಈ ಮಟ್ಟಕ್ಕೆ ಬಂದಿದ್ದೇನೆ ಎನ್ನುತ್ತಲೇ ತಮ್ಮ ಅನುಭವಗಳನ್ನು ಹಂಚಿಕೊಂಡಿರುವ ಉದಾಹರಣೆಗಳು ಬಹಳಷ್ಟಿವೆ. ಇಲ್ಲೀಗ ಸ್ಫೂರ್ತಿ ವಿಷಯ ಬಂದಿದ್ದು ಯಾಕೆಂದರೆ, ಗಾಯಕ ಕಮ್‌ ನಾಯಕ ಪೃಥ್ವಿರಾಜ್‌ ಅವರು ಡಾ.ವಿಷ್ಣುವರ್ಧನ್‌ ಅವರ ಸ್ಫೂರ್ತಿಯಿಂದ ತಾನೊಬ್ಬ ಗಾಯಕ, ನಾಯಕರಾಗಿದ್ದಾರೆ.
ಆ ಬಗ್ಗೆ ಹೇಳಿಕೊಳ್ಳುವ ಪೃಥ್ವಿರಾಜ್‌, “ನಾನು ಚಿಕ್ಕವನಿದ್ದಾಗಿಂದಲೂ ಡಾ.ವಿಷ್ಣುವರ್ಧನ್‌ ಅವರ ಅಭಿಮಾನಿ. ಒಂದೊಮ್ಮೆ ಅವರನ್ನು ಚಿಕ್ಕಂದಿನಲ್ಲಿ ಭೇಟಿಯಾದಾಗ ನೀನು ಗಾಯಕನಾಗು ಎಂದು ಪ್ರೇರಣೆ ನೀಡಿದ್ದರು. ಅದರಿಂದಲೇ ನಾನು ಈಗ “ಫಿದಾ’ ಹೆಸರಿನ ವಿಡಿಯೋ ಆಲ್ಬಂ ಸಾಂಗ್‌ ಮಾಡಿದ್ದೇನೆ. ಆ ಸಾಂಗ್‌ ಹಾಡಿರುವುದಷ್ಟೇ ಅಲ್ಲ, ನಾಯಕನಾಗಿ, ನಿರ್ಮಾಪಕನಾಗಿಯೂ ಗುರುತಿಸಿಕೊಂಡಿದ್ದೇನೆ ‘ ಎಂದು ವಿವರ ಕೊಟ್ಟರು ಪೃಥ್ವಿರಾಜ್‌.
ಇನ್ನು “ಫಿದಾ’ ಎಂಬುದು ಹಿಂದಿ ಭಾಷೆಯಲ್ಲವೇ ಎಂಬ ಪ್ರಶ್ನೆಯೂ ಇದೆ. ಅದು ಹಿಂದಿ ಭಾಷೆಯೂ ಹೌದು. ಆದರೆ, ಈ ಪದ ಕನ್ನಡದಲ್ಲೂ ಇದೆ ಎಂಬುದನ್ನು ಸಾಹಿತಿ ಜಯಂತ್‌ ಕಾಯ್ಕಿಣಿ ತಿಳಿಹೇಳಿದ್ದಾರೆ ಎಂಬುದು ಪೃಥ್ವಿರಾಜ್‌ ಮಾತು. ಅಂದಹಾಗೆ, “ಫಿದಾ’ ಈಗಿನ ಯೂಥ್ಸ್ಗೆ ಸಂಬಂಧಿಸಿದ ಆಲ್ಬಂ. ಇಲ್ಲಿ ಪ್ರೀತಿಗೊಂದು ವಿಶೇಷ ಅರ್ಥವಿದೆ.
ಈ ಪ್ರೀತಿಯ ಕಥೆಯಲ್ಲಿ ಹುಡುಗ-ಹುಡುಗಿಯ ಮೊದಲ ಭೇಟಿ, ಪರಿಚಯ. ಅವಳು ಪ್ರೀತಿಸುತಿದ್ದಾಳೆಂದು ತಪ್ಪಾಗಿ ತಿಳಿಯುವ ಹುಡುಗ, ನಂತರ ಆ ವಿಷಯವನ್ನು ಆಕೆಗೆ ತಿಳಿಸಲು ಹೋದಾಗ ಆಕೆ ಮದುವೆಗೆ ಆಹ್ವಾನ ನೀಡುವುದು. ಆರತಕ್ಷತೆಯಲ್ಲಿ ಅವನು ಹಾಡುವುದರೊಂದಿಗೆ ಮುಕ್ತಾಯ ಕಾಣುವಂತಹ ಅಂಶಗಳು ಈ ಆಲ್ಬಂ ಸಾಂಗ್‌ನಲ್ಲಿದೆ ಎಂಬುದು ಪೃಥ್ವಿರಾಜ್‌ ಮಾತು.
ಈ “ಫಿದಾ’ ಆಲ್ಬಂಗೆ ಸಾತ್ವಿಕಾ ಅಪ್ಪಯ್ಯ ನಾಯಕಿಯಾಗಿದ್ದಾರೆ. ಶ್ರೀಶ ಭಟ್‌ ನಿರ್ದೇಶನವಿದೆ. ವರುಣ್‌ ರಾಮಚಂದ್ರ-ಪೃಥ್ವಿರಾಜ್‌ ಸಂಗೀತವಿದೆ. ಯಶ್‌ರಾಥಿ ಛಾಯಾಗ್ರಹಣ ಮಾಡಿದರೆ, ಜತಿಂದರ್‌ ಮತ್ತು ಅಕ್ಷಯ್‌ ಆಲ್ಬಂ ಹಿಂದೆ ನಿಂತು ಕೆಲಸ ಮಾಡಿದ್ದಾರೆ. ಇನ್ನು,
“ನಿನ್ನ ಪರಿಚಯ…’ ಹಾಡಿಗೆ ಜಯಂತ್‌ಕಾಯ್ಕಣಿ ಪದ‌ಳನ್ನು ಪೋಣಿಸಿದ್ದಾರೆ. ಬೆಂಗಳೂರು, ಮೈಸೂರು ಇತರೆಡೆ ಚಿತ್ರೀಕರಿಸಲಾಗಿದೆ. ಈ “ಫಿದಾ’ ಆಲ್ಬಂ ಬಿಡುಗಡೆ ಮಾಡಿದ ನಟ, ನಿರ್ದೇಶಕ ಅನಿರುದ್ದ್ ತಂಡದ ಪರಿಶ್ರಮ ಶ್ಲಾಘಿಸಿದರು.
