Advertisement
ಬೆಳದಿಂಗಳ ಪರಿಮಳವೇ, ಇವತ್ತು ನನ್ನೊಳಗೆ ಹರಳುಗಟ್ಟಿರುವ ಒಲವನ್ನು ನಿನ್ನೆದುರಿಗೆ ನಿವೇದಿಸದೇ ಉಳಿಯಲಾರೆ ಅನ್ನಿಸಿಬಿಟ್ಟಿದೆ. ನೀ ಎಲ್ಲೇ ಇದ್ದರೂ , ಈ ಸಂಜೆ ಮುಗುಳ್ನಗೆಯೊಂದಿಗೆ ಹಾಜರಾಗುತ್ತೀಯೆಂದು ಒಳಮನಸು ಪದೇ ಪದೆ ಹೇಳುತ್ತಿದೆ. ಅಂಥ ಸಿಹಿಸುದ್ದಿಯನ್ನು ನಂಬದೇ ಹೇಗೆ ಉಳಿಯಲಿ ಹೇಳು? ನಿಂಗೊತ್ತಾ, ನನ್ನ ಬದುಕಿನ ಪಯಣದ ಹಾದಿ ನಿನ್ನಿಂದ ಬದಲಾಯಿತು. ಸದ್ದೇ ಮಾಡದೇ ಆವರಿಸುವ ಬೆಳದಿಂಗಳ ಬೆಳಕಿನಂಥವಳು ನೀನು. ಸಾವಿರಾರು ಮಾತುಗಳ ನಡುವೆ ಒಂದು ಕ್ಷಣದ ಮೌನಕ್ಕೆ ಅನೂಹ್ಯ ಅರ್ಥ ದಕ್ಕಿಬಿಡುವಂಥ ನಿನ್ನ ಕಣ್ಣೋಟ, ಹೇಳದೇ ಉಳಿದ ನೂರು ಮಾತುಗಳನ್ನು ಒಂದೇ ಕ್ಷಣದಲ್ಲಿ ಎದೆಯಾಳಕ್ಕೆ ತಲುಪಿಸಿಬಿಡುತ್ತದೆ. ರೇಜಿಗೆ ಹುಟ್ಟಿಸಿ, ಬೇಸರ ಆವರಿಸಿ, ಬೂದು ಬೆಳಕಿನ ಮಂಕು ಬಣ್ಣವನ್ನು ಹಗಲಿಗೆ ಸುರಿವ ಜಿಟಿ ಜಿಟಿ ಮಳೆಯಲ್ಲೂ, ನಿನ್ನ ನೆನಪುಗಳಿಗೆ ಚುರುಗುಡುವ ಎಳೆ ಬಿಸಿಲಿನ ಪ್ರಾಯ.
Related Articles
ನಗುವೇ ಸುಖದ ಹೂಬನ
ಬಂದು ಬಿಡು ಹುಡುಗಿ, ನನ್ನ ಎದೆಯೊಳಗೆ ನಿನಗಾಗಿ ಪುಟ್ಟ ಬೆಚ್ಚನೆಯ ಗೂಡೊಂದು ಕಾಯುತ್ತಿದೆ. ನನ್ನ ಮಾತುಗಳೆಲ್ಲವನ್ನೂ ನನ್ನ ಮೌನದಲ್ಲೇ ಬಲ್ಲವಳು ನೀನು. ಮಾತುಗಳಾಚೆಗಿನ ಒಲವನ್ನು ಅರಿಯಲಾರದದಷ್ಟು ದಡ್ಡಿಯಲ್ಲಾ ನೀನೆಂದು ಗೊತ್ತು. ಆದರೂ ನೀನು ಹಠವಾದಿ. ನನ್ನ ಅಂತರಾಳದ ಮೌನಕ್ಕೆ, ಮಾತಿನ ಮೂರ್ತರೂಪ ದಕ್ಕುವವರೆಗೆ ನೀನು ನನ್ನ ಒಲವಿನೆಡೆಗೆ ನಿಶ್ಚಲ ನಿಶ್ಚಲ. ಇನ್ನೆಷ್ಟು ದಿನ ಹೀಗೆ ಕಾಯಲಿ ಹುಡುಗಿ? ಮೋಡಗಟ್ಟಿದ ಬಾನು ಎಷ್ಟು ಭಾರ ತಡೆದೀತು ಹೇಳು? ಇವತ್ತು ನನ್ನ ಬದುಕಿಗೆ ಹೊಸ ಹಾದಿ ತೆರೆದುಕೊಳ್ಳುತ್ತದೆ. ಅದು ನೀ ಬರುವ ಹಾದಿಯಲ್ಲಿ.
Advertisement
ಮಾತಿನಲ್ಲಿ ಹೇಳಲಾರೆನುರೇಖೆಯಲ್ಲಿ ಗೀಚಲಾರೆನು
ಆದರೂನು ಹಾಡದೇನೆ ಉಳಿಯಲಾರೆನು ..
ನಿನ್ನವನು ಜೀವ ಮುಳ್ಳೂರು