ಯೆಸ್ ಬ್ಯಾಂಕ್ ಗ್ರಾಹಕರು ಡೆಬಿಟ್ ಕಾರ್ಡ್ ಬಳಸಿ ಹಣ ತೆಗೆಯಬಹುದು

ಮುಂಬಯಿ: ಯೆಸ್ ಬ್ಯಾಂಕ್ ವ್ಯವಹಾರ ಬಿಕ್ಕಟ್ಟು ಪರಿಸ್ಥಿತಿ ಮುಂದುವರಿದಿರುವಂತೆಯೇ ಬ್ಯಾಂಕಿನ ಆಡಳಿತ ನಿರ್ವಹಣೆಯನ್ನು ಆರ್.ಬಿ.ಐ. ಕೈಗೆತ್ತಿಕೊಂಡಿದೆ ಮತ್ತು ನಗದು ಹಿಂಪಡೆಯುವಿಕೆಗೆ ಮಿತಿಗಳನ್ನು ಹೇರಲಾಗಿದೆ.

ಈ ನಡುವೆ , ಯೆಸ್ ಬ್ಯಾಂಕಿನ ಗ್ರಾಹಕರು ತಾವು ಹೊಂದಿರುವ ಡೆಬಿಟ್ ಕಾರ್ಡ್ ಗಳ ಮೂಲಕ ಎಟಿಎಂಗಳಿಂದ ಹಣ ಪಡೆಯಬಹುದು ಎಂದು ಶನಿವಾರ ತಡರಾತ್ರಿ ಯೆಸ್ ಬ್ಯಾಂಕಿನ ಅಧಿಕೃತ ಟ್ವಿಟ್ಟರ್ ಖಾತೆ ಮೂಲಕ ತಿಳಿಸಲಾಗಿದೆ.

ತಿಂಗಳಿಗೆ ಗರಿಷ್ಠ 50 ಸಾವಿರ ರೂಪಾಯಿಗಳ ನಗದು ಹಿಂಪಡೆಯುವಿಕೆ ಮಿತಿಯನ್ನು ಯೆಸ್ ಬ್ಯಾಂಕ್ ಖಾತೆದಾರರಿಗೆ ರಿಸರ್ವ್ ಬ್ಯಾಂಕ್ ಹೇರಿದ ಬಳಿಕ ಆತಂಕಗೊಂಡ ಸಾವಿರಾರು ಗ್ರಾಹಕರು ತಮ್ಮ ಖಾತೆಯಲ್ಲಿರುವ ಹಣವನ್ನು ಹಿಂಪಡೆಯಲು ಎಟಿಎಂಗಳ ಮುಂದೆ ಸಾಲುಗಟ್ಟಿ ನಿಲ್ಲತೊಡಗಿದ್ದಾರೆ.

ಶುಕ್ರವಾರ ಸಾಯಂಕಾಲ 6 ಗಂಟೆಯಿಂದ ಜಾರಿಗೆ ಬಂದಿರುವ ರಿಸರ್ವ್ ಬ್ಯಾಂಕಿನ ಈ ನಿರ್ದೇಶನ ಮುಂದಿನ ತಿಂಗಳ 3ನೇ ತಾರೀಖಿನವರೆಗೆ ಜಾರಿಯಲ್ಲಿರುತ್ತದೆ.