ಮಲೇಷ್ಯಾ ಓಪನ್‌ ಬ್ಯಾಡ್ಮಿಂಟನ್‌: ಯಮಾಗುಚಿ, ಅಕ್ಸೆಲ್ಸೆನ್‌ ಜಯ

ಕೌಲಾಲಂಪುರ: ಜಪಾನ್‌ನ ಅಕಾನೆ ಯಮಾಗುಚಿ ಮತ್ತು ಡೆನ್ಮಾರ್ಕ್‌ನ ವಿಕ್ಟರ್‌ ಅಕ್ಸೆಲ್ಸೆನ್‌ ವರ್ಷಾ ರಂಭದ “ಮಲೇಷ್ಯಾ ಓಪನ್‌ ಸೂಪರ್‌ 1000 ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯ ಸಿಂಗಲ್ಸ್‌ ಪ್ರಶಸ್ತಿಯನ್ನು ತಮ್ಮದಾಗಿಸಿ ಕೊಂಡಿದ್ದಾರೆ.

ಹಾಲಿ ವಿಶ್ವ ಚಾಂಪಿಯನ್‌ ಆಗಿರುವ ಅಕಾನೆ ಯಮಾಗುಚಿ ವಿಶ್ವದ 4ನೇ ರ್‍ಯಾಂಕಿಂಗ್‌ ಆಟಗಾರ್ತಿ, ದಕ್ಷಿಣ ಕೊರಿಯಾದ ಆ್ಯನ್‌ ಸೆ ಯಂಗ್‌ ವಿರುದ್ಧ 12-21, 21-19, 21-11 ಅಂತರದ ಗೆಲುವು ಸಾಧಿಸಿದರು.

ಮೊದಲ ಗೇಮ್‌ ಕಳೆದುಕೊಂಡ ಯಮಾಗುಚಿ, ದ್ವಿತೀಯ ಗೇಮ್‌ನಲ್ಲೂ ಸೋಲಿನಂಚಿಗೆ ಬಂದಿದ್ದರು. ಆದರೆ ಅದೃಷ್ಟ ಅವರ ಪರವಾಗಿತ್ತು. ಇದು 2017ರಲ್ಲಿ “ಚೀನ ಓಪನ್‌’ ಚಾಂಪಿಯನ್‌ ಎನಿಸಿಕೊಂಡ ಬಳಿಕ ಯಮಾಗುಚಿ ಗೆದ್ದ ಮೊದಲ ಸೂಪರ್‌ ಸೀರಿಸ್‌ ಪ್ರಶಸ್ತಿ ಆಗಿದೆ.

3ನೇ ಮಲೇಷ್ಯಾ ಕಿರೀಟ
ಪುರುಷರ ಸಿಂಗಲ್ಸ್‌ ಫೈನಲ್‌ ಎನ್ನುವುದು ಕಳೆದ ತಿಂಗಳ “ವರ್ಲ್ಡ್ ಟೂರ್‌ ಫೈನಲ್ಸ್‌’ನ ಪುನರಾವರ್ತನೆ ಆಗಿತ್ತು. ಹಾಲಿ ಒಲಿಂಪಿಕ್‌ ಹಾಗೂ ವಿಶ್ವ ಚಾಂಪಿಯನ್‌ ಕೂಡ ಆಗಿರುವ ವಿಕ್ಟರ್‌ ಅಕ್ಸೆಲ್ಸೆನ್‌, ಜಪಾನ್‌ನ ಯುವ ಆಟಗಾರ ಕೊಡೈ ನರವೋಕ ಅವರನ್ನು 40 ನಿಮಿಷಗಳ ಕಾದಾಟದ ಬಳಿಕ 21-6, 21-15 ಅಂತರದಿಂದ ಪರಾಭವ ಗೊಳಿಸಿದರು. ಇದು ಅಕ್ಸೆಲ್ಸೆನ್‌ ಪಾಲಾದ 9ನೇ ಸೂಪರ್‌ ಸೀರಿಸ್‌ ಪ್ರಶಸ್ತಿ.