ಶರಣರ ವಚನ ಸಾಹಿತ್ಯ ಜೀವನಕ್ಕೆ ದಾರಿದೀಪ: ಸ್ವಾಮೀಜಿ

ಯಾದಗಿರಿ: 12ನೇ ಶತಮಾನದ ಶರಣರ ವಚನ ಸಾಹಿತ್ಯ ಎಂದೆಂದಿಗೂ ಮಾನವ ಜೀವನಕ್ಕೆ ದಾರಿ ದೀಪವಿದ್ದಂತೆ ಎಂದು ಗುರುಮಠಕಲ್ ಖಾಸಾ ಮಠದ ಪೀಠಾಧಿಪತಿ ಶಾಂತವೀರ ಗುರುಮುರುಘರಾಜೇಂದ್ರ ಸ್ವಾಮೀಜಿ ಹೇಳಿದರು.

ರವಿವಾರ ನಗರದ ಬಸವೇಶ್ವರ ಕಲ್ಯಾಣ ಮಂಟಪದಲ್ಲಿ ನಡೆದ ತರಳಬಾಳು ಜಗದ್ಗುರು ಶಾಖಾಮಠ ಸಾಣೇಹಳ್ಳಿ ಮಠದ ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಹಮ್ಮಿಕೊಂಡಿರುವ ಮತ್ತೆ ಕಲ್ಯಾಣ ಕಾರ್ಯಕ್ರಮ ನಿಮಿತ್ತ ನಡೆದ ಪೂರ್ವಭಾವಿ ಸಭೆಯಲ್ಲಿ ಅವರು ಮಾತನಾಡಿದರು.

ಪ್ರಸ್ತುತ ನಾವು ಸಮಾಜದಲ್ಲಿ ಜಾಗತೀಕರಣದ ಪರಿಣಾಮ ಹಲವಾರು ಬದಲಾವಣೆಗಳನ್ನು ಕಾಣುವ ಜೊತೆಗೆ ಪರಸ್ಪರ ಪ್ರೀತಿ, ವಿಶ್ವಾಸ, ಸಮಾನತೆ ಹಾಗೂ ಸಾಮರಸ್ಯ ಕಡಿಮೆಯಾಗುತ್ತಿರುವುದು ಒಳ್ಳೆಯ ಬೆಳವಣಿಗೆ ಅಲ್ಲ ಎಂದು ಅಭಿಪ್ರಾಯಪಟ್ಟರು. ಸಾಣೆಹಳ್ಳಿ ಶ್ರೀಗಳು ನಾಡಿಯಲ್ಲಿ ಸಮಾನತೆಯ ಸಾಮರಸ್ಯದ ಸದೃಢ ಸಮಾಜ ನಿರ್ಮಾಣ ಮಾಡುವ ಕನಸು ಹೊತ್ತು ಬಸವಾದಿ ಶರಣರ ವಿಚಾರಗಳನ್ನು ಜನತೆಗೆ ತಲುಪಿಸಲು ಜಾಗೃತಿ ಅಭಿಯಾನ ಕೈಗೊಂಡಿರುವುದು ಬದಲಾವಣೆಗೆ ಪ್ರೇರಣೆ ನೀಡಲಿದೆ ಎಂದರು.

ಇಂದು ನಾವೆಲ್ಲರೂ ಸಮಾಜದಲ್ಲಿ ಸಾಮರಸ್ಯದಿಂದ ಪರೋಪಕಾರಿಯಾಗಿ ಜೀವನ ನಡೆಸುವುದು ಅವಶ್ಯಕವಾಗಿದೆ. ನಮ್ಮ ಕಾಯಕದ ಜತೆ ದಾಸೋಹ ಪದ್ಧತಿಯನ್ನು ಮುಂದುವರಿಸಿಕೊಂಡು ಹೋಗುತ್ತಿರುವುದುದರಿಂದ ಇಲ್ಲಿರುವ ಮಠಮಾನ್ಯಗಳ ಮೌಲ್ಯ ಇನ್ನೂ ಉಳಿದಿದೆ ಎಂದು ಹೇಳಿದರು.

ಆಗಸ್ಟ್‌ 18ರಂದು ರವಿವಾರ ಮತ್ತೆ ಕಲ್ಯಾಣ ತಂಡದಿಂದ ಬೆಳಗ್ಗೆ 11:00 ಗಂಟೆಗೆ ನಗರದಲ್ಲಿ ಕಾಲೇಜು ವಿದ್ಯಾರ್ಥಿಗಳೊಂದಿಗೆ ಮುಕ್ತ ಸಂವಾದ ನಡೆಯಲಿದೆ. ಸಂಜೆ 5:00 ಗಂಟೆಗೆ ಪಂಡಿತಾರಾಧ್ಯ ಶ್ರೀಗಳು ಎಲ್ಲಾ ವರ್ಗದ ಜನರೊಂದಿಗೆ ಕೂಡಿ ಹಳೆ ಪ್ರವಾಸಿ ಮಂದಿರದಿಂದ ಬಸವೇಶ್ವರ ಕಲ್ಯಾಣ ಮಂಟಪದವರೆಗೆ ಸಾಮರಸ್ಯದ ನಡಿಗೆ ಕಾರ್ಯಕ್ರಮ ಜರುಗುವುದು.

ನಂತರ ಬಸವೇಶ್ವರ ಕಲ್ಯಾಣ ಮಂಟಪದಲ್ಲಿ ನಡೆಯುವ ಸಾರ್ವಜನಿಕ ಸಭೆಯಲ್ಲಿ ಸಮಕಾಲಿನ ಸಂದರ್ಭದಲ್ಲಿ ಶರಣರ ಪ್ರಸ್ತುತತೆ ಕುರಿತು ಬೆಳಗಾವಿ ಕಿತ್ತೂರ ರಾಣಿ ಚನ್ನಮ್ಮ ವಿಶ್ವವಿದ್ಯಾನಿಲಯದ ಕುಲಸಚಿವ ಡಾ| ರಂಗರಾಜ ವನದುರ್ಗ ಅವರಿಂದ ಉಪನ್ಯಾಸ, ಶರಣರ ಚಿಂತನೆಗಳು ಕುರಿತ ವಿಷಯ ಮೇಲೆ ಹಳಿಯಾಳದ ವಿಜಯ ಸಂದೇಶ ವಾರಪತ್ರಿಕೆಯ ಸಂಪಾದಕಿ ಸುಮಂಗಲಾ ಚಂದ್ರಕಾಂತ ಅಂಗಡಿ ಉಪನ್ಯಾಸ ನೀಡಲಿದ್ದಾರೆ. ಕಾರಣ ಜಿಲ್ಲೆಯ ಸಮಸ್ತ ಜನತೆ ಭಾಗವಹಿಸಬೇಕೆಂದು ಮನವಿ ಮಾಡಿದರು.

ಮಾಜಿ ಶಾಸಕ ಡಾ| ವೀರಬಸವಂತರೆಡ್ಡಿ ಮುದ್ನಾಳ ಮಾತನಾಡಿ, ಮತ್ತೆ ಕಲ್ಯಾಣ ಕಾರ್ಯಕ್ರಮದ ಜವಾಬ್ದಾರಿಯನ್ನು ನಾವೆಲ್ಲರೂ ತೆಗೆದುಕೊಂಡು ಎಲ್ಲರ ವಿಶ್ವಾಸ ಪಡೆದು ಸಾಮೂಹಿಕವಾಗಿ ಯಶಸ್ವಿಗೆ ಕೆಲಸ ಮಾಡಬೇಕು ಎಂದು ಹೇಳಿದರು.

ವಿಧಾನ ಪರಿಷತ ಮಾಜಿ ಸದಸ್ಯ ಚನ್ನಾರೆಡ್ಡಿ ಪಾಟೀಲ ತುನ್ನೂರು, ಮೌಲಾಲಿ ಅನಪೂರ, ಸ್ವಾಗತ ಸಮಿತಿ ಜಿಲ್ಲಾಧ್ಯಕ್ಷ ಸೋಮಶೇಖರ ಮಣ್ಣೂರ ಮಾತನಾಡಿದರು. ವೇದಿಕೆ ಮೇಲೆ ಡಾ| ಭಗವಂತ ಅನವಾರ, ಹನುಮಾನ ದಾಸ ಮುಂದಡಾ, ವೀರಣ್ಣ ರ್ಯಾಕಾ, ಗುಲಾಂ ಮಹಿಬೂಬ ಇದ್ದರು.

ಸಭೆಯಲ್ಲಿ ಶಾಂತಕುಮಾರ ಮಾಳಿಕೇರಿ, ಚನ್ನಪ್ಪಗೌಡ ಮೋಸಂಬಿ, ಶ್ರೀನಿವಾಸರೆಡ್ಡಿ ಪಾಟೀಲ ಚನ್ನೂರ, ಮುನಿಯಪ್ಪ ಭಾವಿಕಟ್ಟಿ, ವಿಶ್ವನಾಥರೆಡ್ಡಿ ಗೊಂದಡಗಿ, ವಿಶ್ವನಾಥ ಶಿರವಾರ, ಕೊಟ್ರೆಶ್ವರ ಸ್ವಾಮೀಜಿ, ಸಿದ್ದಣ್ಣ ಬಾಡದ್‌, ಇಂದೂಧರ ಸಿನ್ನೂರ, ಮರೆಪ್ಪ ಚಟ್ರೇಕರ್‌, ಮಹಾದೇವಪ್ಪ ಹೊಟ್ಟಿ, ವೆಂಕಣ್ಣ ಅಲೆಮನಿ, ಬಸಣ್ಣಗೌಡ ಕನ್ನೆಕೋಳುರ, ಸಿದ್ದಪಗೌಡ ರೋಟ್ನಡಗಿ, ಶೇಖರ ರ್ಯಾಖಾ, ಯಾಮರೆಡ್ಡಿ ಮುಂಡಾಸ್‌, ಡಾ| ಮರೆಪ್ಪ ವಡಿಗೇರಿ, ರಾಚಯ್ಯಸ್ವಾಮಿ ವಡಗೇರಿ, ತಿಪ್ಪಾರೆಡ್ಡಿ ಮಾಧ್ವಾರ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.