ಗಡೇ ದುರ್ಗಾದೇವಿಗೆ ಡಿಕೆಶಿ ಪತ್ರ

ಯಾದಗಿರಿ: ಇ.ಡಿ ಸಂಕಷ್ಟದಿಂದ ಪಾರು ಮಾಡುವಂತೆ ಮಾಜಿ ಸಚಿವ ಡಿ.ಕೆ.ಶಿವಕುಮಾರ ಜಿಲ್ಲೆಯ ವಡಗೇರಾ ತಾಲೂಕಿನ ಗೋನಾಲ ಗ್ರಾಮದ ಶಕ್ತಿ ದೇವತೆ ಗಡೇ ದುರ್ಗಾದೇವಿಗೆ ಪತ್ರ ಬರೆದಿದ್ದಾರೆ.

ಡಿಕೆಶಿ ತಾವು ಸ್ವತಃ ಬರೆದು ಕಳಿಸಿದ ಪತ್ರವನ್ನು ದುರ್ಗಾದೇವಿ ಪಾದಗಳಲ್ಲಿಟ್ಟು ಬೆಂಬಲಿಗರು ಶುಕ್ರವಾರ ರಾತ್ರಿ ವಿಶೇಷ ಪೂಜೆ ಸಲ್ಲಿಸಿದ್ದಾರೆ. ಪತ್ರದಲ್ಲಿ “ನಾನು ಡಿ.ಕೆ. ಶಿವಕುಮಾರ, ನನ್ನೆಲ್ಲ ಸಂಕಷ್ಟಗಳಿಂದ ಪಾರು ಮಾಡು ತಾಯಿ’ ಎಂದು ಬಿಳಿ ಹಾಳೆಯಲ್ಲಿ 5 ಬಾರಿ ಇಂಗ್ಲಿಷ್‌ನಲ್ಲಿ ಬರೆಯಲಾಗಿದೆ. ಡಿಕೆಶಿ ಸುಮಾರು ವರ್ಷಗಳಿಂದ ಗೋನಾಲ ದುರ್ಗೆಯ ಮೇಲೆ ಅಪಾರ ನಂಬಿಕೆಯಿಟ್ಟಿದ್ದು, ಸಮ್ಮಿಶ್ರ ಸರ್ಕಾರದಲ್ಲಿ ಸಚಿವರಾಗಿದ್ದಾಗ ಜಾತ್ರೆಗೆ ಬರುತ್ತೇನೆಂದಿದ್ದರು. ಆದರೆ, ಬಂದಿರಲಿಲ್ಲ. ಹಾಗಾಗಿ ಸಂಕಷ್ಟಗಳಿಗೆ ಸಿಲುಕಿದ್ದಾರೆ ಎಂದು ದೇವಿ ಅರ್ಚಕ ಮಹಾದೇವ ಪೂಜಾರಿ ಇ.ಡಿ ಪ್ರಕರಣಲ್ಲಿ ಬಂಧನವಾದಾಗ ಹೇಳಿದ್ದರು.

ಡಿಕೆಶಿ ಬರೆದು ಕಳಿಸಿದ ಪತ್ರವನ್ನು ಜಿಲ್ಲೆಯ ಮುಖಂಡ ಚನ್ನಾರೆಡ್ಡಿ ಪಾಟೀಲ್‌ ತುನ್ನೂರ ಹಾಗೂ ಇತರೆ ಮುಖಂಡರು ದೇವಿಯ ಸನ್ನಿಧಿಯಲ್ಲಿಟ್ಟು ಪೂಜೆ ಸಲ್ಲಿಸಿದ್ದು, ಇತ್ತೀಚೆಗಷ್ಟೇ ಅರ್ಚಕ ಮಹಾದೇವ ಪೂಜಾರಿ ಬೆಂಗಳೂರಿನ ಡಿಕೆಶಿ ಮನೆಗೆ ತೆರಳಿ ಸಂಕಷ್ಟಗಳಿಂದ ಪಾರಾಗುವಂತೆ ವಿಶೇಷ ಪೂಜೆ ಸಲ್ಲಿಸಿದ್ದರು ಎನ್ನಲಾಗಿದೆ. ದೇವಿ ಶಕ್ತಿ ಮಹಿಮೆ ಅಪಾರವಾಗಿದೆ. ಮುಂದಿನ ದಿನಗಳಲ್ಲಿ ಜಾತ್ರೆಗೆ ಆಗಮಿಸುವ ಕುರಿತು ಡಿಕೆಶಿ ಭರವಸೆ ನೀಡಿದ್ದಾರೆ ಎಂದು ಬೆಂಬಲಿಗರು ತಿಳಿಸಿದ್ದಾರೆ.