ಯಾದಗಿರಿ: ಮತ್ತೆ 7 ಜನರಿಗೆ ಸೋಂಕು

ಯಾದಗಿರಿ: ಜಿಲ್ಲೆಯಲ್ಲಿ ಕೋವಿಡ್ ಸೋಂಕಿತರ ಸಂಖ್ಯೆ ದಿನದಿಂದ ದಿನಕ್ಕೆ ಏರುತ್ತಿದ್ದು, ಗುರುವಾರ ಜಿಲ್ಲೆಯಲ್ಲಿ ಮತ್ತೆ 7 ಜನರಲ್ಲಿ ಸೋಂಕು ಪತ್ತೆಯಾಗಿದೆ. ಇದರೊಂದಿಗೆ ಸೋಂಕಿತರ ಸಂಖ್ಯೆ 956ಕ್ಕೆ ತಲುಪಿದೆ. ಆತಂಕಕಾರಿ ವಿಚಾರವೆಂದರೆ ಇಂದು ಸೋಂಕು ದೃಢಪಟ್ಟ 5 ಜನರ ಸೋಂಕಿನ ಸಂಪರ್ಕದ ಮೂಲವೇ ಪತ್ತೆಯಾಗಿಲ್ಲ.

ತೆಲಂಗಾಣದ ಹೈದರಾಬಾದ್‌ ಮೂಲದ ನಂಟು ಹೊಂದಿರುವ ಶಹಾಪುರ ತಾಲೂಕಿನ ನಾಯ್ಕಲ್‌ ಗ್ರಾಮದ 22 ವರ್ಷದ ಮಹಿಳೆ (ಪಿ-16826), ಹಾಲಭಾವಿಯ 60 ವರ್ಷದ ಮಹಿಳೆ (ಪಿ-16828) ಮಹಾರಾಷ್ಟ್ರದಿಂದ ಹಿಂತಿರುಗಿದ್ದಾರೆ. ಇವರನ್ನು ಹೊರತುಪಡಿಸಿ ಐದು ಜನ ತಾಲೂಕಿನ ಹತ್ತಿಕುಣಿ ಗ್ರಾಮದ 45 ವರ್ಷದ ಪುರುಷ (ಪಿ-16827), ಹೊನಗೇರಾ ಮೂಲದ ಯಾದಗಿರಿಯ ಬಸವೇಶ್ವರ ನಗರದ 16 ವರ್ಷದ ಯುವಕ (ಪಿ-16829) ಮತ್ತು 55 ವರ್ಷದ ಮಹಿಳೆ (ಪಿ-16830), ಗುರುಮಠಕಲ್‌ ತಾಲೂಕಿನ ಎಜೆಟಿ ಕಾಲೋನಿಯ 45 ವರ್ಷದ ಮಹಿಳೆ (ಪಿ-16831) ಹಾಗೂ ಯಾದಗಿರಿ ತಾಲೂಕಿನ ಕೂಡ್ಲೂರನ 30 ವರ್ಷದ ಪುರುಷ (ಪಿ-16832)ಗೆ ಸೋಂಕು ದೃಢವಾಗಿದ್ದು ಇವರ ಸಂಪರ್ಕ ಪತ್ತೆ ಹಚ್ಚಲಾಗುತ್ತಿದೆ. ಈವರೆಗೆ 854 ಸೋಂಕಿತರು ಗುಣಮುಖವಾಗಿದ್ದಾರೆ ಎಂದು ಜಿಲ್ಲಾಡಳಿತ ಪ್ರಕಟಣೆಯಲ್ಲಿ ತಿಳಿಸಿದೆ.

ಗುರುವಾರ ಹೊಸದಾಗಿ 296 ಜನರ ಮಾದರಿ ಸಂಗ್ರಹಿಸಿ ಕೋವಿಡ್‌-19 ಪರೀಕ್ಷೆಗೆ ಕಳುಹಿಸಲಾಗಿದ್ದು, ಒಟ್ಟು 967 ಜನರ ವರದಿ ಬರಬೇಕಿದೆ. ಸೋಂಕಿತರ ಪ್ರಾಥಮಿಕ ಸಂಪರ್ಕದ 1805 ಜನ, ದ್ವಿತೀಯ ಸಂಪರ್ಕದ 3069 ಜನರನ್ನು ಪ್ರತ್ಯೇಕವಾಗಿರಿಸಲಾಗಿದ್ದು, ಜಿಲ್ಲೆಯಲ್ಲಿ ಈವರೆಗೆ 24417 ಜನರ ವರದಿ ನೆಗೆಟಿವ್‌ ಬಂದಿದೆ