ನೀರಿಗೆ ಬರ : ಮನೆಯಿಂದಲೇ ಕೆಲಸ ಮಾಡಿ!

ಚೆನ್ನೈ: ಕಳೆದ 200 ದಿನಗಳಿಂದ ಮಳೆ ಬೀಳದ ಹಿನ್ನೆಲೆಯಲ್ಲಿ ಚೆನ್ನೈ ನಗರ ನೀರಿನ ತೀವ್ರಕ್ಷಾಮ ಎದುರಿಸುತ್ತಿದ್ದು, ಅದರ ಬಿಸಿ ಈಗ ಅಲ್ಲಿನ ಐಟಿ ವಲಯಕ್ಕೂ ತಟ್ಟಿದೆ. ಹಳೆ ಮಹಾಬಲಿಪುರಂ ರಸ್ತೆಯ (ಒಎಂಆರ್‌) ಪ್ರಾಂತ್ಯದಲ್ಲಿರುವ ಸುಮಾರು 12 ಐಟಿ ಕಂಪೆನಿಗಳು ತಮ್ಮ 5,000 ಉದ್ಯೋಗಿಗಳಿಗೆ ಮನೆಯಿಂದಲೇ ಕೆಲಸ ಮಾಡುವಂತೆ (ವರ್ಕ್‌ ಫ್ರಂ ಹೋಂ) ಸೂಚಿಸಿವೆ. ಮುಂದಿನ ಮೂರು ತಿಂಗಳವರೆಗೆ ಚೆನ್ನೈನಲ್ಲಿ ಮಳೆಯಾಗುವ ಯಾವುದೇ ಲಕ್ಷಣಗಳು ಕಾಣದಿರುವುದು ಈ ಕಂಪೆನಿಗಳನ್ನು ಕಂಗೆಡಿಸಿದೆ.

ಒಎಂಆರ್‌ ಪ್ರಾಂತ್ಯದಲ್ಲಿ ಸುಮಾರು 600 ಐಟಿ ಕಂಪೆನಿಗಳು ಕಾರ್ಯ ನಿರ್ವಹಿಸುತ್ತಿವೆ. ಇಲ್ಲಿನ ಹಲವಾರು ಕಂಪೆನಿಗಳು ಬಳಸಿದ ನೀರನ್ನೇ ಶುದ್ಧೀಕರಿಸಿ ಮರುಬಳಕೆ ಮಾಡು ತ್ತಿದ್ದರೂ, ಅದು ಕಚೇರಿಯ ಅಗತ್ಯದ ಕೇವಲ ಶೇ. 55ರಷ್ಟನ್ನು ಮಾತ್ರ ಪೂರೈಸುತ್ತಿದೆ. ಹಾಗಾಗಿ, ಕೆಲ ಕಂಪೆನಿಗಳು ಉದ್ಯೋಗಿಗಳಿಗೆ ಕೆಲವು ನಿಬಂಧನೆಗಳನ್ನು ಹೇರತೊಡಗಿವೆ. ಉದಾಹರಣೆಗೆ, “ಫೋರ್ಡ್‌ ಬ್ಯುಸಿನೆಸ್‌ ಸರ್ವೀಸಸ್‌’ ಕಂಪೆನಿ, ಉದ್ಯೋಗಿಗಳು ತಮ್ಮ ಕುಡಿಯುವ ನೀರನ್ನು ಮನೆಯಿಂದಲೇ ತರುವಂತೆ ಆದೇಶಿಸಿದೆ.