ಕೇಪ್‌ ಟೌನ್‌: ವನಿತಾ ಟಿ20 ವಿಶ್ವಕಪ್ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಕಣಕ್ಕಿಳಿಯುವ ಮೊದಲೇ ಭಾರತ ಆಘಾತವೊಂದಕ್ಕೆ ಸಿಲುಕಿದೆ. ತಂಡದ ಸ್ಟಾರ್‌ ಬ್ಯಾಟರ್‌, ಓಪನರ್‌ ಸ್ಮತಿ ಮಂಧನಾ ಪಾಕಿಸ್ಥಾನ ವಿರುದ್ಧದ ಮೊದಲ ಪಂದ್ಯದಲ್ಲಿ ಆಡುವುದು ಅನುಮಾನ ಎನ್ನಲಾಗಿದೆ.
ಅಭ್ಯಾಸ ಪಂದ್ಯದ ವೇಳೆ ಅನುಭವಿಸಿದ ಕೈ ಬೆರಳಿನ ನೋವು ವಾಸಿಯಾಗದಿರುವುದೇ ಇದಕ್ಕೆ ಕಾರಣ.
ಆಸ್ಟ್ರೇಲಿಯ ವಿರುದ್ಧ ಆಡಲಾದ ಅಭ್ಯಾಸ ಪಂದ್ಯದ ವೇಳೆ ಸ್ಮತಿ ಮಂಧನಾ ಅವರ ಎಡಗೈ ನಡುಬೆರಳಿಗೆ ಏಟು ಬಿದ್ದಿತ್ತು. ಈ ನೋವಿನಿಂದ ಅವರಿನ್ನೂ ಚೇತರಿಸಿಕೊಂಡಿಲ್ಲ.
ಕೌರ್‌ ಫಿಟ್‌ನೆಸ್‌ ಚಿಂತೆ
ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಅವರ ಫಿಟ್‌ನೆಸ್‌ ಕೂಡ ಚಿಂತೆಗೆ ಕಾರಣವಾಗಿದೆ. ದಕ್ಷಿಣ ಆಫ್ರಿಕಾ ಎದುರಿನ ತ್ರಿಕೋನ ಸರಣಿಯ ಫೈನಲ್‌ ವೇಳೆ ಅವರು ಭುಜದ ನೋವಿಗೆ ಒಳಗಾಗಿದ್ದರು. ಹೀಗಾಗಿ ಎರಡೂ ಅಭ್ಯಾಸ ಪಂದ್ಯಗಳಿಂದ ದೂರ ಉಳಿದಿದ್ದರು.
“ಸಮಸ್ಯೆ ಏನಿಲ್ಲ. ಸಾಕಷ್ಟು ವಿಶ್ರಾಂತಿ ಲಭಿಸಿದ್ದರಿಂದ ಆರಾಮದಿಂದಿದ್ದೇನೆ’ ಎಂದು ಕೌರ್‌ ಪ್ರತಿಕ್ರಿಯಿಸಿದ್ದಾರೆ.
