ಮಹಿಳಾ ರಾಷ್ಟ್ರೀಯ ಬಾಕ್ಸಿಂಗ್‌: ಪಂಜಾಬ್‌ ಪ್ರಾಬಲ್ಯ

ಬಳ್ಳಾರಿ: ಜಿಂದಾಲ್‌ನ ಇನ್ಸ್‌ಫೈರ್‌ ಇನ್ಸ್‌ಟಿಟ್ಯೂಟ್‌ ಆಫ್‌ ನ್ಪೋರ್ಟ್ಸ್ (ಐಐಎಸ್‌)ನಲ್ಲಿ ಆರಂಭವಾಗಿರುವ 3ನೇ ಎಲೈಟ್‌ ಮಹಿಳಾ ರಾಷ್ಟ್ರೀಯ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌ನಲ್ಲಿ ಚಂಡೀಗಢ, ದಿಲ್ಲಿ ಮತ್ತು ಪಂಜಾಬ್‌ ರಾಜ್ಯದ ಬಾಕ್ಸರ್‌ಗಳು ಶ್ರೇಷ್ಠ ನಿರ್ವಹಣೆ ನೀಡಿ ಗಮನ ಸೆಳೆದಿದ್ದಾರೆ.

54 ಕೆ.ಜಿ. ವಿಭಾಗದಲ್ಲಿ ದಿಲ್ಲಿಯ ರಿಯಾ ಟೊಕಾಸ್‌ ತಮಿಳುನಾಡಿನ ವಿ. ವಿನೋದಿನಿ ವಿರುದ್ಧ ಜಯ ಗಳಿಸಿದರು. ರಿಯಾ ಟೊಕಾಸ್‌ ಮುಂದಿನ ಸುತ್ತಿನಲ್ಲಿ ವಿಶ್ವ ಚಾಂಪಿಯನ್‌ಶಿಪ್‌ ಕ್ವಾರ್ಟರ್‌ ಫೈನಲಿಸ್ಟ್‌ ಮನೀಷಾ ಮೌನ್‌ ಅವರನ್ನು ಎದುರಿಸಲಿದ್ದಾರೆ. 

ಚಂಡೀಗಢದ ಸೊಹಿನಿ 69 ಕೆ.ಜಿ. ವಿಭಾಗದಲ್ಲಿ ತೆಲಂಗಾಣದ ಸಾಯಿಶ್ರೀ ರೆಡ್ಡಿ ವಿರುದ್ಧ ಸುಲಭ ಜಯ ಸಾಧಿಸಿದರು. 69 ಕೆ.ಜಿ. ವಿಭಾಗದಲ್ಲಿ ಕಣಕ್ಕಿಳಿದ ಉತ್ತರಾಖಂಡ್‌ನ‌ ಬಬಿತಾ ಬಿಷ್ಟ್  3-2 ಅಂತರದಿಂದ ರಾಜಸ್ಥಾನದ ಸುಮನ್‌ ಖೋಡಾ ವಿರುದ್ಧ ಗೆಲುವು ಸಾಧಿಸಿದರು. 60 ಕೆ.ಜಿ. ವಿಭಾಗದಲ್ಲಿ ಕರ್ನಾಟಕದ ಭವ್ಯಾ ಸಿಕ್ಕಿಂನ ಸೋಮ್‌ ಮಯಾ ಸುಬ್ಬ ವಿರುದ್ಧ 4-1 ಅಂತರದ ಗೆಲುವು ದಾಖಲಿಸಿದರು.