ಬೆಂಕಿ ಹಚ್ಚಿದ ಭಗ್ನ ಪ್ರೇಮಿ: ಟೆಕ್ಕಿ ಯುವತಿ ಬಲಿ 

ಚೆನ್ನೈ : ನಗರದ ಅಡಂಬಾಕಂ ಪ್ರದೇಶದಲ್ಲಿ ಮಂಗಳವಾರ ಭಗ್ನ ಪ್ರೇಮಿಯೊಬ್ಬ ಇಂಜಿನಿಯರ್‌ ಯುವತಿಯೊಬ್ಬಳನ್ನು ಪೆಟ್ರೋಲ್‌ ಸುರಿದು ಬೆಂಕಿ ಹಚ್ಚಿ ಕೊಲೆಗೈದಿದ್ದಾನೆ. ದುಷ್ಕರ್ಮಿಯ ದಾಳಿ ವೇಳೆ ಯುವತಿಯ ತಾಯಿ ಮತ್ತು ಸಹೋದರಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ. 

ಸಾಫ್ಟ್ವೇರ್‌ ಕಂಪೆನಿಯೊಂದರಲ್ಲಿ ಉದ್ಯೋಗಿಯಾಗಿದ್ದ ಸಿಂಧುಜಾ ಎಂಬ 22 ವರ್ಷದ ಟೆಕ್ಕಿ ಹತ್ಯೆಗೀಡಾದ ದುರ್ದೈವಿ. ಕೆಲ ಕಾಲದಿಂದ ಆಕೆಯ ಬೆನ್ನು ಬಿದ್ದಿದ್ದ ಸಹಪಾಠಿ ಆಕಾಶ್‌ ಎಂಬಾತ ಕೊಲೆ ಆರೋಪಿ.

ಪ್ರೀತಿ ನಿರಾಕರಿಸಿದ್ದರಿಂದ  ಕುಪಿತನಾಗಿದ್ದ ಆಕಾಶ್‌ ಸಿಂಧುಜಾ ಮನೆಗೆ ಬಂದಿದ್ದಾನೆ. ಸಿಂಧುಜಾ ಮಾತನಾಡಲು ನಿರಾಕರಿಸಿದಾಗ ತಾಯಿಯ ಬಳಿ ಬೇಡಿಕೊಂಡು ಮನೆಗೆ ಪ್ರವೇಶಿಸಿದ್ದಾನೆ. ಸಿಂಧುಜಾ ಬರುತ್ತಿದ್ದಂತೆ ಪೆಟ್ರೋಲ್‌ ಸುರಿದು ಬೆಂಕಿ ಹಚ್ಚಿಯೇ ಬಿಟ್ಟಿದ್ದಾನೆ. ರಕ್ಷಣೆಗೆ ಬಂದ ತಾಯಿ ರೇಣುಕಾ ಮತ್ತು ಸಹೋದರಿ ನಿವೇದಿಕಾ ಕೂಡ ಸುಟ್ಟ ಗಾಯಗಳಿಗೊಳಗಾಗಿದ್ದಾರೆ. 

ಘಟನೆ ಗಮನಕ್ಕೆ ಬರುತ್ತಿದ್ದಂತೆ ಸ್ಥಳೀಯರು ದೌಡಾಯಿಸಿ ಮೂವರನ್ನು ಕಿಲ್‌ಪೌಕ್‌ ಮೆಡಿಕಲ್‌ ಕಾಲೇಜು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ. ಚಿಕಿತ್ಸೆ ವೇಳೆ ಸಿಂಧುಜಾ ಕೊನೆಯುಸಿಳೆದಿದ್ದಾರೆ. 

 ಸಿಂಧುಜಾ ತಂದೆ ಷಣ್ಮುಗಂ ಅವರು ದುಬೈನಲ್ಲಿ ಉದ್ಯೋಗಿಯಾಗಿದ್ದಾರೆ. ಆರೋಪಿ ಆಕಾಶ್‌ ತಲೆ ಮರೆಸಿಕೊಂಡಿದ್ದು ಪೊಲೀಸರು ಶೋಧ ನಡೆಸುತ್ತಿದ್ದಾರೆ.