Belthangady ಮಗ ಆತ್ಮಹತ್ಯೆಗೈದ 12 ದಿನಗಳಲ್ಲಿ ತಂದೆಯೂ ನೇಣಿಗೆ ಶರಣು

ಬೆಳ್ತಂಗಡಿ: ಮಗ ಆತ್ಮಹತ್ಯೆ ಮಾಡಿಕೊಂಡ 13 ದಿನಕ್ಕೆ ತಂದೆ ಕೂಡ ನೇಣುಬಿಗಿದು ಆತ್ಮಹತ್ಯೆ ಮಾಡಿಕೊಂಡ ಘಟನೆ ಉಜಿರೆಯ ಪೆರ್ಲದಲ್ಲಿ ಜ. 16ರಂದು ನಡೆದಿದೆ.

ಇಲ್ಲಿನ ಪೆರ್ಲ ನಿವಾಸಿ ಯೋಗೀಶ್‌ ಪೂಜಾರಿ ಅವರ ಮಗ ಯಕ್ಷಿತ್‌ (14) ಜ. 4ರಂದು ಮನನೊಂದು ಮನೆಯೊಳಗೆ ನೇಣುಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದ. ಜ.14ರಂದು ಯಕ್ಷಿತ್‌ ಉತ್ತರಕ್ರಿಯೆ ನಡೆದಿತ್ತು. ಇದರ ಬೆನ್ನಲ್ಲೆ ಜ.16ರಂದು ಮನೆಯಲ್ಲಿಯೇ ತಂದೆ ಯೋಗೀಶ್‌ ಪೂಜಾರಿ (41) ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಮಗನ ಆತ್ಮಹತ್ಯೆಯಿಂದ ನೊಂದು ತಂದೆ ಕೂಡ ಆತ್ಮಹತ್ಯೆ ಮಾಡಿಕೊಂಡಿರುವ ಬಗ್ಗೆ ಶಂಕಿಸಲಾಗಿದೆ. ಬೆಳ್ತಂಗಡಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.