ವಿಂಬಲ್ಡನ್‌ ರದ್ದು : ಕ್ಲಬ್‌ಗ 100 ಮಿ. ಡಾಲರ್‌ ವಿಮಾ ಹಣ

ಲಂಡನ್‌: ಕೋವಿಡ್ 19 ವೈರಸ್‌ನಿಂದಾಗಿ 2020ರ ವಿಂಬಲ್ಡನ್‌ ಟೆನಿಸ್‌ ಕೂಟ ರದ್ದಾಗಿರಬಹುದು. ಆದರೆ ವಿಮಾ ಪಾಲಿಸಿಯಲ್ಲಿ ವೈರಸ್‌ಗೆ ಸಂಬಂಧಿಸಿದ ಷರತ್ತನ್ನು ಸೇರ್ಪಡೆಗೊಳಿಸಿದ್ದರಿಂದ ಆಲ್‌ ಇಂಗ್ಲೆಂಡ್‌ ಕ್ಲಬ್‌ ಇದೀಗ 100 ಮಿಲಿಯನ್‌ ಡಾಲರ್‌ ಮೊತ್ತವನ್ನು ಪಡೆಯುವ ಸಾಧ್ಯತೆಯಿದೆ.

ಈ ಬಾರಿಯ ವಿಂಬಲ್ಡನ್‌ ಕೂಟಕ್ಕಾಗಿ ಕ್ಲಬ್‌ 100 ಮಿ. ಡಾಲರ್‌ನ ವಿಮೆ ಮಾಡಿತ್ತು. ವಿಮೆ ಒಪ್ಪಂದದಲ್ಲಿ ಅಪಾಯಕಾರಿ ವೈರಸ್‌ನಿಂದ ಒಂದು ವೇಳೆ ವಿಂಬಲ್ಡನ್‌ ಕೂಟ ರದ್ದುಗೊಂಡರೆ 100 ಮಿ. ಡಾಲರ್‌ ನೀಡಬೇಕೆಂಬ ಷರತ್ತನ್ನು ವಿಧಿಸಿತ್ತು. ಇದೀಗ ಕ್ಲಬ್‌ ಈ ನಿಟ್ಟಿನಲ್ಲಿ ವಿಮೆ ಪರಿಹಾರ ಪಡೆಯುವ ಪ್ರಕ್ರಿಯೆ ಆರಂಭಿಸಿದೆ.