2,000 ರೂ. ನಗದು ದೇಣಿಗೆ ಜಾರಿ ಸಾಧ್ಯವೇ?

ಹೊಸದಿಲ್ಲಿ: ಕೇಂದ್ರ ಸರಕಾರದ ಚುನಾವಣಾ ಸುಧಾರಣಾ ನೀತಿಯಲ್ಲೊಂದಾದ 2,000 ರೂ. ಕ್ಯಾಶ್‌ ರೂಪದ ದೇಣಿಗೆ ಬಗ್ಗೆ ಕಾನೂನು ಮತ್ತು ಸಿಬಂದಿ ಇಲಾಖೆ ಮೇಲಿನ ಸಂಸದೀಯ ಸಮಿತಿ ಅನುಮಾನ ವ್ಯಕ್ತಪಡಿಸಿದೆ. ಇದು ವಾಸ್ತವತೆಗೆ ಹತ್ತಿರವಾಗಿದೆಯೇ ಎಂದೂ ಈ ಸಮಿತಿ ಪ್ರಶ್ನಿಸಿದೆ. 2,000 ರೂ.ಗಳವರೆಗೆ ನಗದು ರೂಪದಲ್ಲಿ ದೇಣಿಗೆ ನೀಡುವವರ ಗೌಪ್ಯತೆ ಕಾಪಾಡಿಕೊಳ್ಳಲು ಆಗುತ್ತದೆಯೇ ಎಂಬ ಬಗ್ಗೆಯೂ ಸಂದೇಹ ವ್ಯಕ್ತಪಡಿಸಿರುವ ಸಮಿತಿ, ಈ ಬಗ್ಗೆ ಎಲ್ಲ ರಾಷ್ಟ್ರೀಯ ಮತ್ತು ರಾಜ್ಯ ಮಟ್ಟದ ಪಕ್ಷಗಳಿಗೆ ಪ್ರಶ್ನಾವಳಿಯನ್ನು ಕಳುಹಿಸಿದೆ.

ದೇಶದ ಚುನಾವಣಾ ವ್ಯವಸ್ಥೆಯಲ್ಲಿ ಸುಧಾರಣೆ ತರುವ ಸಂಬಂಧ ಕೇಂದ್ರ ಸರಕಾರ ಕಳೆದ ಬಜೆಟ್‌ನಲ್ಲಿ ಎಲೆಕ್ಟೋರಲ್‌ ಬಾಂಡ್‌ ಅನ್ನು ಪರಿಚಯಿಸಿತ್ತು. ಅಲ್ಲದೆ ನಗದು ರೂಪದಲ್ಲಿ 2,000 ರೂ.ಗಳಿಗಿಂತ ಹೆಚ್ಚಿನ ದೇಣಿಗೆ ನೀಡುವಂತಿಲ್ಲ ಎಂಬ ಪ್ರಸ್ತಾವ ಇಟ್ಟಿತ್ತು. ಈ ಬಗ್ಗೆ ಸಂದೇಹ ವ್ಯಕ್ತಪಡಿಸಿರುವ ಈ ಸಂಸದೀಯ ಸಮಿತಿ, ಸದ್ಯದ ಹಣದುಬ್ಬರಕ್ಕೆ ಹೋಲಿಕೆ ಮಾಡಿದಲ್ಲಿ 2,000ದ ಮಿತಿ ಸಾಲುತ್ತದೆಯೇ ಎಂದು ಪ್ರಶ್ನಿಸಿರುವ ಅದು, ರಾಜಕೀಯ ಪಕ್ಷಗಳಿಂದ ಉತ್ತರ ಕೇಳಿದೆ.