ಗ್ರೆನೆಡಾ: ದಕ್ಷಿಣ ಆಫ್ರಿಕಾ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ ವೆಸ್ಟ್ ಇಂಡೀಸ್ ತಂಡ ಶುಭಾರಂಭ ಮಾಡಿದೆ. ಮೊದಲ ಟಿ20 ಪಂದ್ಯವನ್ನು ಎಂಟು ವಿಕೆಟ್ ಗಳ ಅಂತರದಿಂದ ಪೊಲಾರ್ಡ್ ಪಡೆ ಜಯಿಸಿದೆ.
ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ದಕ್ಷಿಣ ಆಫ್ರಿಕಾ ತಂಡ ನಿಗದಿತ 20 ಓವರ್ ಗಳಲ್ಲಿ ಆರು ವಿಕೆಟ್ ನಷ್ಟಕ್ಕೆ 160 ರನ್ ಗಳಿಸಿತು. ಕ್ವಿಂಟನ್ ಡಿ ಕಾಕ್ 37 ರನ್ ಗಳಿಸಿದರೆ, ನಾಯಕ ಬವುಮಾ 22 ರನ್ ಮಾಡಿದರು. ವಾನ್ ಡರ್ ಡ್ಯುಸನ್ 56 ರನ್ ಗಳಿಸಿದ್ದೇ ಹರಿಣಗಳ ಪಾಳಯದ ಹೆಚ್ಚಿನ ಗಳಿಕೆ. ಅನುಭವಿ ಕ್ಲಾಸನ್ ಮತ್ತು ಮಿಲ್ಲರ್ ವಿಫಲರಾದರು.
ವಿಂಡೀಸ್ ಪರವಾಗಿ ಫ್ಯಾಬಿಯನ್ ಅಲೆನ್ ಮತ್ತು ಬ್ರಾವೋ ತಲಾ ಎರಡು ವಿಕೆಟ್ ಪಡೆದರೆ, ಹೋಲ್ಡರ್ ಮತ್ತು ರಸ್ಸೆಲ್ ತಲಾ ಒಂದು ವಿಕೆಟ್ ಪಡೆದರು.
ಇದನ್ನೂ ಓದಿ:ಅರ್ಹತೆ ಪಡೆಯಲು ವಿಫಲರಾದ ನಾಲ್ಕು ಬಾರಿಯ ಒಲಿಂಪಿಕ್ಸ್‌ ಚಾಂಪಿಯನ್‌ ಮೋ ಫರಾ
ಗೆಲುವಿಗೆ 161 ರನ್ ಗುರಿ ಬೆನ್ನತ್ತಿದ್ದ ವೆಸ್ಟ್ ಇಂಡೀಸ್ ಗೆ ಆಂದ್ರೆ ಫ್ಲೆಚರ್ ಮತ್ತು ಎವಿನ್ ಲೂಯಿಸ್ ಭರ್ಜರಿ ಆರಂಭ ಒದಗಿಸಿದರು. ಲೂಯಿಸ್ ಕೇವಲ 35 ಎಸೆತದಲ್ಲಿ 71 ರನ್ ಗಳಿಸಿದರೆ, ಫ್ಲೆಚರ್ 30 ರನ್ ಗಳಿಸಿ ಔಟಾದರು. ನಂತರ ಬಂದ ಕ್ರಿಸ್ ಗೈಲ್ 32 ರನ್ ಗಳಿಸಿ ಅಜೇಯರಾದರೆ, ವರ್ಷಗಳ ಬಳಿಕ ರಾಷ್ಟ್ರೀಯ ಟಿ20 ತಂಡದಲ್ಲಿ ಆಡುತ್ತಿರುವ ರಸ್ಸೆಲ್ ಅಜೇಯ 23 ರನ್ ಚಚ್ಚಿದರು.
ವೆಸ್ಟ್ ಇಂಡೀಸ್ ತಂಡ ಎರಡು ವಿಕೆಟ್ ಕಳೆದುಕೊಂಡು ಕೇವಲ 15 ಓವರ್ ನಲ್ಲಿ 161 ರನ್ ಗಳಿಸಿ ಜಯ ಸಾಧಿಸಿತು. ವಿಂಡೀಸ್ ಆಟಗಾರರು ಬಾರಿಸಿದ್ದು ಕೇವಲ ಒಂಬತ್ತು ಬೌಂಡರಿ. ಆದರೆ 15 ಸಿಕ್ಸರ್ ಚಚ್ಚಿದ್ದರು.
