ದುರ್ಬಲರಲ್ಲ, ನಾವೀಗ ಸಬಲರು; ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ಸ್ಪಷ್ಟನೆ

ಹೊಸದಿಲ್ಲಿ: “ಭಾರತ ಈ ಹಿಂದೆ ಇದ್ದಂತೆ ಬಲಹೀನ ರಾಷ್ಟ್ರವಲ್ಲ. ಅದರ ಸೇನಾ ಶಕ್ತಿ ಈಗ ಅಗಾಧವಾಗಿ ಹೆಚ್ಚಾಗಿದೆ. ಆ ಶಕ್ತಿಯನ್ನು ಭಾರತ ತನ್ನ ರಕ್ಷಣೆಗಾಗಿಯೇ ಬಳಸುತ್ತದೆಯೇ ಹೊರತು, ಇತರ ರಾಷ್ಟ್ರಗಳನ್ನು ಕೆಣಕಲು ಎಂದೂ ಉಪಯೋಗಿಸುವುದಿಲ್ಲ’ ಎಂದು ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ತಿಳಿಸಿದ್ದಾರೆ.

ಜಮ್ಮು ಮತ್ತು ಕಾಶ್ಮೀರದಲ್ಲಿನ ಬಿಜೆಪಿ ಕಾರ್ಯಕರ್ತರು ಹಾಗೂ ಬೆಂಬಲಿಗರಿಗಾಗಿ ಆಯೋಜಿಸಲಾಗಿರುವ ವರ್ಚ್ಯುವಲ್‌ ರ್ಯಾಲಿಯಲ್ಲಿ ಪಾಲ್ಗೊಂಡು ಮಾತ ನಾಡಿದ ಅವರು, ಲಡಾಖ್‌ನಲ್ಲಿ ಇತ್ತೀಚೆಗೆ ಚೀನ ಸೇನೆಯಿಂದ ತೊಂದರೆ ಯಾಗು ತ್ತಿದ್ದರೂ ಅದರ ಬಗ್ಗೆ ಸರಕಾರ ವಿಪಕ್ಷಗಳಿಗೆ ಮಾಹಿತಿ, ಸ್ಪಷ್ಟನೆ ನೀಡುತ್ತಿಲ್ಲ ಎಂಬ ಟೀಕೆ ಗಳಿಗೂ ಉತ್ತರ ನೀಡಿದರು. “ಗಡಿಯಲ್ಲಿ ಇತ್ತೀಚೆಗೆ ಜರುಗಿದ ವಿದ್ಯ ಮಾನಗಳನ್ನು ಪ್ರತಿಪಕ್ಷಗಳಿಂದ ಹಾಗೂ ಈ ದೇಶದ ಸಂಸತ್ತಿನಿಂದ ಮುಚ್ಚಿಡುವಂಥ ಯಾವ ಉದ್ದೇಶವೂ ಸರಕಾರಕ್ಕಿಲ್ಲ. ಅಷ್ಟಕ್ಕೂ ರಾಷ್ಟ್ರೀಯ ಸುರಕ್ಷತೆಯ ವಿಚಾರದಲ್ಲಿ ಯಾವುದೇ ರಾಜಿಯಿಲ್ಲ. ಈ ರಾಷ್ಟ್ರದ ಘನತೆಯ ವಿಚಾರದಲ್ಲಿಯೂ ಯಾವುದೇ ರಾಜಿಯಿಲ್ಲ. ಹಾಗಾಗಿಯೇ, ಭಾರತ-ಚೀನ ನಡುವೆ ಇತ್ತೀಚೆಗೆ ಉಲ್ಪಣಿಸಿದ್ದ ಗಡಿ ವಿವಾದವನ್ನು ಸೇನೆ, ರಾಜ ತಾಂತ್ರಿಕ ಮಟ್ಟದ ಮಾತುಕತೆಗಳ ಮೂಲಕ ಬಗೆಹರಿಸಿ ಕೊಳ್ಳಲಾಗಿದೆ’ ಎಂದರು.

ದಶಕಗಳ ಗುರಿ ಸಾಧನೆ: ಜಮ್ಮು ಮತ್ತು ಕಾಶ್ಮೀರದ ವಿಶೇಷ ಸ್ಥಾನಮಾನ ರದ್ದು ಗೊಳಿಸಿದ ವಿಷಯವನ್ನು ಪ್ರಸ್ತಾವಿಸಿದ ಸಿಂಗ್‌, ಕೇಂದ್ರದಲ್ಲಿ ಅಧಿಕಾರಕ್ಕೆ ಬಂದಾಗಿನಿಂದ ಮೋದಿ ಸರಕಾರ ಒಂದಲ್ಲಾ ಒಂದು ಕ್ರಾಂತಿಕಾರಿ ನಿರ್ಧಾರಗಳನ್ನು ಕೈಗೊಂಡಿದೆ. ಅವುಗಳಲ್ಲಿ, ವಿಶೇಷ ಸ್ಥಾನ ಮಾನ ರದ್ದು ಗೊಳಿಸಿದ್ದೂ ಕೂಡ ಒಂದು. ಸಂವಿಧಾನದ 370ನೇ ವಿಧಿಯನ್ನು ಹಿಂಪಡೆಯುವ ಮೂಲಕ ವಿಶೇಷ ಸ್ಥಾನಮಾನ ಹಿಂಪಡೆ ಯುವ ಮೂಲಕ ಅಭಿವೃದ್ಧಿಗೆ ಶ್ರೀಕಾರ ಹಾಕಲಾಗಿದೆ. ಬಿಜೆಪಿಯು ಇನ್ನೂ ಜನಸಂಘ ಹೆಸರಿನಲ್ಲಿ ಕಾರ್ಯ ನಿರ್ವ ಹಿಸುತ್ತಿದ್ದಾಗಲೇ ವಿಶೇಷ ಸ್ಥಾನಮಾನ ಹಿಂಪಡೆಯುವ ವಿಚಾರವನ್ನು ಜನರಲ್ಲಿ ಪ್ರಸ್ತಾವಿಸಿತ್ತು ಎಂದರು.

ಅಭಿವೃದ್ಧಿ: ವಿಶೇಷ ಸ್ಥಾನಮಾನವನ್ನು ಹಿಂಪಡೆದಿದ್ದರಿಂದ ಕಣಿವೆ ರಾಜ್ಯ ಇನ್ನು ಅಭಿವೃದ್ಧಿಯ ಪಥದಲ್ಲಿ ಸಾಗಲಿದೆ. ಇನ್ನು ಕೆಲವೇ ವರ್ಷಗಳಲ್ಲಿ ಇಲ್ಲಿ ಮಹತ್ತರವಾದ ಬದಲಾವಣೆಗಳಾಗಲಿವೆ. ಮುಂದಿನ ದಿನಗಳಲ್ಲಿ ಇಲ್ಲಾಗುವ ಅಭಿವೃದ್ಧಿಯನ್ನು ಗಮನಿಸಿ, ಪಿಒಕೆ ಜನರೂ ತಮ್ಮನ್ನೂ ಭಾರತದ ಜಮ್ಮು ಮತ್ತು ಕಾಶ್ಮೀರದ ಭಾಗವಾಗಿಸಬೇಕೆಂಬ ಬೇಡಿಕೆ ಮುಂದಿಡಲಿದ್ದಾರೆ. ಅವರೂ ನಮ್ಮಲ್ಲಿ ಒಗ್ಗೂಡಿದರೆ, ನಮ್ಮ ಸಂವಿಧಾನದ ಆಶಯ ಪೂರ್ತಿಯಾಗುತ್ತದೆ ಎಂದು ಆಶಿಸಿದರು.

ನಿರ್ಧಾರದ ಬಗ್ಗೆ ಜಗತ್ತಿಗೇ ಸ್ಪಷ್ಟನೆ
ಕಾಶ್ಮೀರ ವಿಚಾರದಲ್ಲಿ ಅಂತಾರಾಷ್ಟ್ರೀಯ ಬೆಂಬಲ ಪಡೆಯುವಲ್ಲಿಯೂ ಮೋದಿಯವರು ಯಶಸ್ವಿಯಾಗಿದ್ದಾರೆ ಎಂದ ಸಿಂಗ್‌, ಈ ಹಿಂದೆ ಹಲವಾರು ರಾಷ್ಟ್ರಗಳು ಕಾಶ್ಮೀರ ವಿಚಾರ ಬಂದಾಗಲೆಲ್ಲಾ ಪಾಕಿಸ್ಥಾನದ ಬೆನ್ನಿಗೆ ನಿಲ್ಲುತ್ತಿದ್ದರು. ಆದರೆ, ಈ ಬಾರಿ, ವಿಶೇಷ ಸ್ಥಾನ ಮಾನ ರದ್ದುಗೊಳಿಸಿದಾಗ ಆ ಕೆಲಸದ ಹಿಂದಿನ ಸದುದ್ದೇಶವನ್ನು ಮೋದಿಯವರು ಜಗತ್ತಿನ ಎಲ್ಲಾ ರಾಷ್ಟ್ರಗಳಿಗೆ ಮನವರಿಕೆ ಮಾಡಿಕೊಟ್ಟಿದ್ದಾರೆ. ಹಾಗಾಗಿ, ಸಂವಿಧಾನದ 370ನೇ ವಿಧಿ ಹಿಂಪಡೆದಾಗ ಜಗತ್ತಿನ ಯಾವುದೇ ರಾಷ್ಟ್ರದಿಂದ ವಿರೋಧ ಬರಲಿಲ್ಲ ಎಂದು ಅವರು ತಿಳಿಸಿದರು.