WB passport scam: ನಾಲ್ವರು ಅಧಿಕಾರಿಗಳನ್ನು ಬಂಧಿಸಿದ ಸಿಬಿಐ

ನವದೆಹಲಿ: ನಕಲಿ ದಾಖಲೆಗಳನ್ನು ಆಧರಿಸಿ ನೇಪಾಳದ ನಾಗರಿಕರಿಗೆ ಪಾಸ್‌ಪೋರ್ಟ್‌ಗಳನ್ನು ವಿತರಿಸಿದ ದಂಧೆಗೆ ಸಂಬಂಧಿಸಿದಂತೆ ಕೋಲ್ಕತ್ತಾದ ಪ್ರಾದೇಶಿಕ ಪಾಸ್‌ಪೋರ್ಟ್ ಕಚೇರಿಯ ನಾಲ್ವರು ಅಧಿಕಾರಿಗಳನ್ನು ಸಿಬಿಐ ಬಂಧಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಬಂಧಿತ ಅಧಿಕಾರಿಗಳು – ಹಿರಿಯ ಪಾಸ್‌ಪೋರ್ಟ್ ಸಹಾಯಕರಾದ ಉತ್ತಮ್ ಕುಮಾರ್, ದೇಬಾಸಿಸ್ ಭಟ್ಟಾಚಾರ್ಯ , ನಿಶಿತ್ ಬರನ್ ಸಹಾ ಮತ್ತು ಸ್ಟೆನೋಗ್ರಾಫರ್ ಮನೀಶ್ ಕುಮಾರ್ ಗುಪ್ತಾ ಅವರನ್ನು ಇತ್ತೀಚೆಗೆ ಗ್ಯಾಂಗ್‌ಟಾಕ್‌ನ ವಿಶೇಷ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಗಿದ್ದು, ಅವರನ್ನು ಅ. 25 ರವರೆಗೆ ಸಿಬಿಐ ಕಸ್ಟಡಿಗೆ ನೀಡಲಾಗಿದೆ ಎಂದು ಅವರು ಹೇಳಿದರು.

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಂಸ್ಥೆಯು ಈ ಹಿಂದೆ ಇಬ್ಬರು ಆರ್‌ಪಿಒ ಅಧಿಕಾರಿಗಳು ಮತ್ತು ನಾಲ್ವರು ಏಜೆಂಟರನ್ನು ಬಂಧಿಸಿತ್ತು. ಅಧಿಕಾರಿಗಳು ದೊಡ್ಡ ಮೊತ್ತದ ಲಂಚ ಪಡೆದು ಬದಲಾಗಿ ನೇಪಾಳದ ನಾಗರಿಕರಿಗೆ ಎರಡು ತಿಂಗಳಲ್ಲಿ ಸ್ಥಳೀಯರು ಎಂದು ತೋರಿಸುವ ನಕಲಿ ಭಾರತೀಯ ಗುರುತಿನ ಚೀಟಿಗಳನ್ನು ತಯಾರಿಸಿ ಅವುಗಳ ಆಧಾರದ ಮೇಲೆ ನೇಪಾಳಿಗರಿಗೆ 60 ಪಾಸ್‌ಪೋರ್ಟ್ ಅರ್ಜಿಗಳನ್ನು ನೀಡುವ ದಂಧೆಯಲ್ಲಿ ಭಾಗಿಯಾಗಿದ್ದರು ಎಂದು ಆರೋಪಿಸಲಾಗಿದೆ.