ಬೇತಮಂಗಲ: ಜಿಲ್ಲೆಗೆ ಎರಡನೇ ಅತಿ ದೊಡ್ಡ ಕೆರೆಯಾದ ಬೇತ ಮಂಗಲ ಪಾಲಾರ್‌ ಕೆರೆಗೆ ಸುತ್ತಮುತ್ತಲಿನ ಕೆರೆಗಳ ಹಾಗೂ ರಾಜ ಕಾಲುವೆಗಳಿಂದ ನೀರು ಹರಿಯುತ್ತಿದ್ದು, ಎಲ್ಲರ ಚಿತ್ತ ಬೇತಮಂಗಲ ಕಡೆ ವಾಲಿದೆ.
ಗ್ರಾಮದ ಪಾಲಾರ್‌ ಕೆರೆಯು 1200ಕ್ಕೂ ಅಧಿಕ ಎಕರೆ ಪ್ರದೇಶ ಹೊಂದಿದ್ದು, ಈ ಕೆರೆ ಚೋಳರ ಕಾಲದಲ್ಲಿ ಕೆಜಿಎಫ್ ಮತ್ತು ಬೇತ ಮಂಗಲ ನಗರಕ್ಕೆ ಕುಡಿಯುವ ನೀರಿಗಾಗಿ ನಿರ್ಮಿಸಲಾಗಿದೆ. ಈ ಕೆರೆ ಒಮ್ಮೆ ತುಂಬಿದರೆ ಕನಿಷ್ಠ 5 ವರ್ಷ ಸಮೃದ್ಧಿಯಿಂದ ಜೀವನ ನಡೆಸುತ್ತಾರೆ.
ಇತ್ತೀಚೆಗೆ ಸತತವಾಗಿ ಮಳೆಯಾಗುತ್ತಿದ್ದು, ಸಣ್ಣ ಕುಂಟೆ, ಕೆರೆಗಳಿಗೆ ಬಹುತೇಕ ನೀರು ಹರಿದಿದ್ದು, ನಲ್ಲೂರು-ಕಳ್ಳಿಕುಪ್ಪ ಗ್ರಾಮದ ಕೆರೆಯ ಕೋಡಿ ಹರಿಯಲು ಕ್ಷಣಗಣನೆ ಶುರುವಾಗಿದೆ. ಈ ಕೆರೆಯ ಆಜು ಬಾಜು ನೀರು ಬೇತಮಂಗಲ ಕೆರೆಗೆ ಬೃಹತ್‌ ಪೈಪ್‌ಗ್ಳಿಂದ ಬರುತ್ತಿದ್ದು,ಸುತ್ತಮುತ್ತಲಿನ ಜನರು ಆಗಮಿಸಿ ಕಣ್ತುಂಬಿಕೊಳ್ಳುತ್ತಿದ್ದಾರೆ.ಬೇತಮಂಗಲ ಪಾಲಾರ್‌ ಕೆರೆ ದಶಕಗಳ ಹಿಂದೆ ಚಿಕ್ಕಬಳ್ಳಾಪುರ ಜಿಲ್ಲೆಯ ನಂದಿ ಬೆಟ್ಟದಿಂದ ಮೂಲಕ ಜಿಲ್ಲೆಯ ರಾಜಕಾಲುವೆಗಳಿಂದ ಈ ಬೇತಮಂಗಲ, ರಾಮಸಾಗರ ಪಾಲಾರ್‌ ಕೆರೆಗಳಿಗೆ ನೀರುಹರಿ ಯುತ್ತಿತ್ತು ಎಂಬ ಇತಿಹಾಸವಿದೆ. ಆದರೆ ಇತ್ತೀಚೆಗೆ ಕೆರೆ,ರಾಜಕಾಲುವೆಗಳು ಒತ್ತುವರಿಯಾದ ಹಿನ್ನೆಲೆ ನೀರು ಬರುತ್ತಿದ್ದ ನಾಲೆಗಳು ಕಣ್ಮರೆಯಾಗಿವೆ.
2017ರ ವರ್ಷಾಂತ್ಯದಲ್ಲಿ ಸುರಿದ ಮಳೆಯಿಂದ ಬೇತಮಂಗಲ ಕೆರೆ ಕೋಡಿ ಹರಿದಿತ್ತು. ಈ ಬಾರಿಯೂ ತುಂಬಿ ಹರಿಯುವ ಲಕ್ಷಣಗಳಿವೆ.ಬ್ರಿಟೀಷರ ಆಳ್ವಿಕೆ ದಿನಗಳಲ್ಲಿ ಈ ಬೇತಮಂಗಲ ಕೆರೆಯ ದಡದಲ್ಲೇ ಇರುವ ನಗರ ನೀರು ಸರಬರಾಜು ಮಂಡಳಿ ಕಚೇರಿ ಹಾಗೂ ಬೃಹತ್‌ ಪ್ರವಾಸಿ ತಾಣವಿದೆ.
ಕೆರೆಗೆ ಕಾಯಕಲ್ಪ: ಶಾಸಕಿ ಎಂ.ರೂಪಕಲಾ ಅವರು ಇತ್ತೀಚೆಗೆ ಗಿಡ ಗಂಟಿಗಳ ತೆರವು ಕಾರ್ಯಾಚರಣೆಯನ್ನು ಚುರುಕುಗೊಳಿಸಿದ್ದು, ಹೆಚ್ಚು ನೀರು ಶೇಖರಣೆಯಾಗಲು ಸಹಕಾರಿಯಾಗಿದೆ. ಶೀಘ್ರ ಕೆ.ಸಿ ವ್ಯಾಲಿ: 1 ತಿಂಗಳೊಳಗೆಈ ಕೆರೆಗೆ ಕೆ.ಸಿ.ವ್ಯಾಲಿ ಯೋಜನೆ ನೀರು ತುಂಬಿಸಲು ಯೋಜನೆ ರೂಪಿಸಿದ್ದು, ಮಳೆ ಹೆಚ್ಚಾದರೆ ವಾರದಲ್ಲಿ ಕೋಡಿ ಹರಿಯಲಿದೆ ಎಂಬ ವಿಶ್ವಾಸವಿದೆ.
ಇಲಾಖೆ ಸಜ್ಜು: 2017ರಲ್ಲಿ ಕೋಡಿ ಹರಿದಾಗ ನೀರು ಪೋಲಾಗಿತ್ತು. ನಂತರ ಇದಕ್ಕೆ ಕ್ರಿಯಾ ಯೋಜನೆ ರೂಪಿಸಿ ಕೆರೆ ಕಟ್ಟೆ ದುರಸ್ತಿ ಮಾಡಿ ನೀರು ಹೆಚ್ಚಾದರೆ ಯಾವುದೇ ಸಮಸ್ಯೆಯಾಗದಂತೆ ಕ್ರಮ ಕೈಗೊಳ್ಳಲಾಗಿತ್ತು. ಈ ಬಗ್ಗೆ ಮತ್ತೂಮ್ಮೆ ಪರಿಶೀಲನೆ ನಡೆಸಿ ಮುನ್ನೆಚ್ಚರಿಕೆ ವಹಿಸಬೇಕೆಂದು ಗ್ರಾಮಸ್ಥರು ಅಭಿಪ್ರಾಯಪಟ್ಟಿದ್ದಾರೆ.
-ಆರ್‌.ಪುರುಷೋತ್ತಮ್‌ ರೆಡ್ಡಿ
