ಸಂಸದ ಶಶಿತರೂರ್‌ ಸಂವಾದಕ್ಕೆ ಡಿಕ್ಷನರಿ ತಂದ ಪ್ರೇಕ್ಷಕ!

ನವದೆಹಲಿ: ಕಾಂಗ್ರೆಸ್‌ ನಾಯಕ, ಸಂಸದ ಶಶಿತರೂರ್‌ ಅವರ ಇಂಗ್ಲಿಷ್‌ ಪಾಂಡಿತ್ಯ ಬಹುತೇಕ ಎಲ್ಲರಿಗೂ ತಿಳಿದೇ ಇದೆ. ಅಂತರ್ಜಾಲದ ಸರ್ಚ್‌ ಇಂಜಿನ್‌ಗಳಿಗೂ ಗೊತ್ತಿರದಂಥ ಇಂಗ್ಲಿಷ್‌ ಪದಗಳ ಶಬ್ದಕೋಶ ತರೂರ್‌ಗೆ ಕರಗತ.

ತರೂರ್‌ ಪದಪುಂಜವನ್ನು ಅರ್ಥೈಸಿಕೊಳ್ಳಲು ಡಿಕ್ಷನರಿಯೇ ಬೇಕು ಎಂದು ಹಲವರು ಛೇಡಿಸಿದ್ದೂ ಇದೆ. ಅದರಂತೆಯೇ ಪ್ರೇಕ್ಷಕರೊಬ್ಬರು ತರೂರ್‌ ಭಾಷಣಕ್ಕೆ ಡಿಕ್ಷನರಿ ಕೊಂಡೊಯ್ದಿದ್ದು, ಈ ವಿಚಾರ ಈಗ ಜಾಲತಾಣದಲ್ಲಿ ವೈರಲ್‌ ಆಗಿದೆ.

ನಾಗಾಲ್ಯಾಂಡ್‌ನ‌ಲ್ಲಿ ಖ್ಯಾತ ನಿರೂಪಕ ಆರ್‌.ಲಂಗ್ಲೆಂಗ್‌ ಅವರ ನಿರೂಪಣೆಯಲ್ಲಿ ಸಂವಾದ ಕಾರ್ಯಕ್ರಮವೊಂದನ್ನು ಆಯೋಜಿಸಲಾಗಿತ್ತು. ಸಂಸದ ತರೂರ್‌, ರಾಜ್ಯದ ಯುವಜನರ ಜತೆಗೆ ಸಂವಾದ ನಡೆಸುತ್ತಿದ್ದರು. ಈ ವೇಳೆ ಕಾರ್ಯಕ್ರಮಕ್ಕೆ ವ್ಯಕ್ತಿಯೊಬ್ಬರು ಡಿಕ್ಷನರಿ ತಂದಿದ್ದಾರೆ.

ಡಿಕ್ಷನರಿ ಫೋಟೋ ಹಂಚಿಕೊಂಡಿರುವ ಆರ್‌.ಲಂಗ್ಲೆಂಗ್‌, ಈವರೆಗೆ ಜನರು ತರೂರ್‌ ಅವರ ಪದಪುಂಜ ಅರ್ಥೈಸಿಕೊಳ್ಳಲು ಡಿಕ್ಷನರಿ ಬೇಕು ಎನ್ನುತ್ತಿದ್ದದ್ದು ತಮಾಷೆ ಎಂದುಕೊಂಡಿದ್ದೆ. ಈಗ ಈ ವಿಚಾರ ಸ್ಪಷ್ಟವಾಯಿತು ಎಂದಿದ್ದಾರೆ.