ಹೊಸದಿಲ್ಲಿ : “ಮಹಿಳೆಯರು ಪುರುಷರಿಗೆ ಎಂದೂ ಸಮಾನರಲ್ಲ; ಅವರು ಪುರುಷರಿಗಿಂತ ಕೆಳಗೆ; ಏಕೆಂದರೆ ಪುರುಷರು ಮಕ್ಕಳನ್ನು ಹೆರಲು ಸಾಧ್ಯವಿಲ್ಲ. ಮಹಿಳೆಯರು ಸಮಾನತೆಯನ್ನು ಬಯಸುವುದಾದರೆ ಪುರುಷರು ನಾಲ್ಕೂವರೆ ಮಾಸ ಗರ್ಭ ಹೊರುವಂತೆ ಅವರು ಕೇಳಿಕೊಳ್ಳಬೇಕಾಗುತ್ತದೆ’ ಎಂದು ಜಮಾತ್‌ ಉಲೇಮಾ ಇದರ ಕಾರ್ಯದರ್ಶಿಯಾಗಿರುವ ಮತಪಂಡಿತರೋರ್ವರು ಹೇಳಿದ್ದಾರೆ.
45 ವರ್ಷ ಪ್ರಾಯದ ಮೀರಿದ ಮುಸ್ಲಿಂ ಮಹಿಳೆಯರು ಪುರುಷ ಸಂಬಂಧಿ ಇಲ್ಲದೆಯೂ ನಾಲ್ಕು ಮಂದಿಯ ಗುಂಪಿನೊಂದಿಗೆ ಹಜ್‌ ಯಾತ್ರೆಯನ್ನು ಕೈಗೊಳ್ಳುವುದಕ್ಕೆ ಅನುಮತಿ ನೀಡುವ ಸರಕಾರದ ಪ್ರಸ್ತಾವವೊಂದಕ್ಕೆ ಪ್ರತಿಕ್ರಿಯೆ ನೀಡುತ್ತಿದ್ದ ಅವರು “ಸರಕಾರದ ಈ ಕ್ರಮ ಇಸ್ಲಾಂ ವಿರೋಧಿ’ ಎಂದು ಟೀಕಿಸಿದರು.
ಕೇಂದ್ರ ಸರಕಾರವು ನೇಮಿಸಿರುವ ಸಮಿತಿಯೊಂದು ರೂಪಿಸಿರುವ ಕರಡು ಹಜ್‌ ನೀತಿಯಲ್ಲಿ 45 ಮೀರಿದ ಮಹಿಳೆಯರು ಪುರುಷ ಸಂಗಾತಿ ಇಲ್ಲದೆಯೂ ನಾಲ್ಕು ಐದು ಮಂದಿ ಯಾತ್ರಿಕರ ಗುಂಪಿನೊಂದಿಗೆ ಹಜ್‌ ಕೈಗೊಳ್ಳಬಹುದಾಗಿದೆ ಎಂಬ ಸಲಹೆಯನ್ನು ನೀಡಿದೆ.
ಕೇಂದ್ರ ಅಲ್ಪ ಸಂಖ್ಯಾಕ ವ್ಯವಹಾರಗಳ ಸಚಿವ ಮುಖ್‌ತಾರ್‌ ಅಬ್ಟಾಸ್‌ ನಖ್‌ವಿ ಅವರಿಗೆ ಎರಡು ದಿನಗಳ ಹಿಂದೆ ಸಮಿತಿಯ ಕರಡನ್ನು ಸಲ್ಲಿಸಲಾಗಿದೆ. ಇದನ್ನು ಅನುಸರಿಸಿ ದೇಶಾದ್ಯಂತದ ಮುಸ್ಲಿಂ ಮತಪಂಡಿತರು ಇಂತಹ ಪ್ರಸ್ತಾವವನ್ನು ವಿರೋಧಿಸಿದ್ದಾರೆ.
ದರ್ಗಾ ಆಲಾ ಹಜರತ್‌ ಇದರ ವಕ್ತಾರರೋರ್ವರು ಈ ಪ್ರಸ್ತಾವಕ್ಕೆ ಪ್ರತಿಕ್ರಿಯೆ ನೀಡುತ್ತಾ, “ಪುರುಷ ಸಂಬಂಧಿ ಇಲ್ಲದೇ ಮುಸ್ಲಿಂ ಮಹಿಳೆಯೊಬ್ಬಳು ಹಜ್‌ ಯಾತ್ರೆ ಕೈಗೊಳ್ಳುವುದು ಮಹಾಪಾಪ’ ಎಂದು ಟೀಕಿಸಿದ್ದಾರೆ.
