ವಾನ್‌ ರಚಿಸಿದ ಸಾರ್ವಕಾಲಿಕ ಭಾರತ-ಪಾಕ್‌ ತಂಡ

ಲಂಡನ್‌: ಐಸಿಸಿ ವಿಶ್ವಕಪ್‌ನಲ್ಲಿ ಭಾರತ-ಪಾಕಿಸ್ಥಾನ ನಡುವಣ ಸಮರಕ್ಕೆ ವೇದಿಕೆ ಸಿದ್ಧವಾಗುತ್ತಿದೆ. ಈ ವೇಳೆ ಇಂಗ್ಲೆಂಡಿನ ಮಾಜಿ ನಾಯಕ ಮೈಕಲ್‌ ವಾನ್‌ ಸಾರ್ವಕಾಲಿಕ ಭಾರತ-ಪಾಕಿಸ್ಥಾನ ಏಕದಿನ ತಂಡವೊಂದನ್ನು ಆಯ್ಕೆ ಮಾಡಿದ್ದಾರೆ.

ಭಾರತೀಯ ವಿಶ್ವಕಪ್‌ ತಂಡದ ಮೂವರು (ಕೊಹ್ಲಿ, ಧೋನಿ, ಬುಮ್ರಾ) ಸದಸ್ಯರು ವಾನ್‌ ಆಯ್ಕೆಯ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ. ಆದರೆ ಹಾಲಿ ಪಾಕಿಸ್ಥಾನ ತಂಡದ ಯಾವುದೇ ಆಟಗಾರ ಈ ತಂಡದಲ್ಲಿಲ್ಲ. ಹಾಗೆಯೇ ಭಾರತಕ್ಕೆ ಮೊದಲ ವಿಶ್ವಕಪ್‌ ತಂದಿತ್ತ ನಾಯಕ ಕಪಿಲ್‌ದೇವ್‌ ಅವರಿಗೂ ಜಾಗವಿಲ್ಲ.

ಆರಂಭಿಕರಾಗಿ ತೆಂಡುಲ್ಕರ್‌ ಮತ್ತು ಸೆಹವಾಗ್‌ ಅವರನ್ನು ವಾನ್‌ ಆಯ್ಕೆ ಮಾಡಿದ್ದಾರೆ. 3 ಮತ್ತು 4ನೇ ಕ್ರಮಾಂಕದಲ್ಲಿ ಕೊಹ್ಲಿ ಮತ್ತು ಪಾಕಿಸ್ಥಾನದ ಮಾಜಿ ನಾಯಕ ಇಂಝಮಾಮ್‌ ಉಲ್‌ ಹಕ್‌ ಅವರನ್ನು ಆರಿಸಿದ್ದಾರೆ.ವಿಕೆಟ್‌ ಕೀಪರ್‌ ಮತ್ತು ನಾಯಕರಾಗಿ ಧೋನಿ ಅವರನ್ನು ಆಯ್ಕೆ ಮಾಡಲಾಗಿದೆ. ಅನಿಲ್‌ ಕುಂಬ್ಳೆ ತಂಡದಲ್ಲಿರುವ ಏಕೈಕ ಸ್ಪಿನ್ನರ್‌.

ಭಾರತ-ಪಾಕ್‌ ತಂಡ: ಸಚಿನ್‌ ತೆಂಡುಲ್ಕರ್‌, ವೀರೇಂದ್ರ ಸೆಹವಾಗ್‌, ವಿರಾಟ್‌ ಕೊಹ್ಲಿ, ಇಂಝಮಾಮ್‌ ಉಲ್‌ ಹಕ್‌, ಜಾವೇದ್‌ ಮಿಯಾಂದಾದ್‌, ಎಂ.ಎಸ್‌. ಧೋನಿ (ನಾಯಕ), ಇಮ್ರಾನ್‌ ಖಾನ್‌, ವಾಸಿಮ್‌ ಅಕ್ರಮ್‌, ಅನಿಲ್‌ ಕುಂಬ್ಳೆ, ಜಸ್‌ಪ್ರೀತ್‌ ಬುಮ್ರಾ ಮತ್ತು ವಕಾರ್‌ ಯೂನಿಸ್‌.