ವಾಡಿ: ತರ್ಕಸಪೇಟೆ ದರ್ಗಾ ಜಾತ್ರೆ ರದ್ದು;ಶಾಂತಿ ಸಭೆ

ವಾಡಿ: ಇದೇ ಜ.19 ಹಾಗೂ 20 ರಂದು ಎರಡು ದಿನಗಳ ಕಾಲ ನಡೆಸಲು ನಿರ್ಧರಿಸಲಾಗಿದ್ದ ನಾಲವಾರ ವಲಯದ ತರ್ಕಸಪೇಟೆ ಗ್ರಾಮದ ಶಾಪೀರ್ ಅಲಿ ಘೇಪಿರಲ್ಲಿ ದರ್ಗಾ ಜಾತ್ರೆ ರದ್ದುಪಡಿಸಲಾಗಿದೆ.

ಈ ಕುರಿತು ಶನಿವಾರ ವಾಡಿ ಪೊಲೀಸ್ ಠಾಣೆಯಲ್ಲಿ ಜಾತ್ರಾಮಹೋತ್ಸವ ಸಮಿತಿಯ ಪದಾಧಿಕಾರಿಗಳು ಹಾಗೂ ಗ್ರಾಮದ ಮುಖಂಡರ ಸಹಭಾಗಿತ್ವದಲ್ಲಿ ಶಾಂತಿ ಸಭೆ ನಡೆಸಿದ ಪಿಎಸ್ ಐ ವಿಜಯಕುಮಾರ ಭಾವಗಿ, ಸಾಂಕ್ರಾಮಿಕ ರೋಗ ಕೊರೊನಾ ವೈರಸ್ ನ ರೂಪಾಂತರಿ ಒ ಮಿಕ್ರಾನ್ ಚೈನ್ ಬ್ರೇಕ್ ಮಾಡಲು ಸರಕಾರ ಹೊಸ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ. ಪರಿಣಾಮ ಸಾರ್ವಜನಿಕರ ಆರೋಗ್ಯ ಹಿತದೃಷ್ಟಿಯಿಂದ ಯಾವೂದೇ ಜಾತ್ರೆ, ಸಭೆ ಸಮಾರಂಭಗಳನ್ನು ಆಯೋಜಿಸಲು ಅವಕಾಶವಿಲ್ಲ. ಆದ್ದರಿಂದ ತರ್ಕಸಪೇಟೆ ಗ್ರಾಮದ ದರ್ಗಾ ಜಾತ್ರೆ ನಡೆಸುವಂತಿಲ್ಲ. ಅಲ್ಲದೆ ಈ ಎರಡು ದಿನಗಳಲ್ಲಿ ಭಕ್ತರು ದರ್ಗಾ ಪ್ರವೇಶ ಮಾಡಬಾರದು. ಮನೆಯಲ್ಲೇ ದೇವರಿಗೆ ಪೂಜಿಸುವ ಮೂಲಕ ಭಕ್ತಿ ಸಮರ್ಪಿಸಬೇಕು ಎಂದು ಸೂಚಿಸಿದ್ದಾರೆ.

ಕಾನೂನು ಉಲ್ಲಂಘಿಸಿ ದರ್ಗಾ ಜಾತ್ರೆ ನಡೆಸುವುದಾಗಲಿ ಅಥವ ಭಕ್ತರು ದರ್ಗಾ ಪ್ರವೇಶಕ್ಕೆ ಮುಂದಾದರೆ ಕಾನೂನು ರೀತಿ ಕ್ರಮಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ.