ಸಿನಿಮಾ ಕಾರ್ಯಗಳನ್ನು ಬದಿಗೊತ್ತಿ ಚುನಾವಣಾ ಪ್ರಚಾರದಲ್ಲಿ ಬಿಝಿಯಾಗಿದ್ದ ದರ್ಶನ್ ಈಗ ಮತ್ತೆ ಸಿನಿಮಾ ಮೂಡ್‌ಗೆ ಬಂದಿದ್ದಾರೆ. ಅದು “ರಾಬರ್ಟ್‌’ ಮೂಲಕ. ಇದು ದರ್ಶನ್ ನಾಯಕರಾಗಿ ನಟಿಸುತ್ತಿರುವ ಹೊಸ ಚಿತ್ರ. ಸೋಮವಾರ ಈ ಚಿತ್ರಕ್ಕೆ ಬನಶಂಕರಿ ದೇವಸ್ಥಾನದಲ್ಲಿ ಮುಹೂರ್ತ ನಡೆಯಿತು. ಒಂದು ತಿಂಗಳ ಗ್ಯಾಪ್‌ನ ಬಳಿಕ ದರ್ಶನ್ ಸಿನಿಮಾದತ್ತ ಮುಖ ಮಾಡಿದ್ದರು.
ದರ್ಶನ್ ಅವರ ಈ ಹಿಂದಿನ ಚಿತ್ರಗಳಿಗೆ ಹೋಲಿಸಿದರೆ “ರಾಬರ್ಟ್‌’ ತುಂಬಾ ಸ್ಪೆಷಲ್ ಎನ್ನಬಹುದು. ಅದಕ್ಕೆ ಕಾರಣ ಹೊಸ ಗೆಟಪ್‌. ಈ ಚಿತ್ರಕ್ಕಾಗಿ ಈಗಾಗಲೇ ದರ್ಶನ್ ಗಡ್ಡ ಬಿಟ್ಟಿದ್ದಾರೆ. ಚಿತ್ರದ ಫ್ಲ್ಯಾಶ್‌ಬ್ಯಾಕ್‌ನಲ್ಲಿ ಬರುವ ಪ್ರಮುಖ ದೃಶ್ಯಕ್ಕಾಗಿ ದರ್ಶನ್ ಈ ತಯಾರಿ ಮಾಡಿದ್ದಾರೆ. ಇಷ್ಟಕ್ಕೆ ದರ್ಶನ್ “ರಾಬರ್ಟ್‌’ ತಯಾರಿ ಮುಗಿಯೋದಿಲ್ಲ.
ಮೂಲಗಳ ಪ್ರಕಾರ, ದರ್ಶನ್ ಈ ಚಿತ್ರದಲ್ಲಿ ಸಖತ್‌ ಫಿಟ್‌ ಅಂಡ್‌ ಫೈನ್‌ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ನೀವು ಅದನ್ನು ಸಿಕ್ಸ್‌ಪ್ಯಾಕ್‌ ಎಂದಾದರೂ ಕರೆಯಬಹುದು. ಹಾಗಂತ ದರ್ಶನ್ ಸಿಕ್ಸ್‌ಪ್ಯಾಕ್‌ ಮಾಡುವುದಾಗಿ ನೇರವಾಗಿ ಎಲ್ಲಿಯೂ ಹೇಳಿಲ್ಲ. ಬದಲಾಗಿ ಈ ಚಿತ್ರಕ್ಕಾಗಿ ಸಾಕಷ್ಟು ವರ್ಕೌಟ್‌ ಮಾಡಲಿದ್ದಾರೆ.
ಅದು ಯಾವ ಮಟ್ಟಿಗೆ ಎಂದರೆ ದರ್ಶನ್ ಅನ್ನ ಕೂಡಾ ತಿನ್ನದೇ ವರ್ಕೌಟ್‌ ಮಾಡಲು ನಿರ್ಧರಿಸಿದ್ದಾರೆ. ಜೊತೆಗೆ ಚಿತ್ರದ ಕಾನ್ಸೆಪ್ಟ್ಗೆ ಅನುಗುಣವಾಗಿ ಫೋಟೋಶೂಟ್‌ ಕೂಡಾ ಮಾಡಲು ಚಿತ್ರತಂಡ ನಿರ್ಧರಿಸಿದೆ. ಚಿತ್ರದಲ್ಲಿನ ತಮ್ಮ ಗೆಟಪ್‌ ಬಗ್ಗೆ ಮಾತನಾಡುವ ದರ್ಶನ್, “ಈ ಗೆಟಪ್‌ ಅಲ್ಲಾ, ಒರಿಜಿನಲ್‌ ಗೆಟಪ್‌ ಬೇರೇನೇ ಇದೆ. ಒಂದಷ್ಟು ತಯಾರಿಯೊಂದಿಗೆ ಫ‌ಸ್ಟ್‌ ಸ್ಟಿಲ್‌ ಬಿಡ್ತೀವಿ’ ಎನ್ನುತ್ತಾರೆ.
ಈ ಹಿಂದೆ “ಚೌಕ’ ಚಿತ್ರ ನಿರ್ದೇಶಿಸಿದ್ದ ತರುಣ್‌ ಸುಧೀರ್‌ “ರಾಬರ್ಟ್‌’ ನಿರ್ದೇಶಿಸುತ್ತಿದ್ದಾರೆ. “ಚೌಕ’ದಲ್ಲೂ ದರ್ಶನ್ ಗೆಸ್ಟ್‌ ಅಪಿಯರೆನ್ಸ್‌ ಮಾಡಿದ್ದು, ರಾಬರ್ಟ್‌ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈಗ ಆ ಪಾತ್ರದ ಹೆಸರನ್ನೇ ಸಿನಿಮಾಕ್ಕಿಡಲಾಗಿದೆ. ಚಿತ್ರಕ್ಕೆ ನಾಯಕಿಯ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ.
