ಯುವತಿಯನ್ನು ರೈಲು ಹಳಿಗೆ ತಳ್ಳಿದ ಪಾಪಿ! ವಿಡಿಯೋ ವೈರಲ್‌ 

ಬೆಲ್ಜಿಯಂ: ನೂರಾರು ಜನರಿದ್ದ ಮೆಟ್ರೋ ನಿಲ್ದಾಣದಲ್ಲಿ, ಇನ್ನೇನು ರೈಲು ಸಮೀಪಕ್ಕೆ ಬಂದಿತು ಎನ್ನುವಷ್ಟರಲ್ಲಿ ವ್ಯಕ್ತಿ ಯುವತಿಯನ್ನು ಹಳಿಗೆ ದಬ್ಬಿರುವ ಘಟನೆ ಬೆಲ್ಜಿಯಂನಲ್ಲಿ ನಡೆದಿದೆ.

ರೋಜಿಯೆರ್‌ ಮೆಟ್ರೋ ನಿಲ್ದಾಣದಲ್ಲಿ ಈ ಘಟನೆ ನಡೆದಿದ್ದು, ಅದು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಆ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

23 ವರ್ಷದ ಯುವತಿಯನ್ನು ಹಳಿಗೆ ದಬ್ಬಿದ ವ್ಯಕ್ತಿ ತಕ್ಷಣ ಅಲ್ಲಿಂದ ಕಾಲ್ಕಿತ್ತಿದ್ದಾನೆ. ಯುವತಿ ಬಿದ್ದದ್ದನ್ನು ಕಂಡು ಮೆಟ್ರೋ ರೈಲಿನ ಚಾಲಕ ತಕ್ಷಣ ತುರ್ತು ಬ್ರೇಕ್‌ ಹಾಕಿದ್ದಾನೆ. ಇದರಿಂದಾಗಿ ರೈಲು ಯುವತಿಗೆ ಸ್ವಲ್ಪ ಹಿಂದೆಯೇ ನಿಂತಿದೆ.

ಘಟನೆಯಿಂದಾಗಿ ಯುವತಿ ಹಾಗೂ ಒಮ್ಮೆಲೆ ಬ್ರೇಕ್‌ ಹಾಕಿದ ಮೆಟ್ರೋ ರೈಲು ಚಾಲಕನಿಗೆ ಗಾಯವಾಗಿದೆ.

ಇಬ್ಬರನ್ನೂ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಯುವತಿಯನ್ನು ದಬ್ಬಿದ್ದ ಆರೋಪಿಯನ್ನು ಬಂಧಿಸಲಾಗಿದೆ.