ಸ್ವಾತಂತ್ರ್ಯ ಸಿಕ್ಕಿ 75 ವರ್ಷಗಳ ನಂತರ ಸಿಕ್ಕಿತು ವಿದ್ಯುತ್‌ ಭಾಗ್ಯ

ಲಕ್ನೋ: ಉತ್ತರ ಪ್ರದೇಶದ ಎತಾಹ್‌ ಜಿಲ್ಲೆಯ ತುಲೈ ಕಾ ನಾಗ್ಲಾ ಗ್ರಾಮಕ್ಕೆ ಈ ವರ್ಷದ ದೀಪಾವಳಿ ನಿಜಕ್ಕೂ ಸಂತಸ ತಂದಿದೆ. ಸ್ವಾತಂತ್ರ್ಯ ಸಿಕ್ಕಿ 75 ವರ್ಷಗಳು ಕಳೆದರೂ ವಿದ್ಯುತ್‌ ಸಂಪರ್ಕ ಕಂಡಿರದ ಗ್ರಾಮಕ್ಕೆ ಇದೀಗ ವಿದ್ಯುತ್‌ ಸಂಪರ್ಕ ಕಲ್ಪಿಸಿಕೊಡಲಾಗಿದೆ.

ಇತ್ತೀಚೆಗೆ ಈ ಗ್ರಾಮದ ಬಗ್ಗೆ ಮಾಧ್ಯಮಗಳು “ಕತ್ತಲಿನ ಗ್ರಾಮ’ ಎಂದು ವರದಿ ಮಾಡಿದ್ದವು. ಅದರ ಬೆನ್ನಲ್ಲೇ ಎಚ್ಚೆತ್ತುಕೊಂಡ ಮಾಜಿ ವಿದ್ಯುತ್‌ ಸಚಿವ ಶ್ರೀಕಾಂತ್‌ ಶರ್ಮಾ ಅವರು ಕೂಡಲೇ ಗ್ರಾಮಕ್ಕೆ ವಿದ್ಯುತ್ಛಕ್ತಿ ಕಲ್ಪಿಸುವಂತೆ ಸೂಚಿಸಿದ್ದರು. ಅಲ್ಲಿನ ಅಲಿಗಂಜ್‌ ಕ್ಷೇತ್ರದ ಶಾಸಕರು ಈ ಯೋಜನೆಗೆಂದೇ 10 ಲಕ್ಷ ರೂ. ಕೊಟ್ಟಿದ್ದಾರೆ ಎಂದೂ ವರದಿಯಾಗಿದೆ.

“ವಿದ್ಯುತ್‌ ಬೇಕೆಂದು ಹಲವಾರು ಅಧಿಕಾರಿಗಳ ಬಳಿ ಬೇಡಿಕೆ ಇಟ್ಟಿದ್ದೇವೆ. ಸರ್ಕಾರಗಳು ಬದಲಾದವೇ ಹೊರತು ನಮಗೆ ಬೆಳಕು ಬಂದಿರಲಿಲ್ಲ. ಈಗ ನಮ್ಮೂರಿಗೆ ವಿದ್ಯುತ್‌ ಸಂಪರ್ಕ ಸಿಕ್ಕಿರುವುದರ ಬಗ್ಗೆ ಸಂತೋಷವಿದೆ’ ಎನ್ನುತ್ತಾರೆ ಗ್ರಾಮಸ್ಥರು.