ಚೆನ್ನೈ: ನಟ ವಿಕ್ರಮ್ ಅಭಿನಯದ ಬಹು ನಿರೀಕ್ಷಿತ ʼಧ್ರುವ ನಚ್ಚತಿರಂʼ ರಿಲೀಸ್ ಗೆ ಮತ್ತೆ ಸಂಕಷ್ಟ ಎದುರಾಗಿದೆ. ಕೊನೆಕ್ಷಣದಲ್ಲಿ ಸಿನಿಮಾ ರಿಲೀಸ್ ಡೇಟ್‌ ಮುಂದೂಡಿಕೆಯಾಗಿದೆ.
ನ.24 ರಂದು(ಶುಕ್ರವಾರ) ಸಿನಿಮಾ ಅದ್ಧೂರಿಯಾಗಿ ರಿಲೀಸ್ ಆಗಬೇಕಿತ್ತು. 6 ವರ್ಷದ ಬಳಿಕ (2017 ರಲ್ಲಿ ಸಟ್ಟೇರಿತ್ತು) ಎಲ್ಲಾ ಕಾನೂನು ಹಾಗೂ ಹಣಕಾಸಿನ ತೊಡಕನ್ನು ಎದುರಿಸಿ, ಕೊನೆಗೂ ರಿಲೀಸ್ ಡೇಟ್‌ ಪ್ರಕಟಿಸಿದ ಬಳಿಕ, ಸಿನಿಮಾ ನೋಡಲು ಪ್ರೇಕ್ಷಕರು ಟಿಕೆಟ್‌ ಬುಕ್‌ ಮಾಡುವ ಹಂತದವರೆಗೂ ಹೋಗಿದ್ದರು. ಆದರೆ ನಿರ್ದೇಶಕ ಗೌತಮ್ ವಾಸುದೇವ್ ಮೆನನ್ ಸಿನಿಮಾವನ್ನು ನ.24 ರಂದು ರಿಲೀಸ್ ಮಾಡಲು ಆಗುವುದಿಲ್ಲ ಎಂದಿದ್ದಾರೆ.
ನಿರ್ದೇಶಕರ ಪೋಸ್ಟ್‌ ನಲ್ಲಿ ಏನಿದೆ?:
“ಕ್ಷಮಿಸಿ. ಧ್ರುವ ನಚ್ಚತಿರಂ ಇಂದು ತೆರೆಗೆ ಬರಲು ಸಾಧ್ಯವಾಗಿಲ್ಲ. ನಾವು ನಮ್ಮ ಕೈಲಾದಷ್ಟು ಪ್ರಯತ್ನಿಸಿದೆವು. ಆದರೆ ನಮಗೆ ಇನ್ನೂ ಒಂದು ಅಥವಾ ಎರಡು ದಿನ ಬೇಕು ಎಂದು ತೋರುತ್ತಿದೆ. ನಿಮ್ಮೆಲ್ಲರ ಬೆಂಬಲ ನಮ್ಮನ್ನು ಮುಂದುವರೆಸಿದೆ. ಇನ್ನು ಕೆಲವೇ ದಿನಗಳಲ್ಲಿ ನಾವು ಬರುತ್ತೇವೆ” ಎಂದಿದ್ದಾರೆ.
‘ಧ್ರುವ ನಚ್ಚತಿರಂ’ ಬಿಡುಗಡೆಗೆ ಸಂಬಂಧಿಸಿದಂತೆ ಗೌತಮ್ ಮೆನನ್ ಮತ್ತು ಅವರ ತಂಡದ ವಿರುದ್ಧ ಎರಡು ಪ್ರಕರಣಗಳು ದಾಖಲಾಗಿವೆ. ನವೆಂಬರ್ 24 ರಂದು ಬೆಳಿಗ್ಗೆ 10.30ರ ಮೊದಲು ಅಂದರೆ ಸಿನಿಮಾ ರಿಲೀಸ್ ಆಗುವ ಮುನ್ನ ಆಲ್ ಇನ್ ಪಿಕ್ಚರ್ಸ್‌ಗೆ 2 ಕೋಟಿ ರೂಪಾಯಿಗಳನ್ನು ಮರುಪಾವತಿಸುವಂತೆ ಮದ್ರಾಸ್ ಹೈಕೋರ್ಟ್ ಮೆನನ್ ಅವರಿಗೆ ಸೂಚನೆ ನೀಡಿತ್ತು. ಬಹುಶಃ ಹಣವನ್ನು ಪಾವತಿಸಲು ಚಿತ್ರತಂಡ ವಿಫಲವಾಗಿದ್ದು, ಈ ಕಾರಣದಿಂದ ಸಿನಿಮಾ ಮುಂದೂಡಿಕೆ ಆಗಿದೆ ಎನ್ನಲಾಗಿದೆ.
ಈ ಬಗ್ಗೆ ಇಂದು ಮತ್ತು ನಾಳೆ ಮಾತುಕತೆ ನಡೆಯಲಿದ್ದು, ಆದಾದ ಬಳಿಕ ಸಿನಿಮಾದ ರಿಲೀಸ್ ಡೇಟ್‌ ರಿವೀಲ್‌ ಆಗಲಿದೆ ಎಂದು ವರದಿ ತಿಳಿಸಿದೆ.
ಈ ಚಿತ್ರದಲ್ಲಿ ಚಿಯಾನ್ ವಿಕ್ರಮ್ ಪ್ರಮುಖ ಪಾತ್ರದಲ್ಲಿ ರಿತು ವರ್ಮಾ, ಆರ್ ಪಾರ್ತಿಬನ್, ರಾಧಿಕಾ ಶರತ್‌ಕುಮಾರ್, ಸಿಮ್ರಾನ್ ಮತ್ತು ವಿನಾಯಕನ್ ಪ್ರಮುಖ ಪಾತ್ರಗಳಲ್ಲಿದ್ದಾರೆ.
