ಚೆನ್ನೈ: ನಟ ವಿಜಯ್ ಸೇತುಪತಿ ಅವರ ಪುತ್ರ ಮೊದಲ ಬಾರಿಗೆ ನಾಯಕರಾಗಿ ಸಿನಿಮಾವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದು, ಸಿನಿಮಾದ ಮುಹೂರ್ತ ಶುಕ್ರವಾರ (ನ.24 ರಂದು) ಚೆನ್ನೈನಲ್ಲಿ ನೆರವೇರಿದೆ.
ವಿಜಯ್ ಸೇತುಪತಿ ಅವರ ಮಗ ಸೂರ್ಯ ಸೇತುಪತಿಗೆ ಸಿನಿಮಾರಂಗ ಹೊಸತಲ್ಲ. ಬಾಲನಟನಾಗಿ ಈಗಾಗಲೇ ನಟನೆಯಲ್ಲಿ ಮಿಂಚಿರುವ ಅವರು ಪೂರ್ಣ ಪ್ರಮಾಣದಲ್ಲಿ ನಾಯಕರಾಗಿ ʼ ಫೀನಿಕ್ಸ್ʼ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
‘ನಾನು ರೌಡಿ ಧಾನ್’ ಮತ್ತು ‘ಸಿಂಧುಬಾಧ್’ ಸಿನಿಮಾದಲ್ಲಿ ಸೂರ್ಯ ಪಾತ್ರಗಳನ್ನು ಮಾಡಿದ್ದಾರೆ. ‘ಸಿಂಧುಬಾಧ್’ 2019 ರಲ್ಲಿ ಬಂದ ಸೇತುಪತಿ ಅವರ ಸಿನಿಮಾವಾಗಿದ್ದು, ಈ ಸಿನಿಮಾದಲ್ಲಿ ಸೂರ್ಯ ತನ್ನ ತಂದೆಯೊಂದಿಗೆ ತೆರೆಹಂಚಿಕೊಂಡಿದ್ದರು.
ಕಾಲಿವುಡ್‌ ಸಿನಿರಂಗದ ಸಾಹಸ ನಿರ್ದೇಶಕ ಅನಲ್ ಅರಸು ʼಫೀನಿಕ್ಸ್ʼ ಮೊಲಕ ನಿರ್ದೇಶಕರಾಗಲಿದ್ದಾರೆ. ಇದೊಂದು ಮಾಸ್‌ ಕಥೆಯ ಸಿನಿಮಾವಾಗಲಿದ್ದು, ಮುಹೂರ್ತ ಕಾರ್ಯಕ್ರಮದ ಫೋಟೋಗಳು ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿವೆ.
ಬ್ರೇವ್ ಮ್ಯಾನ್ ಪಿಕ್ಚರ್ಸ್ ಅಡಿಯಲ್ಲಿ ರಾಜಲಕ್ಷ್ಮಿ ಅರಸಕುಮಾರ್ ಅವರು ‘ಫೀನಿಕ್ಸ್’ ನ್ನು ನಿರ್ಮಿಸಿದ್ದಾರೆ. ಚಿತ್ರದ ತಾಂತ್ರಿಕ ತಂಡದಲ್ಲಿ ಸಂಯೋಜಕ ಸ್ಯಾಮ್ ಸಿಎಸ್, ಛಾಯಾಗ್ರಾಹಕ ವೆಲ್ರಾಜ್ ಮತ್ತು ಸಂಕಲನಕಾರ ಪ್ರವೀಣ್ ಕೆಎಲ್ ಇದ್ದಾರೆ.
ಅಂದಹಾಗೆ ಮಗನ ಸಿನಿಮಾದಲ್ಲಿ ವಿಜಯ್ ಸೇತುಪತಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
