ಮಲ್ಯ ಸಾಲದ ಗ್ಯಾರಂಟರ್‌ ಯುಬಿ ಕಂಪೆನಿ ಮುಚ್ಚಲು ಹೈಕೋರ್ಟ್‌ ಆದೇಶ

ಬೆಂಗಳೂರು : ಬಹುಕೋಟಿ ಬ್ಯಾಂಕ್‌ ಸಾಲ ಸುಸ್ತಿಗಾರನಾಗಿ ವಿದೇಶಕ್ಕೆ ಪಲಾಯನ ಮಾಡಿರುವ ಮದ್ಯ ದೊರೆ ವಿಜಯ್‌ ಮಲ್ಯ ಅವರ ವಿವಿಧ ಬ್ಯಾಂಕ್‌ ಸಾಲಗಳಿಗೆ ಜಾಮೀನುದಾರನಾಗಿ ನಿಂತಿದ್ದ ಮಲ್ಯ ಒಡೆತನದ ಯುಬಿಎಚ್‌ಎಲ್‌ ಸಂಸ್ಥೆಯನ್ನು ಮುಚ್ಚುವಂತೆ ರಾಜ್ಯ ಹೈಕೋರ್ಟ್‌ ಆದೇಶ ನೀಡಿದೆ.

ಯುಬಿಎಚ್‌ಎಲ್‌ ಮುಚ್ಚುಗಡೆಗೆ ಆದೇಶ ನೀಡಿರುವ ರಾಜ್ಯ ಹೈಕೋರ್ಟ್‌ ನ್ಯಾಯಮೂರ್ತಿ ವಿನೀತ್‌ ಕೊಠಾರಿ ಅವರು, ಯುಬಿಎಚ್‌ಎಲ್‌ ಗೆ ಸೇರಿದ ಎಲ್ಲ ಆಸ್ತಿ ಪಾಸ್ತಿ ವಿವರಗಳನ್ನು ಲೆಕ್ಕ ಹಾಕಿ ಮಾರಾಟ ಮಾಡಲು ಆಫೀಶಿಯಲ್‌ ಲಿಕ್ವಿಡೇಟರ್‌ ನೇಮಕ ಮಾಡಿ ಆದೇಶ ಹೊರಡಿಸಿದ್ದಾರೆ.

ಯುಬಿಎಚ್‌ಎಲ್‌ ಕಂಪೆನಿಯಲ್ಲಿ ವಿಜಯ್‌ ಮಲ್ಯ ಅವರು ಶೇ.52ರ ಪಾಲು ಬಂಡವಾಳವನ್ನು ಹೊಂದಿದ್ದು ವಸ್ತುತಃ ಅದರ ಒಡೆತನವನ್ನು ಹೊಂದಿದ್ದಾರೆ.

ವಿಜಯ್‌ ಮಲ್ಯ ಅವರು ತಮ್ಮ ಉದ್ಯಮಕ್ಕೆ ಸಂಬಂಧಿಸಿ  ದೇಶದ ವಿವಿಧ ಪ್ರಮುಖ ಬ್ಯಾಂಕುಗಳಲ್ಲಿ ಮಾಡಿದ್ದ ಸಾಲಗಳಿಗೆ ಯುಬಿಎಚ್‌ಎಲ್‌ ಗ್ಯಾರಂಟರ್‌ ಆಗಿ ಸಹಿ ಮಾಡಿತ್ತು. ಅಂತೆಯೇ ಬ್ಯಾಂಕುಗಳ ಸುಸ್ತಿ ಸಾಲ ವಸೂಲಿಗೆ ಗ್ಯಾರಂಟರ್‌ ಕಂಪೆನಿ ಯುಬಿಎಚ್‌ಎಲ್‌ ವಿರುದ್ಧ ದಾವೆ ಹೂಡಿದ್ದವು.